ٽنڊو محمد خان (ن س)سنڌ ترقي پسند پارٽيءَ جي سربراهه ڊاڪٽر قادر مگسي چيو آهي ته سنڌ جي برسات ٻوڏ جي تباهين لاءِ مليل عالمي امداد مستحق ماڻهن ۾ تقسيم ڪرڻ لاءِ عدالتي ڪميشن قائم ڪئي وڃي ، اهڙو اظهار هن ٽنڊو محمد خان جي ڳوٺ ڀائي خان ٽالپر ۾ سينئر صحافي حيدر شورو جي وفات تي سندس ڀاءُ رمضان شورو ، قادر شورو ۽ پونئيرن سان عذرخواهي ڪرڻ بعد صحافين سان ڳالهائيندي ڪيو ، هن چيو ته سنڌ کي مستقل تباهڪارين کان بچائڻ لاءِ ايندڙ وفاقي ، صوبائي چونڊن توڙي مڪاني چونڊن ۾ مضبوط قومپرست اليڪشنري اتحاد جي ضرورت آهي ، جنهن لاءِ ترقي پسند پارٽي عملي طور قومپرست قيادت کي هڪ مضبوط پليٽفارم تي متحد ڪرڻ لاءِ عملي طور ڪوشش ڪرڻ ۾ سرگرم آهي ، جنهن ۾ سمورين قومپرست پارٽين کي اتحاد کي مضبوط ڪرڻ لاءِ اڳتي وڌڻ جي ضرورت آهي ، هن چيو ته سنڌ جي اندر منڇر ڍنڍ کي جيڪي ڪٽ لڳائي نقصان رسايو ويو آهي ان جو ازالو هڪ صدي ۾ ڪرڻ ۾ ناممڪن آهي ، سڄي سنڌ پيپلز پارٽي جي صوبائي حڪومت جي غلط پاليسين ۽ رٿابندين جي ڪري نقصان جو ازالو برداشت ڪري رهي آهي پر اها برداشت هاڻي تمام گهڻي وڌي ويئي آهي ، سنڌ جو عوام پنهنجي ڌرتي تي بي گهر ٿي ويو آهي ، سنڌ جي اندر ڌارين جي يلغار جو سلسلو جاري آهي ، افغانين کي سنڌ مان نيڪالي ڏيارڻ جا اعلان ڪري ان تي ڪو به عمل نه ڪيو ويو آهي ، سنڌ ۾ لکين غيرقانوني پرڏيهي مستقل آباد ٿي رهيا آهن ، جن کي سازش جي تحت قومي شناختي ڪارڊ سان گڏ رهائش لاءِ ڪالونيون قائم ڪري ڏنيون ويون آهن دهشتگردي ، تخريبڪاري ۾ ڪو به سنڌي اڄ تائين حڪومت جي رڪارڊ ۾ دهشتگرد تخريبڪار ثابت نه ٿيو آهي پر پرڏيهي سنڌ جي اندر تخريبڪاري ۽ دهشتگردي ۾ ملوث هجڻ جا حڪومت کي ٺوس ثبوت ملڻ باوجود حڪومت انهن جي خلاف ڪاروائي ڪرڻ ۾ ناڪام رهي آهي ، اها بدقسمتي آهي ته سنڌ جي امن پسند عوام کي پنهنجي ڌرتي تي اقليت ۾ تبديل ڪرڻ جي سنڌ دشمن سازش ڪئي وڃي پئي جنهن کي ڪنهن به صورت ۾ قبول نه ڪنداسين .
