واشنگٽن (ويب ڊيسڪ) آمريڪي صدر ٽرمپ آمريڪي ڪانگريس کي خط لکيو آهي جنهن ۾ چيو ويو آهي ته ايران سان سندس هٿياربند تڪرار ختم ٿي ويو آهي.ماهرن اهو خيال ظاهر ڪيو آهي ته خطي ۾ آمريڪي فوجن جي موجودگي جي باوجود اهڙو موقف اختيار ڪرڻ سان، ٽرمپ انتظاميه جنگ لاءِ ڪانگريس کان منظوري وٺڻ تي مجبور ٿيڻ کان بچي سگهندي.ٽرمپ خط ۾ لکيو ته جڏهن ته سندس حڪومت پائيدار امن حاصل ڪرڻ جي ڪوشش ڪري رهي آهي، جنگ جاري رهي سگهي ٿي.ڪانگريس جي اسپيڪر مائيڪ جانسن ۽ سينيٽ جي صدر چڪ گراسلي کي لکيل خط ۾، ٽرمپ لکيو ته ايران سان هٿياربند تڪرار جيڪو 28 فيبروري تي شروع ٿيو هو هاڻي ختم ٿي چڪو آهي، جڏهن ته، ٽرمپ خط ۾ تسليم ڪيو ته تڪرار اڃا تائين مڪمل طور تي حل نه ٿيو آهي.
نامعلوم هٿياربند هٿان تيل بردار جهاز اغوا
يمن جي ڪوسٽ گارڊ رپورٽ ڪيو آهي ته نامعلوم هٿياربند ماڻهن شبوہ صوبي جي سامونڊي ڪناري ڀرسان تيل کڻندڙ جهاز M/T Eureka کي اغوا ڪري ورتو آهي۔ حملو ڪندڙ جهاز تي چڙهي ويا ۽ ان جو ڪنٽرول سنڀالي پوءِ ان کي عدن جي نار طرف، صوماليه جي سامونڊي حدن ڏانهن موڙي ڇڏيو۔ ان کان اڳ، برطانيا جيميري ٽائيم ٽريڊ آپريشنز اداري ٻڌايو هو ته هڪ “بلڪ ڪيريئر” جهاز مڪلا بندرگاهه کان 84 ناٽيڪل ميل (155 ڪلوميٽر) ڏکڻ اولهه طرف هڪ “سائي رنگ واري ننڍڙي ٻيڙي” ۽ هڪ مڇي مارڻ واري ٻيڙي طرفان مشڪوڪ ويجهو اچڻ جي رپورٽ ڏني هئي۔
نئين ايراني تجويز تي صدر ٽرمپ غير مطمئن
آمريڪا جي صدرڊونلڊ ٽرمپ چيو آهي ته هو ايران جي جنگ بابت ڳالهين لاءِ پيش ڪيل تازي ايراني تجويز کان مطمئن ناهي، جڏهن ته ايران جي پرڏيهي وزير چيو ته جيڪڏهن آمريڪا پنهنجو رويو تبديل ڪري ته تهران سفارتڪاري لاءِ تيار آهي۔ ٽرمپ جي بيان مان ظاهر ٿيو ته ٻن مهينن کان جاري هن جنگ بابت ٺهيل بند گلي (ڊيڊ لاڪ) جاري رهڻ جو امڪان آهي، جيتوڻيڪ هو اهڙي تڪرار کي ختم ڪرڻ چاهي ٿو جيڪو آمريڪي عوام ۾ گهڻو غير مقبول آهي۔ اهو واضح ناهي ته ايران پنهنجي نئين تجويز ۾ ڇا پيش ڪيو آهي۔ ايران جي پرڏيهي وزارت خبردار ڪيو آهي ته جلدي نتيجن جي اميد نه رکڻ گهرجي۔ “هو معاهدو ڪرڻ چاهين ٿا، پر … مان ان سان مطمئن ناهيان،” ٽرمپ وائٽ هائوس ۾ صحافين کي ٻڌايو، ۽ وڌيڪ چيو ته ايراني قيادت “گهڻي ورهايل” آهي ۽ ٻن يا ٽن گروهن ۾ ورهايل آهي۔ “هو اهڙيون گهرجون رکن ٿا جن تي مان راضي نٿو ٿي سگهان،” هن چيو، ۽ شامل ڪيو ته فون ذريعي ڳالهين جو سلسلو جاري آهي۔ جمعي ڏينهن بعد ۾ فلوريڊا ۾ تقرير دوران، ٽرمپ چيو ته آمريڪا ايران سان پنهنجو تڪرار جلد ختم نه ڪندو “۽ پوءِ ٽن سالن کان پوءِ ساڳيو مسئلو ٻيهر پيدا ٿئي.” ٽرمپ چيو آهي ته ايران کي ايٽمي هٿيار حاصل ڪرڻ جي اجازت نه ڏني ويندي۔ هن تي اهو به دٻاءُ آهي ته هو هرموز رستي تي ايران جي ڪنٽرول کي ختم ڪري، جتان دنيا جي لڳ ڀڳ 20 سيڪڙو تيل ۽ گئس جي فراهمي گذري ٿي۔
جرمني مان 5 هزار آمريڪي فوجي واپس
رائٽرز موجب ايران بابت معاملي تي آمريڪا جا پنهنجن روايتي اتحادي ملڪن سان لاڳاپا وڌيڪ تڻجي ويا، ڇاڪاڻتہ آمريڪا اعلان ڪيو ته هو جرمني مان 5,000 فوجي واپس وٺي رهيو آهي۔ ٽرمپ جرمن چانسلر فريڊرڪ مرز سان اختلافن سبب اهڙي قدمن جي ڌمڪي ڏني هئي، جنهن چيو هو ته ايراني آمريڪا کي ڳالهين ۾شرمنده ڪري رهيا آهن ۽ آمريڪا وٽ ڪا نڪرڻ جي حڪمت عملي ناهي۔ پينٽاگون جي هڪ سينيئر عهديدار، جنهن نالو ظاهر نه ڪرڻ جي شرط تي ڳالهايو، چيو ته جرمني جا تازا بيان “نامناسب ۽ غير مددگار” آهن. آمريڪا اٽلي ۽ اسپين مان به فوج واپس ڪرڻ جو فيصلو ڪيو آهي. جرمني ۾ 36 هزار آمريڪي فوجي آهن، اٽلي ۾ 12 هزار ۽ برطانيا ۾ او هزار آمريڪي فوجي آهن. ايران خلاف جنگ ۾ اسپين پنهنجي ايئر اسپيس ۽ فوجي اڏا استعمال ڪرڻ کان آمريڪا کي روڪيو هو ۽ اٽلي به روڪيو هو۔
تيل جي قيمت ۾ هڪ سيڪڙو گهٽتائي
عالمي تيل جون قيمتون جمعي ڏينهن گهٽ ٿي ويون جڏهن ايراني تجويز جي خبر سامهون آئي، جيڪا خميس ڏينهن جي چئن سالن جي بلند سطح کان پوءِ هئي۔ برينٽ ڪروڊ جي قيمت لڳ ڀڳ 1 سيڪڙو گهٽجي $109 جي ويجهو ٿي وئي۔
ڳالهين ۽ جنگ ٻنهي لاءِ تيار آهيون، عراقچي
ايران جي پرڏيهي وزير عباس عراقچي چيو آهي ته جيڪڏهن آمريڪا پنهنجو “حد کان وڌيڪ سخت رويو، ڌمڪين ڀري ٻولي ۽ اشتعال انگيز ڪارروايون” تبديل ڪري ته ايران سفارتڪاري لاءِ تيار آهي۔هن پنهنجي ٽيليگرام چينل تي لکيو ته “ايران جون هٿياربند فوجون هر خطري جي مقابلي لاءِ تيار آهن.” ٻن سينيئر ايراني ذريعن رائٽرز کي ٻڌايو ته ايران پنهنجي فضائي دفاع کي فعال ڪري ڇڏيو آهي ۽ جيڪڏهن حملو ٿيو ته وسيع جواب ڏيڻ جو منصوبو تيار آهي، ڇوتہ اندازو آهي ته آمريڪا طرفان مختصر پر سخت حملي کان پوءِ شايد اسرائيلي حملو به ٿي سگهي ٿو۔
ايراني بندرگاهن جي ناڪابندي برقرار آهي
آمريڪي نيوي ايران جي ڪروڊ تيل جي برآمدات کي روڪي رهي آهي۔ جمعي منجهند تائين 45 واپاري جهاز روڪيا ويا هئا. آمريڪي خزاني کاتي چيو ته جيڪو به جهاز هلائيندڙ ايران کي لنگهه لاءِ فيس ادا ڪندو، جنهن ۾ ايراني ريڊ ڪريسينٽسوسائٽي جهڙين تنظيمن کي ڏنل خيراتي چندا به شامل آهن، اهو پابندين جي خطري ۾ هوندو۔
جنگبندي برقرار رکڻ ۽ هرموز لنگهه جلد کولڻ گهرجي، چيني سفير
چين جي گڏيل قومن ۾ سفير Fu Cong چيو ته جنگبندي برقرار رکڻ فوري ضرورت آهي ۽ هرموز رستي کي جلد کان جلد کولڻ ضروري آهي۔ هن چيو ته جيڪڏهن هن مهيني ٽرمپ جي بيجنگ دوري تائين اهو رستو بند رهيو ته اهو معاملو شي جنپنگ ۽ ٽرمپ جي ڳالهين ۾ اهم موضوع هوندو۔
آمريڪا وچ اوڀر جي اتحادين کي هٿيارن ۽ فوجي سامان جي وڪري جي منظوري ڏئي ڇڏي
آمريڪا قطر، ڪويت، گڏيل عرب امارات ۽ اسرائيل کي وڌيڪ هٿيارن ۽ فوجي سامان جي وڪري جي منظوري ڏئي ڇڏي آهي، انهن هٿيارن جي قيمت 8.6 بلين ڊالر آهي.آمريڪي اسٽيٽ ڊپارٽمينٽ ڪويت کي 2.5 بلين ڊالر جي جنگي ڪمانڊ سسٽم ۽ لاڳاپيل سامان جي وڪري جي منظوري ڏئي ڇڏي آهي، ۽ اسرائيل کي 992.4 ملين ڊالر جي ايڊوانسڊ پريسيشن ڪل ويپن سسٽم جي وڪري جي به منظوري ڏئي ڇڏي آهي.آمريڪي اسٽيٽ ڊپارٽمينٽ قطر کي 4.1 بلين ڊالر جي پيٽرياٽ ميزائل ۽ گڏيل عرب امارات کي 147.6 ملين ڊالر جي ايڊوانسڊ پريسيشن ڪل ويپن جي وڪري جي به منظوري ڏئي ڇڏي آهي.
آمريڪي سفارتخاني پاران برطانيه ۾ رهندڙ شهرين کي عوامي هنڌن تي محتاط رهڻ جو مشورو
لنڊن ۾ آمريڪي سفارتخاني برطانيه ۾ آمريڪين کي عوامي هنڌن تي محتاط رهڻ جو مشورو ڏنو آهي.ان کان اڳ، برطانوي اختيارين چيو هو ته ملڪ ۾ دهشتگرديءَ جي خطري جي سطح وڌي وئي آهي. برطانوي اختيارين اهو فيصلو اتر لنڊن ۾ يهودين تي حملي کان پوءِ ڪيو، جنهن جو مطلب آهي ته ايندڙ 6 مهينن ۾ برطانيه ۾ انتهاپسند حملي جو امڪان تمام گهڻو آهي. لنڊن ۾ آمريڪي سفارتخاني چيو آهي ته برطانيه ۾ اسلامي ۽ ساڄي ڌر جي انتهاپسند دهشتگرد گروپن کان خطرو وڌي ويو آهي.
ايران جنگ آمريڪا کان يورپ ڏانهن هٿيارن جي ترسيل ۾ دير ڪري سگهي ٿي: برطانوي اخبار
آمريڪا يورپ ۾ پنهنجي اتحادين کي ٻڌايو آهي ته انهن کي برآمد ڪيل هٿيارن جي ترسيل ۾ دير ٿي سگهي ٿي ڇاڪاڻ ته آمريڪي هٿيار ايران خلاف جنگ ۾ استعمال ٿي رهيا آهن ۽ انهن جا ذخيرا تيزي سان ختم ٿي رهيا آهن.فنانشل ٽائمز جي مطابق، آمريڪي عملدارن برطانيه، پولينڊ، لٿوانيا ۽ ايسٽونيا جي اختيارين کي هٿيارن جي ترسيل ۾ دير بابت آگاهه ڪيو آهي.
آمريڪا پاران جرمني مان 5000 فوجين جي واپسي جو اعلان
آمريڪي دفاع واري کاتي، پينٽاگون، اعلان ڪيو آهي ته آمريڪا جرمني مان پنهنجا 5000 فوجي واپس ڪڍندو. پينٽاگون جي ترجمان موجب، فوجين جي واپسي ايندڙ 6 کان 12 مهينن اندر مڪمل ڪئي ويندي.رپورٽن موجب، آمريڪي صدر ۽ جرمن چانسلر ايران جنگ جي معاملي تي تازن ڏينهن ۾ سخت لفظن جي ڏي وٺ ڪئي، جنهن کان پوءِ هي فيصلو سامهون آيو آهي.
ٽرمپ پاران ايران جي جنگ کان پوئتي نه هٽڻ جو اعلان
ڊونلڊ ٽرمپ فلوريڊا ۾ ڳالهائيندي چيو ته مقصد حاصل نه ٿيڻ تائين تڪرار کي واپس نه ٿو وٺي سگهجي ڇاڪاڻ ته اهو ڪجهه سالن بعد مسئلو ٻيهر اڀري سگهي ٿو.آمريڪي صدر ڊونلڊ ٽرمپ هڪ ڀيرو ٻيهر اعلان ڪيو ته هو ايران کي ايٽمي هٿيار حاصل ڪرڻ جي اجازت نه ڏيندو، ۽ اهو پڻ چيو ته جيڪڏهن ايران کي نه روڪيو وڃي ها ته اسرائيل ۽ يورپ ٽٽي پون ها.
چين پاران جنگ بندي برقرار رکڻ ۽ آبنائي هرمز کي فوري طور تي کولڻ جو مطالبو
گڏيل قومن ۾ چين جي سفير ايران-آمريڪا جنگ بندي برقرار رکڻ جي ضرورت تي زور ڏنو آهي.صحافين سان ڳالهائيندي، فو ڪانگ چيو ته آبنائے هرمز کي جلد کان جلد کولڻ انتهائي ضروري آهي ڇاڪاڻ ته ان جي بندش عالمي واپار ۽ توانائي جي فراهمي کي متاثر ڪري رهي آهي. هن چيو ته ايران کي آبنائے هرمز تي لاڳو پابنديون ختم ڪرڻ گهرجن، جڏهن ته آمريڪا کي پنهنجي بحري بندش ختم ڪرڻ گهرجي.چيني سفير جي مطابق، سڀ کان اهم ڳالهه جنگ بندي برقرار رکڻ آهي ۽ هي جنگ بندي ڊگهي عرصي تائين رهڻ گهرجي، جنهن لاءِ ڌرين جي وچ ۾ نيڪ نيتي سان ڳالهيون ناگزير آهن. هن عالمي برادري تي زور ڏنو ته هو متحرڪ ٿئي ۽ جنگ جي بحالي خلاف آواز بلند ڪري.
61 سيڪڙو عوام پاران ايران تي آمريڪي حملو غلط قرار ڏئي ڇڏيو
واشنگٽن پوسٽ، اي بي سي نيوز ۽ اِپسوس پاران جاري ڪيل هڪ سروي ۾ ڏٺو ويو آهي ته 61 سيڪڙو آمريڪين جو خيال آهي ته ايران تي حملو هڪ غلطي هئي، جڏهن ته صرف 36 سيڪڙو ان قدم جي حمايت ڪئي.سروي ۾، 90 سيڪڙو ڊيموڪريٽس ۽ 71 سيڪڙو آزاد ماڻهن جنگ جي مخالفت ڪئي، جڏهن ته 19 سيڪڙو ريپبلڪن پڻ جنگ کي غلطي سڏيو.سروي ۾ آمريڪا جي اڳيان ڇا ڪرڻ گهرجي ان سوال تي مخلوط جواب ڏيکاريا ويا.48 سيڪڙو چيو ته آمريڪا کي ايران سان امن معاهدو ڪرڻ گهرجي، جيتوڻيڪ اهو هڪ خراب معاهدو هجي، جڏهن ته 46 سيڪڙو چيو ته آمريڪا کي ايران سان سٺي معاهدي لاءِ دٻاءُ وڌائڻ گهرجي، جيتوڻيڪ ان جو مطلب ٻيهر فوجي ڪارروائي ڪرڻ هجي.ان کان اڳ، مئي 2006 ۾ هڪ ساڳئي سروي ۾، 59 سيڪڙو آمريڪين عراق سان آمريڪي جنگ کي غلطي سڏيو. 1971 ۾ ڪيل گيلپ سروي ۾، 10 مان 6 آمريڪين ويٽنام جنگ کي غلطي سڏيو.
