سلطانپور(رپورٽ زاهد مهر) معياري تعليم طور بهترين ساک رکندڙ اداري ماڊرن پبلڪ اسڪول ڳوٺ جلال انڍڙ ۾ سالياني امتحان جو نتيجو پڌرو ڪرڻ جي موقعي تي هڪ شاندار تقريب منعقد ڪئي وئي. جنهن ۾ شاگردن ۽ شاگردياڻين سميت سندن والدين ۽علائقي واسين ڳوٺاڻن شرڪت ڪئي. پروگرام جو مهمان خاص پ پ اڳواڻ ميان محمد عابد انڍڙ، اعزازي مهمانن ۾ ميان علي گوهر انڍڙ، محمود مهر، شاهد مغل، آصف مهر، استاد نظير انڍڙ ۽ ٻيا شامل هئا. تقريب ۾ شاگردن ۽ شاگردياڻين مختلف سلسلن ٽيبلوز، خاڪن، لطيفن ۽ تقريري مقابلي ۾ ڀرپور حصو ورتو.
پروگرام ۾ اسڪول جي چيئرمين حاجي عبدالواحد انڍڙ ۽ پرنسپال ذيشان اقبال آرائين، والدين ۽ آيل مهمانن جو آڌر ڀاءُ ڪندي کين اجرڪن جا تحفا پيش ڪيا. تقريب ۾ والدين ۽ مھمانن پنهنجي خيالن جو اظهار ڪندي ٻارڙن کي معياري تعليم ڏيڻ ۽ شاندار پروگرام ڪرڻ تي اسڪول انتظاميا کي خراج پيش ڪيو. پروگرام دوران ڪي جي کان اٺين ڪلاس تائين جي شاگردن ۽ شاگردياڻين کي سندن ڪلاسن ۾ پهرين، ٻين ۽ ٽين پوزيشن حاصل ڪرڻ تي انعام ڏنا ويا، تقريب جي ڪارروائي اسڪول جي استادن شهباز علي انڍڙ، ميان جميل انڍڙ، اسدالله انڍڙ ۽ وقار شيخ هلائي.
