ڪراچي(اسٽاف رپورٽر)باهه سبب تباهه ٿيل گل پلازا ۾ سرچ آپريشن جاري آهي، ميزنائين فلور تان وڌيڪ 28لاشن جون باقيات مليون آهن، ڊپٽي ڪمشنر ڏکڻ جاويد نبي کوسو موجب باقيات مان 11 لاشن جي سڃاڻپ ٿي آهي.گم ٿيل ماڻهن جو انگ 85 هو.
ڊي آءِ جي ساؤٿ اسد رضا موجب، دڪاندارن ميزنائين فلور تي ماڻهن جي موجودگي بابت نشاندهي ڪئي هئي. سڀئي 20 لاش هڪ دبئي ڪراڪري (چيني ٿانون) جي دڪان مان مليا آهن. ڊي آءِ جي ساؤٿ موجب، ملبو هٽائڻ جو ڪم عارضي طور روڪيو ويو آهي، پهريون لاش ڪڍيا پيا وڃن. هن دڪان تي سيل لڳل هئي ۽ شادين جي شاپنگ لاءِ رات 2 وڳي تائين دڪان کليل هوندو هو.
گل پلازا ۾ باهه لڳڻ کان پوءِ ماڻهن پاڻ کي بچائڻ لاءِ دڪان ۾ بند ڪري ڇڏيو هو، انهن ماڻهن جي آخري موبائل لوڪيشن به ساڳئي هنڌ جي ظاهر ٿي هئي. اختيارين موجب هن عمارت ۾ 1002 دوڪانن جي اجازت هئي پر بعد 98 دوڪان غير قانوني طور ٺاهيا ويا. عمارت جي ڪل 16 ٻاهر نڪرڻ جا رستا هئا جن مان باهه لڳڻ وقت رڳو 2 کليل هئا ۽ 14 بند هئا.
دڪان مان اسان پاڻ 14 ماڻهن جون باقيات ڪڍيون آهن: دڪان مالڪ
ڪراڪري دڪان جي مالڪ سلمان چيو آهي ته اسان پاڻ دڪان مان 14 ماڻهن جون باقيات ڪڍيون آهن. اسان جو دڪان ميزنائين فلور تي آهي، واقعي وقت اسان جا ڪزن ۽ ملازم به موجود هئا، دڪان ۾ وڏي تعداد ۾ عورتون ۽ ٻيا ماڻهو پڻ هئا.
هاڻي ملبي مان لاش نه پر باقيات ملي رهيون آهن: پوليس سرجن
پوليس سرجن ڊاڪٽر سميه موجب، هاڻي تائين ٻن دڪانن مان 21 باقيات اسان وٽ آنديون ويون آهن. اسان في الحال پڪ سان نٿا چئي سگهون ته اهي 21 مڪمل لاش آهن يا ڪيترن ماڻهن جون باقيات ٿي سگهن ٿيون. اڄ صبح کان سول اسپتال ۾ رڳو باقيات ئي آنديون ويون آهن.
ڊاڪٽر سميه وڌيڪ ٻڌايو ته ملبي مان هاڻي لاش نه پر انتهائي خراب حالت ۾ باقيات ملي رهيون آهن، جن ۾ ٽٽل انساني هڏيون ۽ ٽٽل ڏند شامل آهن. هڏيون ٽٽل هجڻ سبب ڊي اين اي لاءِ سيمپل به نٿا وٺي سگهجن، جنهن ڪري ڊي اين اي ٽيسٽ نه ٿيڻ سبب باقيات وارثن حوالي ڪرڻ ۾ سخت مشڪلاتون پيش اچي رهيون آهن. ياد رهي ته حادثي ۾ وڌيڪ ٽن لاشن جي سڃاڻپ ٿي چڪي آهي، جڏهن ته 17 لاش اڃا تائين ناقابلِ سڃاڻپ آهن.
تخريبڪاري جا ثبوت ناهن مليا، ڊمپر غائب ٿيڻ جي خبر غلط آهي: ايڊشنل آءِ جي
ايڊشنل آءِ جي ڪراچي موجب، گل پلازا واقعي ۾ هن وقت تائين تخريبڪاري جا ڪي به ثبوت ناهن مليا. واقعي جي بارڪ بيني سان جاچ جاري آهي، جڏهن ته ڊمپر غائب ٿيڻ بابت اطلاع غلط آهي.
ڪمشنر ڪراچي چيو آهي ته رمپا پلازا کي ڪجهه نقصان پهتو آهي، پر عمارت خطرناڪ ناهي. جڏهن ته سنڌ بلڊنگ ڪنٽرول اٿارٽي رمپا پلازا کي غير محفوظ قرار ڏنو آهي. رمپا پلازا جي انتظاميا ۽ دڪان مالڪن کي نوٽيس جاري ڪري عمارت جي خطرناڪ حصن جي استعمال تي پابندي لڳائي وئي آهي.
گل پلازا سانحي بابت جاچ پڻ جاري آهي. سنڌ بلڊنگ ڪنٽرول اٿارٽي جاچ ڪميٽي جي سربراهه ڪمشنر ڪراچي کي ست فائلون جمع ڪرايون آهن. انهن ست فائلن مان ٽي گل پلازا سان لاڳاپيل زير التوا عدالتي ڪيسن ۽ خلافِ ضابطه تعمير بابت دستاويزن تي مشتمل آهن.
