لاڙڪاڻو(بيورو رپورٽ) پيپلز پارٽي جي چيئرمين بلاول ڀٽو زرداري آچر ڏينهن مفاهمت واري سياست جي اهميت تي زور ڏيندي چيو ته ان حوالي سان حڪمران پارٽي، ان جا اتحادي ۽ گڏوگڏ مخالف ڌر کي به پنهنجو ڪردار ادا ڪرڻو پوندو.
بلاول اهڙو اظهارلاڙڪاڻي ۾ سنڌ انسٽيٽيوٽ آف چائلڊ هيلٿ اينڊ نيو نيٽالاجي جي افتتاحي تقريب دوران ميڊيا سان ڳالهائيندي ڪيو. هن ياد ڏياريو ته اڳوڻي وزيراعظم بينظير ڀٽو “سچ ۽ مفاهمت” ۽ “سياست ۾ مفاهمت” جو پيغام ڏنو هو.
ملڪ جي ترقي ۽ معاشي خوشحالي سان ان کي جوڙيندي، هن چيو ته حڪمران پارٽي ۽ ان جا اتحادي ان لاءِ پنهنجو ڪردار ادا ڪندا، جڏهن ته مخالف ڌر کي به “ذميوار ڪردار” نڀائڻو پوندو.
هن چيو ته جيڪڏهن انتهاپسندي واري سياست جي جواب ۾ سخت قدم کنيا وڃن، ته پوءِ شڪايتون نه ٿيڻ گهرجن، ۽ انگريزي چوڻي جو حوالو ڏيندي چيو: “جيڪڏهن گرمي سهي نٿا سگهو ته ڪچن مان ٻاهر نڪري وڃو.”
بلاول وڌيڪ چيو ته “جيڪڏهن اوهين (پي ٽي آءِ) پنهنجي اڳواڻ خلاف هڪ ننڍڙي نيَب (قومي احتساب بيورو) ڪيس ۽ هڪ معمولي گرفتاري سبب قومي اداري تي حملو ڪندا، ته پوءِ شڪايت نه ڪريو. اوهان خلاف قانون ۽ آئين موجب ڪارروائي ڪئي ويندي.”
بلاول چيو ته جيڪڏهن پي ٽي آءِ جي جاءِ تي پيپلز پارٽي هجي ها ته ان کي ان کان به وڌيڪ سخت نتيجن کي منهن ڏيڻو پوي ها.
هن پي ٽي آءِ کي “انتهاپسندي واري سياست” ڇڏڻ جو مشورو ڏيندي چيو ته اهو نه رڳو پارٽي ۽ ان جي ڪارڪردگي لاءِ بهتر هوندو، پر ان سان ملڪ جي سياست تي به مثبت اثر پوندو.
پيپلز پارٽي جي چيئرمين وڌيڪ چيو ته جيتوڻيڪ بينظير ڀٽو جو فلسفو مفاهمت واري سياست تي ٻڌل هو، پر ان تي عملي طور سڀ کان وڏو ڪردار صدر آصف علي زرداري ادا ڪيو.
“چونڊن کان پوءِ پهرين ڏينهن کان وٺي، ڪالهه پنهنجي تقرير تائين، ۽ پارٽي اندر به، منهنجو موقف اهو ئي رهيو آهي ته صدر زرداري کي پنهنجو ڪردار ادا ڪرڻو پوندو.
“صدر زرداري وٽ نه رڳو عملي تجربو آهي، پر عوام جو اعتماد به آهي ته هو سياست ۾ مفاهمت لاءِ ڪردار ادا ڪرڻ جي صلاحيت رکي ٿو،” بلاول چيو.
تنهن هوندي به هن نشاندهي ڪئي ته موجوده حالتن ۾ هڪ “منفرد صورتحال” کي نظر ۾ رکڻ ضروري آهي. هن چيو ته “ڀارت ۽ افغانستان سان سرحدن واري صورتحال توهان جي سامهون آهي، ۽ ملڪ اندر دهشتگردي وڌي رهي آهي.” اهڙي صورتحال ۾ مخالف ڌر جو ڪردار سڀ کان وڌيڪ اهم آهي.
“جيڪڏهن اهي انتهاپسند پارٽي وانگر ڪم ڪندا ته رياست جو ردعمل به ان مطابق هوندو. پر جيڪڏهن اهي سياسي رويو اختيار ڪندا ته ٻين پارٽين کي ملڪ ۾ سياسي ورهاست ۽ ڌُرائپ گهٽائڻ لاءِ ڪردار ادا ڪرڻ جو ڪجهه موقعو ملي سگهي ٿو.”
هن چيو ته سياسي مفاهمت ئي اڳتي وڌڻ جو رستو آهي ۽ ان لاءِ سازگار ماحول پيدا ڪرڻو پوندو، ٻي صورت ۾ ان جا نقصان عوام ۽ ملڪ کي ڀوڳڻا پوندا.
جمعيت علماءِ اسلام (ف) جي سربراهه مولانا فضل الرحمان بابت سوال جي جواب ۾، جن تازو ملڪ ۾ نيون چونڊون ڪرائڻ جو مطالبو ڪيو آهي، بلاول چيو ته سڀني سياسي پارٽين کي پنهنجو ڪردار ادا ڪرڻو پوندو ته جيئن جڏهن به چونڊون ٿين، اهي آزاد ۽ شفاف هجن.
“۽ جيڪڏهن ان لاءِ قانون ۾ ڪا ترميم يا تبديلي گهربل هجي ته اسان کي اليڪشن ڪميشن تي عوام جو اعتماد وڌائڻو پوندو.
بلاول وڌيڪ چيو ته “جيڪڏهن ٻيهر ڌانڌلي جا الزام لڳڻا آهن ته چونڊون ڪرائڻ جو ڪو فائدو ناهي. هاڻي جڏهن وقت موجود آهي ۽ اهو واضح آهي ته چونڊون جلد نه ٿينديون، ته سنجيده سياسي پارٽين کي چونڊ سڌارن لاءِ ڪوشش ڪرڻ گهرجي ته جيئن عوام ۽ سياسي پارٽين جو اليڪشن ڪميشن تي اعتماد وڌي.”
تازو ٿيل ضمني چونڊن بابت شڪايتن جو حوالو ڏيندي هن چيو ته هو نه ٿو چاهي ته ضمني چونڊون هجن يا عام چونڊون، اهڙي صورتحال ۾ ٿين ۽ “وڌيڪ سياسي عدم استحڪام” جو سبب بڻجن.
مخالف ڌر کي ٻيهر مفاهمت ڏانهن ڪم ڪرڻ جي ضرورت تي زور ڏيندي، بلاول چيو ته حڪومت کي به ڪجهه قدم کڻڻا پوندا.
هن وڌيڪ چيو ته “پارليامينٽ کي فعال بڻايو وڃي. پارليامينٽ جي پليٽفارم کي استعمال ڪيو وڃي. سياستدانن ۽ سياسي ڪارڪنن کي ڪيترائي قدم کڻڻا پوندا ته جيئن سياست ۾ برداشت لاءِ جاءِ پيدا ڪري سگهجي.”
