ڪراچي (اسٽاف رپورٽر) سنڌ جي چيف سيڪريٽري آصف حيدر شاهه جي صدارت هيٺ جمعي ڏينهن سڄي صوبي ۾ پيٽروليم شين جي دستيابي، ذخيرن ۽ سپلائي چين جو جائزو وٺڻ لاءِ اعليٰ سطحي اجلاس منعقد ٿيو. اجلاس ۾ وچ اوڀر جي موجوده جنگي صورتحال کي نظر ۾ رکندي صوبي اندر ٻارڻ جي مسلسل فراهمي ۽ امڪاني هنگامي انتظامن بابت تفصيلي جائزو ورتو ويو. اجلاس ۾ سيڪريٽري توانائي، انسپيڪٽر جنرل پوليس سنڌ، سڀني ڊويزنل ڪمشنرن، ڊي آءِ جيز، توانائي کاتي جي اعليٰ عملدارن، آئل اينڊ گيس ريگيوليٽري اٿارٽي (اوگرا) جي نمائندن ۽ ٻين لاڳاپيل ادارن جي آفيسرن شرڪت ڪئي. اجلاس کي بريفنگ ڏيندي ٻڌايو ويو ته سنڌ جي چئن ضلعن، ڪيماڙي، ملير، شهيد بينظير آباد ۽ شڪارپور ۾ آئل مارڪيٽنگ ڪمپنين جا مجموعي طور 34 آئل ڊپو قائم آهن. وڌيڪ ٻڌايو ويو ته صوبي ۾ مجموعي طور 2 هزار 136 پيٽرول پمپ ۽ ريٽيل آئوٽ ليٽس موجود آهن، جن جي مرحليوار انسپيڪشن ڪئي ويندي. اجلاس کي آگاهه ڪيو ويو ته اوگرا پنهنجي ايگزيڪيوٽو ڊائريڪٽر ۽ ريجنل هيڊ ڪراچي جي نگراني ۾ خصوصي انسپيڪشن ٽيمون جوڙي ڇڏيون آهن، جيڪي آئل ڊپوز ۽ پيٽرول پمپن جو باقاعده معائنو ڪنديون، پيٽروليم شين جي ذخيرن جي نگراني ڪنديون، مقرر ڪيل ضابطن تي عملدرآمد جو جائزو وٺنديون ۽ غيرقانوني ذخيره اندوزي يا غير مجاز اسٽوريج جي روڪٿام کي يقيني بڻائينديون. چيف سيڪريٽري سنڌ آصف حيدر شاهه سڀني ڪمشنرن، ڊپٽي ڪمشنرن ۽ پوليس عملدارن کي هدايت ڪئي ته هو اوگرا جي انسپيڪشن ٽيمن سان مڪمل سهڪار ڪن، جيئن نگراني وارو عمل مؤثر نموني مڪمل ٿي سگهي. هن چيو ته سڄي صوبي ۾ پيٽرول، ڊيزل ۽ ٻين پيٽروليم شين جي بنا رڪاوٽ فراهمي حڪومت جي اولين ترجيح آهي ۽ ان مقصد جي حاصلات لاءِ سمورا لاڳاپيل ادارا مڪمل طور سرگرم رهن. چيف سيڪريٽري واضح ڪيو ته ڪنهن به ضلعي ۾ ٻارڻ جي مصنوعي کوٽ پيدا ڪرڻ، ذخيره اندوزي يا غيرقانوني اسٽوريج هرگز برداشت نه ڪئي ويندي. هن ضلعي انتظاميا کي هدايت ڪئي ته سڀني آئل ڊپوز ۽ پيٽرول پمپن تي موجود اسٽاڪ جي لاڳيتي نگراني ڪئي وڃي ۽ ڪنهن به بي ضابطگي جي صورت ۾ فوري قانوني ڪارروائي ڪئي وڃي. هن سڀني ڪمشنرن، ڊپٽي ڪمشنرن ۽ قانون لاڳو ڪندڙ ادارن کي هدايت ڪئي ته هو پنهنجي پنهنجي ضلعن ۾ ٻارڻ جي دستيابي، اسٽاڪ جي صورتحال ۽ سپلائي چين بابت روزاني بنيادن تي رپورٽنگ کي يقيني بڻائين. هن ان ڳالهه تي پڻ زور ڏنو ته آئل ڊپوز ۽ ريٽيل آئوٽ ليٽس تي موجود اسٽاڪ جي بروقت نگراني ۽ صحيح رپورٽنگ هر صورت ۾ يقيني بڻائي وڃي. اجلاس ۾ ان ڳالهه تي پڻ اتفاق ڪيو ويو ته اوگرا، آئل مارڪيٽنگ ڪمپنين، توانائي کاتي ۽ ضلعي انتظاميا وچ ۾ مؤثر رابطي ۽ مربوط هم آهنگي کي برقرار رکيو وڃي، جيئن سپلائي چين ۾ پيش ايندڙ ڪنهن به امڪاني رڪاوٽ کي بروقت ختم ڪري سگهجي.
