شاهپورجهانيان (ن س) جسقم پاران ٽوڙهي ڦاٽڪ جي شهيدن جي 35 هين ورسي ملهائي وئي ، جنهن جي صدارت جسقم ضلعي نوابشاهہ جي صدر علي رضا خاصخيلي ڪئي ، هن چيو ته ٽوڙهي ڦاٽڪ جي شهيدن ڪسڻ قبوليو پر ظالم جي آڻ نه مڃي ، جسقم اڳواڻن ظفر ٻگهيو ، اسد ٻگهيو ، سيف سنڌي چيو ته ٽوڙهي ڦاٽڪ جا شهيد تاريخ ۾ امر لکيا ويندا ، ڇاڪاڻ جو هنن پنهنجي ڌرتي جي آزاديءَ ۽ انهن جي دنگن ۽ ننگن جي حفاظت ڪندي شهادت ماڻي ، جسقم آريسر جي شاهنواز ڀٽي چيو ته سنڌ جي وسيلن جي ڦرلٽ ڪئي پئي وڃي ، ڪڏهن مذهب ، ملڪ ۽ ڪڏهن وفاق پنجاب سنڌ جي حقن تي ڌاڙا هنيا آهن ، جسقم تعلقي قاضي احمد جي اڳواڻن نذير ڏاهري ، پير نعيم ، فقير حڪيم لاکو چيو ته سنڌ جي آزادي ۽ پنهنجي وسيلن جي مالڪي لاءِ جسقم مرڪز پاران 17 نومبر تي ڪراچي ۾ جسقم چيئرمين صنعان خان قريشي جي اڳواڻيءَ ۾ پيغام سنڌ مارچ ريلي ڪڍي ويندي ، جنهن ۾ سنڌي ماڻهو لکن جي تعداد ۾ سنڌ جي گاديءَ واري هنڌ گڏ ٿي سنڌ ، سيد ۽ شهيد بشير خان قريشي سان عملي محبت جو ثبوت ڏين ۽ ڌارين کي ٻڌائين ته سنڌ اسان جي ماءُ آهي ، سنڌي ماڻهو سنڌ خلاف ڪا به سازش برداشت نه ڪندا ، سماجي اڳواڻ نور نبي ٻگهيو ، حافظ عبدالوحيد ٻگهيو چيو ته ٽوڙهي ڦاٽڪ جو سانحو سنڌ جي قومي تحريڪ مٿان وڏو وار هو ، جنهن تي سائين جي ايم سيد به ٻانهن تي ڪاريون پٽيون ٻڌي احتجاج ڪيو هو ، شاعر علي خان لغاري چيو ته شهيد قومن جو سرمايو ٿيندا آهن ، جيڪي قومون شهيدن کي وساري ڇڏينديون آهن ، اُهي قومون تاريخ ۾ پنهنجو وجود برقرار رکي نه سگهنديون آهن ، ان کان اڳ جسقم اڳواڻن رستم ڏاهري، نذير ڏاهري ۽ ٻين به خطاب ڪيو.
