ميهڙ (غلام حسين پنھور) سنڌ جي نامياري صوفي راڳي مانجهي فقير کي بنيادي حق نه ملڻ خلاف ميهڙ ۾ مانجھائي تنظيم پاران فنڪارن، سازندن، صوفي فنڪارن، صوفي خالد حسين ڀٽي ، صوفي امتياز مانجهائي، صوفي نويد، صوفي طارق، صوفي جنسار، صوفي جاويد، صوفي اصغر ۽ ٻين جي اڳواڻي ۾ نيشنل پريس ڪلب اڳيان احتجاجي مظاهرو ڪيو ويو. صحافين سان ڳالهائيندي اڳواڻن چيو ته صوفي مانجهي فقير گذريل ڪجهه مهينن کان بنيادي حق نه ملڻ خلاف سنڌ جي مختلف شهرن ۾ احتجاج ڪيو آهي سندس جي ڳوٺ ۾ نه روڊ، نه اسپتال، نه اسڪول ۽ نه ئي ڪا ٻي سهولت آهي ان سلسلي ۾ اسان پنهنجي فنڪارن ۽ سازنڊن سان گڏ احتجاج لاءِ نڪتا آهيون. هنن چيو ته مانجهي فقير سنڌ جو ناليوارو صوفي راڳي آهي جنهن کي هر هنڌ ٻڌو ۽ پسند ڪيو وڃي ٿو سنڌ صوفين جي ڌرتي آهي پر صوفين کي اهي بنيادي حق نه ٿا ڏنا وڃن. هنن وزير اعليٰ سنڌ، ثقافت جي صوبائي وزير ۽ ٻين وس وارن کان مطالبو ڪيو ته مانجهي فقير جي احتجاج جو نوٽيس وٺي کيس بنيادي سهولتون ڏئي سندس سان انصاف ڪيو وڃي.
