اسلام آباد: (بيورو رپورٽ)پاڪستان حڪومت برطانيا کان شهزاد اڪبر ۽ عادل راجا جي حوالگي جي درخواست ڏئي ڇڏي آهي. وفاقي وزير داخلا محسن نقوي سان برطانوي هاءِ ڪميشنر جين ميرٽ ملاقات ڪئي، جنهن ۾ پاڪ–برطانيا لاڳاپن، سيڪيورٽي تعاون ۽ باهمي دلچسپي وارن معاملن تي تفصيلي ڳالهه ٻولهه ڪئي وئي. ان کان علاوه، برطانيا ۾ غيرقانوني طور رهندڙ پاڪستاني شهرين جي وطن واپسي بابت به ڳالهه ٻولهه ٿي. ملاقات دوران، وزير داخلا شهزاد اڪبر ۽ عادل راجا جي پاڪستان حوالي ڪرڻ بابت سرڪاري دستاويز برطانوي هاءِ ڪميشنر جي حوالي ڪيا. محسن نقوي چيو ته ٻئي ماڻهو پاڪستان ۾ گهربل آهن، انهن کي فوري طور پاڪستان جي حوالي ڪيو وڃي. وزير داخلا، پروپيگنڊا ڪندڙ پاڪستاني شهرين خلاف سخت ۽ پڪا ثبوت پڻ مهيا ڪيا. محسن نقوي چيو ته اسان اظهار راءِ جي آزادي تي پورو يقين رکون ٿا، پر فيڪ نيوز هر ملڪ لاءِ وڏي تڪليف جو سبب آهي.
