اسلام آباد (بيورو رپورٽ)اسلام آباد جي ڊسٽرڪٽ اينڊ سيشن ڪورٽ پي ٽي آءِ جي باني چيئرمين عمران خان ۽ بشرا بي بي جي ضمانت واري درخواست تي ٻڌڻي 30 جولاءِ تائين ملتوي ڪري ڇڏي.ايڊيشنل اينڊ سيشن جج افضل مجوڪا پي ٽي آءِ جي باني 6 ۽ بشرا بي بي جي گرفتاري کان اڳ ضمانت واري درخواست تي ٻڌڻي ڪئي.پي ٽي آءِ جي باني خلاف ترنول ٿاڻي ۾ 2، رمنا، سيڪريٽريٽ، ڪوهسار ۽ ڪراچي ڪمپني ٿاڻن ۾ هڪ هڪ ڪيس داخل آهي، جڏهن ته ڪوهسار ٿاڻي ۾ بشرا بي بي خلاف توشه خانو جعلي رسيدن جو ڪيس داخل آهي.عمران خان خلاف 9 مئي جي واقعن تي جعلي رسيدن جا وڌيڪ 5 ڪيس داخل آهن.پي ٽي آءِ جو وڪيل خالد يوسف چوڌري عدالت ۾ پيش ٿيو ۽ چيو ته بئريسٽر سلمان صفدر لاهور هاءِ ڪورٽ ۾ ڪيس ۾ مصروف آهي، ضمانت واري درخواست تي ٻڌڻي ايندڙ هفتي تائين ملتوي ڪئي وڃي.جج افضل مجوڪا ريمارڪس ڏنا ته ٻڌڻي جلد نه ٿي سگهي، ٻڌڻي موڪلن کانپوءِ سيپٽمبر تائين ملتوي ڪئي ويندي، جنهن تي خالد يوسف چوڌري چيو ته ٻڌڻي ايندڙ هفتي ٿيندي، بئريسٽر سلمان صفدر کي دليل ڏيڻا آهن، جج افضل مجوڪا جواب ڏنو ته ايندڙ هفتي ڪيسن جو ڪافي رش آهي.اسلام آباد جي سيشن جج اڊيالا جيل سپرنٽينڊنٽ کي هدايت ڪئي ته پي ٽي آءِ چيئرمين عمران خان جي وڊيو لنڪ ذريعي يا ذاتي طور تي حاضري يقيني بڻائي وڃي.عدالت عمران خان ۽ بشرا بي بي جي ضمانت واري درخواست تي ٻڌڻي 30 جولاءِ تائين ملتوي ڪندي ايندڙ ٻڌڻي تي ضمانتي دليلن لاءِ طلب ڪري ورتو.
