اسلام آباد(رپورٽ اياز مهر)پارلياماني معاملن واري وفاقي وزير ڊاڪٽر طارق فضل چوڌري جمعي ڏينهن چيو آهي ته پي ٽي آءِ جي باني عمران خان کي طبي علاج لاءِ “جتي هو پاڻ چاهي” اتي وٺي وينداسين، جڏهن ته قيد اڳواڻ جي نظر بابت دعوائن جي حوالي سان هن چيو ته “هن معاملي ۾ ڪا به غفلت نه ڪئي ويندي”.
خميس ڏينهن سپريم ڪورٽ کي آگاهه ڪيو ويو هو ته پي ٽي آءِ جي باني عمران خان جي ساڄي اک ۾ رڳو 15 سيڪڙو نظر باقي رهي آهي، جنهن تي پارٽي پاران سخت ردعمل ڏنو ويو هو.
پارليامينٽ هائوس ٻاهران ميڊيا سان ڳالهائيندي ڊاڪٽر طارق فضل چوڌري چيو: “هو (عمران) چيڪ اپ لاءِ جتي وڃڻ چاهي، اتي وٺي وڃبو. جيڪڏهن هو Al-Shifa Eye Trust وڃڻ چاهي ته اتي وٺي وڃبو. هن معاملي ۾ ڪا به غفلت نه ٿيندي.”
هن وڌيڪ چيو ته “جيڪڏهن چيف جسٽس آف پاڪستان (سي جي پي) ڪنهن ڊاڪٽر جي سفارش ڪري، ته کيس اتي به وٺي وڃبو.”
هن اپوزيشن کي اپيل ڪئي ته هن معاملي کي سياسي رنگ نه ڏنو وڃي. “هي هڪ حساس معاملو آهي؛ ان کي سياسي بڻائڻ ۽ حقيقتن کي مسخ ڪرڻ سراسر ناانصافي آهي.”
هن وڌيڪ چيو ته قيد اڳواڻ جو “هاڻي اکين جي ماهرن يا سپر اسپيشلسٽن کان معائنو ڪرايو ويندو ۽ اسان ڪوشش ڪنداسين ته کيس هر ممڪن علاج فراهم ڪيو وڃي.”
پي ٽي آءِ جي وڪيل ايڊووڪيٽ سلمان صفدر هن هفتي جي شروعات ۾ اڊيالا جيل ۾ اڳوڻي وزيراعظم سان ملاقات بعد خميس ڏينهن سپريم ڪورٽ ۾ هڪ رپورٽ جمع ڪرائي. رپورٽ موجب پي ٽي آءِ باني هن کي ٻڌايو ته “سندس ساڄي اک ۾ رڳو 15 سيڪڙو نظر باقي رهي آهي.”
خميس ڏينهن ڪيس جي ٻڌڻي دوران ٻن ججن تي ٻڌل بينچ، جنهن جي سربراهي چيف جسٽس يحيٰ آفريدي ڪري رهيا هئا، اڳوڻي وزيراعظم جي اک جو معائنو ڪرڻ لاءِ ميڊيڪل ٽيم جوڙڻ جو حڪم ڏنو هو ۽ عمران کي پنهنجي ٻارن سان ڳالهائڻ جي اجازت ڏيڻ جي به هدايت ڪئي. حڪم ڏنو ويو ته اکين جو معائنو ۽ فون ڪالون ٻئي 16 فيبروري (سومر) کان اڳ ڪرايون وڃن.
پي ٽي آءِ پاران لکت واري حڪم جو مطالبو
پي ٽي آءِ سوشل ميڊيا پليٽفارم X تي پوسٽ ڪندي سي جي پي کي مخاطب ڪيو ۽ پي ٽي آءِ باني جي صحت جي جاچ لاءِ “باقاعده لکت واري هدايتن” جو مطالبو ڪيو.
“سي جي پي، اسان کي باضابطه لکت ۾ هدايتون گهرجن ته جيئن يقيني بڻائي سگهجي ته عمران خان جو ماهرن کان معائنو ڪرايو وڃي ۽ کيس Shifa International Hospital ۾ سندس پنهنجن ڊاڪٽرن جي نگراني هيٺ علاج ۾ڏنو وڃي.”
پارٽي زور ڀريو ته سي جي پي “لکت وارو حڪم جاري ڪري ڇو ته عمران کي “فوري اکين جي علاج” جي ضرورت آهي. “هي سياست نه آهي، هي صحت جو معاملو آهي. هي عمران خان جي زندگي جو سوال آهي.”
ان کان اڳ، عمران جي ڀيڻ عليمه خان به X تي پوسٽ ڪندي چيو ته خاندان کي اڃا تائين سپريم ڪورٽ طرفان اکين جي معائني بابت ڪو لکت وارو حڪم نه مليو آهي.
“جمعي 13 تاريخ آهي ۽ منجهند جو هڪ ٿي چڪو آهي، پر اسان کي اڃا تائين سپريم ڪورٽ جو لکت وارو حڪم نه مليو آهي. اسان کي باضابطه لکت واريون هدايتون گهرجن ته جيئن يقيني بڻائي سگهجي ته عمران خان جو ماهرن کان معائنو ٿئي ۽ کيس شفا انٽرنيشنل اسپتال ۾ سندس پنهنجن ڊاڪٽرن جي نگراني هيٺ علاج لاءِ ڏنو وڃي.”
هن چيو ته عدالت طرفان 16 فيبروري جي آخري تاريخ هوندي به “عدالت جي لکت واري حڪم کانسواءِ هدايت تي عمل نٿو ڪري سگهجي.” “هن جي نظر کي لاحق خطري ۽ تڪڙي ضرورت کي ڏسندي، سي جي پي لکت وارو حڪم جاري ڪرڻ ۾ دير ڇو ڪئي آهي؟” هن سوال ڪيو.
عوام پاڪستان ٽي ٽي اي پي جي ڌرڻي ۾ شامل ٿيندي
ان کان اڳ خبر سامهون آئي ته عوام پاڪستان جي قيادت شاهد خاقان عباسي ۽ مفتاح اسماعيل اپوزيشن اتحاد تحريڪ ٽهفظ آئين پاڪستان (ٽي ٽي اي پي) پاران پارليامينٽ هائوس ٻاهران اعلان ڪيل ڌرڻي ۾ شرڪت ڪندي.
خميس ڏينهن سينيٽ ۾ اپوزيشن ليڊر علامه راجا عباس ناصر عمران جي نظر بابت دعويٰ سامهون اچڻ بعد ڌرڻي جو اعلان ڪيو هو.
“هي پرامن احتجاج عمران خان جي هڪ اک جي نظر وڃائڻ جي مبينا دعويٰ ۽ حڪومت طرفان سندس ذاتي ڊاڪٽرن ۽ ڪٽنب تائين رسائي نه ڏيڻ جي ردعمل ۾ ڪيو پيو وڃي.” ٽي ٽي اي پي چيو ته اهو فيصلو گذريل رات ٿيل اجلاس ۾ ڪيو ويو، جنهن ۾ عوام پاڪستان جي قيادت به شرڪت ڪئي.
“ڪنهن به قيدي کي وقت سر ۽ مناسب طبي سهولت کان محروم رکڻ غيراخلاقي، غيرانساني ۽ غيرقانوني آهي.” هن وڌيڪ چيو ته عمران خان پاڪستان جو اڳوڻو وزيراعظم ۽ “ملڪ جي سڀ کان وڏي سياسي پارٽي” جو اڳواڻ آهي. “عوام پاڪستان پارٽي جمعي نماز کان پوءِ فوري طور پارليامينٽ ٻاهران ٽي ٽي اي پي جي ڌرڻي ۾ شامل ٿيندي.”
پوسٽ ۾ چيو ويو: “اسان قانون جي بالادستي، عوام جي آئيني حقن، آزاد ۽ شفاف چونڊن ۽ حقيقي جمهوريت تي پختو يقين رکون ٿا ۽ انهن اصولن لاءِ عوام جي جدوجهد ۾ سدائين ساڻن گڏ بيهنداسين.”
عوام پاڪستان پارٽي جي مرڪزي ترجمان ڊاڪٽر ظفر مرزا به X تي لکيو: “فوري طبي علاج کانسواءِ عمران خان جي نظر کي خطرو آهي! عوام پاڪستان تحريڪ تحفظ آئين پاڪستان جي پرامن احتجاج جو حصو آهي ۽ هو تيستائين گڏ رهندي، جيستائين کيس قانون موجب ملڻ وارو طبي علاج فراهم نه ڪيو وڃي.”
