بيجنگ(ويب ڊيسڪ) چيني صدر شي جن پنگ چيو آهي ته چين دهشتگردي خلاف جنگ ۾ پاڪستان جي حمايت ڪري ٿو.شنگھائي تعاون تنظيم (ايس سي او) جي سربراهن جي ڪائونسل جي 25 هين اجلاس ۾ شرڪت ڪرڻ کان پوءِ، وزيراعظم شهباز شريف سومر تي تيانجن کان بلٽ ٽرين ذريعي چين جي گادي واري هنڌ بيجنگ پهتو.نائب وزيراعظم ۽ پرڏيهي وزير اسحاق ڊار، منصوبابندي وارو وفاقي وزير احسن اقبال، اطلاعات وارو وفاقي وزير عطاءُ الله تارڙ ۽ وزيراعظم جو خاص مددگار طارق فاطمي به ساڻس گڏ هئا.چين جي گادي واري هنڌ بيجنگ ۾ پنهنجي رهائش دوران، وزيراعظم شهباز شريف فاشزم خلاف عالمي جنگ جي 80 هين سالگرهه جي تقريب ۾ شرڪت ڪندو.چيني سرڪاري ميڊيا موجب، وزيراعظم شهباز شريف ۽ چيني صدر شي جن پنگ جي وچ ۾ ملاقات ٿي، جنهن ۾ شهباز شريف دهشتگردي خلاف جنگ ۾ پاڪستان جي حمايت ڪرڻ تي چيني صدر جو شڪريو ادا ڪيو.ان موقعي تي چيني صدر چيو ته چين دهشتگردي خلاف جنگ ۾ پاڪستان جي حمايت ڪري ٿو.هن چيو ته کيس اميد آهي ته پاڪستان چيني اهلڪارن، منصوبن ۽ ادارن جي حفاظت کي يقيني بڻائڻ لاءِ اثرائتا قدم کڻندو.ٻئي طرف، وزيراعظم شهباز شريف چين کي ڏکڻ ايشيا ۾ جامع ڳالهين جي نگراني جي دعوت ڏني.ايس سي او اجلاس کي خطاب ڪندي شهباز شريف چيو ته چين کي پنهنجي قيادت ۾ ڏکڻ ايشيا ۾ جامع ڳالهين جو انعقاد ڪرڻ گهرجي ته جيئن اسان جلد انهن ڳالهين جا نتيجا حاصل ڪري سگهون.ان کان اڳ، وزيراعظم ڀارتي دهشتگردي کي به بي نقاب ڪيو هو.
