ڪراچي(اسٽاف رپورٽر) ميئر ڪراچي بئريسٽر مرتضيٰ وهاب چيو آهي ته پاڪستان پيپلز پارٽي جي بلدياتي حڪومت پاران شهر ۾ ترقياتي ۽ عوامي ڀلائي جي منصوبن جا مثبت اثر ظاهر ٿيڻ شروع ٿي ويا آهن. شهرين کي بنيادي ۽ سماجي سهولتون فراهم ڪرڻ ڪراچي ميٽروپوليٽن ڪارپوريشن (KMC) جي اولين ترجيح آهي، ۽ ان مقصد تحت شهر جي مختلف علائقن ۾ عوامي ڀلائي جا منصوبا مڪمل ڪيا پيا وڃن ته جيئن ماڻهن جي زندگيءَ جو معيار بهتر بڻائي سگهجي. هن انهن خيالن جو اظهار خميس ڏينهن بلديه ٽائون ۾ هڪ جديد ڪميونٽي سينٽر جي افتتاح جي موقعي تي ميڊيا جي نمائندن سان ڳالهائيندي ڪيو.ان موقعي تي سنڌ اسيمبلي جي ميمبر آصف موسيٰ، بلديه ٽائون جي چيئرمين ڪريم آسڪاڻي، چونڊيل بلدياتي نمائندا، لاڳاپيل آفيسر، پارٽي ڪارڪن ۽ علائقي جي معززن جو وڏو انگ پڻ موجود هو. افتتاح کان پوءِ ميئر ڪراچي ڪميونٽي سينٽر جي مختلف حصن جو معائنو ڪيو ۽ اتي فراهم ڪيل سهولتن جو جائزو ورتو.ان موقعي تي خطاب ڪندي ميئر ڪراچي بئريسٽر مرتضيٰ وهاب چيو ته ماضي ۾ شهرين لاءِ سماجي تقريبون، تعليمي پروگرام ۽ ٻين عوامي سرگرمين جي انعقاد لاءِ مناسب سهولتون موجود نه هيون، پر موجوده بلدياتي قيادت ان کوٽ کي پورو ڪرڻ لاءِ مختلف ٽائونن ۽ يونين ڪائونسلن ۾ جديد ڪميونٽي سينٽر قائم ڪري رهي آهي.ميئر ڪراچي چيو ته شهرين کي وڌيڪ سماجي سهولتون فراهم ڪرڻ بلديه عظميٰ ڪراچي جي ويزن جو اهم حصو آهي. هن چيو ته هڪ صحتمند، مهذب ۽ مضبوط سماج جي قيام لاءِ اهڙيون عوامي سهولتون انتهائي ضروري آهن، جتي ماڻهو باهمي ميل جول، ثقافتي ۽ سماجي سرگرمين ۾ ڀرپور نموني حصو وٺي سگهن. هن يقين ڏياريو ته شهر جي مختلف علائقن ۾ اهڙي نوعيت جا وڌيڪ منصوبا جلد شروع ڪيا ويندا.ان موقعي تي ميئر ڪراچي ڊي جي ٽيڪنيڪل سروسز، KMC کي هدايت ڪئي ته شهر ۾ وڌيڪ ڪميونٽي سينٽر قائم ڪرڻ بابت جامع رٿابندي ۽ قابلِ عمل تجويزون تيار ڪيون وڃن، جيئن ضرورت موجب نوان مرڪز قائم ڪري سگهجن. هن چيو ته رٿابندي دوران آبادي، مقامي ضرورتن ۽ سرڪاري زمين جي دستيابي کي نظر ۾ رکيو وڃي ته جيئن وڌ کان وڌ شهري انهن سهولتن مان فائدو حاصل ڪري سگهن.هن وڌيڪ چيو ته بلديه عظميٰ ڪراچي عوامي خدمت جي سفر کي وڌيڪ تيز ڪندي ۽ ترقياتي منصوبن سان گڏ سماجي ڀلائي جي قدمن تي پڻ خاص ڌيان ڏنو ويندو. شهرين کي معياري شهري سهولتون فراهم ڪرڻ، تفريحي ۽ سماجي ڍانچي کي بهتر بڻائڻ ۽ عوامي مسئلن جو مستقل بنيادن تي حل ڪڍڻ لاءِ سڀئي موجود وسيلا استعمال ڪيا ويندا.بعد ۾ ميئر ڪراچي علائقي جي شهرين ۽ چونڊيل نمائندن سان پڻ ملاقات ڪئي ۽ علائقي جي مسئلن، ترقياتي ضرورتن ۽ مستقبل جي منصوبن بابت خيال ونڊيا. هن لاڳاپيل آفيسرن کي هدايت ڪئي ته عوامي شڪايتن جو ترت ازالو ۽ جاري ترقياتي منصوبن جي بروقت تڪميل هر صورت ۾ يقيني بڻائي وڃي، جيئن شهرين کي بهتر بلدياتي خدمتون فراهم ڪري سگهجن.
