لاهور (پ ر) انجنيئر الطاف حسين نيشنل گرڊ ڪمپني آف پاڪستان لميٽيڊ (اين جي سي) جي مينيجنگ ڊائريڪٽر طور عهدو سنڀالي ورتو آهي. ڪمپني جي ترجمان پاران جاري ڪيل بيان ۾ ٻڌايو ويو آهي ته الطاف حسين وٽ بجلي جي ترسيل ۽ تقسيم جي شعبي ۾ ٽن ڏهاڪن کان وڌيڪ بين الاقوامي تجربو آهي. هن پنهنجي ڪيريئر جي شروعات 1987ع ۾ واٽر اينڊ پاور ڊولپمينٽ اٿارٽي (واپڊا) مان ڪيو، جتي هن ڏهه سالن کان وڌيڪ خدمتون سرانجام ڏنيون. بعد ۾هو ڪينيڊا منتقل ٿيو، جتي هن پاور سيڪٽر ۾ 27 سال گذاريا. ھن وقت تائين هو ڪينيڊا جي وڏي برقي اداري بي سي هائيڊرو ۾ ڊائريڪٽر آف ايسٽ اسٽريٽجي اينڊ پلاننگ طور ڪم ڪري رهيو هو، جتي هن گرڊ سسٽم جي مضبوطي ۽ بجلي جي ترسيل ۾ بهتري لاءِ اهم منصوبا سرانجام ڏنا. بين الاقوامي ڪيريئر دوران به هو پاڪستان جي توانائي واري شعبي ۾ پنهنجو حصو ڏيڻ جي عزم تي قائم رهيو. مينيجنگ ڊائريڪٽر جي تقرري ان اھم وقت عمل ۾ آئي آهي جڏهن اين جي سي حڪومت جي سڌارن واري پروگرام تحت اڳوڻي نيم نيشنل ٽرانسميشن اينڊ ڊسپيچ ڪمپني (اين ٽي ڊي سي) مان نئين ڍانچي ڏانهن منتقلي جي مرحلي ۾ آهي. هن اصلاحاتي عمل هيٺ اين جي سي کي قومي ترسيلي خدمتن جي ڪمپني طور قائم ڪيو ويو آهي، جڏهن ته ٻه نوان ادارا به تشڪيل ڏنا ويا آهن: انڊيپنڊنٽ سسٽم اينڊ مارڪيٽ آپريٽر (آءِ ايس ايم او) ۽ انرجي انفراسٽرڪچر ڊولپمينٽ اينڊ مينيجمينٽ ڪمپني (اي آءِ ڊي ايم سي). انهن سڌارن جو مقصد شفافيت، ڪارڪردگي ۽ پاور سيڪٽر جي مجموعي بهتري آهي. عهدو سنڀالڻ بعد، مسٽر الطاف حسين ڊپٽي مينيجنگ ڊائريڪٽرز، جنرل مينيجرز، سي- سوٽ آفيسرز، چيف انجنيئرز ۽ مينيجرز سان آن لائن خطاب ڪيو، جتي هن اين جي سي کي جديد ۽ ترقي پسند اداري ۾ تبديل ڪرڻ لاءِ پنهنجي وِزن جو خاڪو پيش ڪيو. هن ٽيم ورڪ، نون ٽيڪنالاجيز جي اپنائڻ ۽ هر سطح تي واضح رابطا برقرار رکڻ جي اهميت تي زور ڏنو۔ هن اداري ۾ صلاحيتن جي وڌايل ترقي لاءِ مانيٽرنگ ۽ ڪوچنگ کي ضروري قرار ڏنو ۽ چيو ته اين جي سي کي جدت تي ٻڌل اداري طور اڳتي وڌايو ويندو، جتي عالمي بهترين طريقا ۽ جديد ٽرانسميشن مينيجمينٽ اپروچز اختيار ڪيون وينديون. هن اميد ظاهر ڪئي ته اين جي سي جون ٽيمون ملڪ جي بجلي جي ضرورتن ۽ اقتصادي ترقي جي حمايت لاءِ مقرر هدف بروقت حاصل ڪنديون. مينيجنگ ڊائريڪٽر طور، الطاف حسين اين جي سي جي ترسيلي نيٽ ورڪ ۽ آپريشنز جي بهتري لاءِ ڪمن جي نگراني ڪندو. هو سسٽم ۽ مارڪيٽ آپريشنز بابت آءِ ايس ايم او سان گڏجي ڪم ڪندو، جڏهن ته ڊولپمينٽ منصوبن ۾ اي آءِ ڊي ايم سي سان پڻ ويجهو سهڪار ڪندو.
