ڪوئيٽا: (ويب ڊيسڪ) بلوچستان جي وڏي وزير جي سياسي ۽ ميڊيا معاملن جي مددگار شاهد رند چيو آهي ته 13 مئي کان بلوچستان جي منگلا زرغون گهر علائقي ۾ سيڪيورٽي فورسز پاران انٽيليجنس تي ٻڌل آپريشن دوران فتنہ الھندوستان سان تعلق رکندڙ 35 کان وڌيڪ شدت پسند مارجي ويا آهن.پاڪستاني حڪومت فتنہ الھندوستان کي هندستان جي حمايت يافته شدت پسندن لاءِ استعمال ڪري ٿي. هي آپريشن اهڙي وقت ۾ ڪيو ويو جڏهن گذريل ڪجهه ڏينهن ۾ صوبي ۾ دهشتگردي جا ڪيترائي واقعا پيش آيا آهن.دالبندين، تربت، نوشڪي ۽ مستونگ شهرن ۾ فائرنگ، حملن ۽ ڀڃ ڊاهه جي مختلف واقعن ۾ هڪ ليڊي پوليس ڪانسٽيبل ۽ براهوي ٻولي جي اسسٽنٽ پروفيسر پنهنجيون جانيون وڃائي ڇڏيون، جڏهن ته ڪيترائي ماڻهو زخمي ٿيا.بلوچستان جي وڏي وزير جي مددگار شاهد رند چيو آهي ته آپريشن دوران دهشتگردن جا ڪيترائي ڪئمپ ۽ لڪيل هنڌ پڻ تباهه ڪيا ويا، جنهن سان انهن جي نيٽ ورڪ کي سخت نقصان پهتو.هن چيو ته آپريشن دوران فتنہ الھندوستان جي ٽن اهم ڪمانڊرن کي به گرفتار ڪيو ويو، جن کان اهم معلومات حاصل ڪئي وئي، ۽ ان معلومات جي بنياد تي وڌيڪ ڪارروائيون جاري آهن.شاهد رند چيو ته دهشتگرد تنظيم جي سهولتڪارن ۽ پٺڀرائي ڪندڙن کي به تنگ ڪيو پيو وڃي ۽ پاڪستان جي رياست دهشتگردي جي مڪمل خاتمي تائين پنهنجون ڪارروائيون جاري رکندي.بلوچستان ۽ ملڪ جي امن ۽ استحڪام لاءِ هن آپريشن کي ناگزير قرار ڏيندي، هن عوام کي اپيل ڪئي ته سيڪيورٽي فورسز سان مڪمل تعاون ڪن ۽ شڪي عنصرن جي سڃاڻپ ڪن.هن پنهنجي عزم کي ورجايو ته دهشتگردن ۽ انهن جي پرڏيهي آقائن جي ناپاڪ ارادن کي هر قيمت تي ناڪام بڻايو ويندو.اهو ياد رکڻ گهرجي ته برطانيه، آسٽريليا، پاڪستان ۽ آمريڪا سميت ڪيترن ئي ملڪن بي ايل اي کي دهشتگرد تنظيم قرار ڏنو آهي، جنهن جي حملن ۾ 2011 کان وٺي هزارين ماڻهو مارجي چڪا آهن ۽ ان چيني مفادن کي به نشانو بڻايو آهي.
