ڪراچي(ايڊيٽر ڊيسڪ)فٽبال جي ڪنهن نتيجي کي “فٽبال جي فتح” قرار ڏيڻ شايد هڪ عام ۽ گهڻو استعمال ٿيندڙ جملو لڳي، پر 2026ع جي ورلڊ ڪپ فائنل ۾ اسپين جي ڪاميابي بابت شايد ئي ڪو غيرجانبدار مداح هن راءِ سان اختلاف ڪري.
جڏهن فيران ٽورس اضافي وقت ۾ فاتحانه گول ڪيو ۽ ڪپتان روڊري نيو جرسي ۾ ٽرافي مٿي کڻي جشن ملهايو، تڏهن شايد ئي ڪنهن کي ارجنٽينا لاءِ همدردي محسوس ٿي هجي. حيران ڪندڙ ڳالهه اها آهي ته فٽبال جي اڪثر ماهرن، اڳوڻن رانديگرن ۽ ’اوپٽا‘ به اسپين کي فيورٽ قرار ڏنو هو، جيڪو سچ ثابت ٿيو.
اسپين جي رانديگرن ۽ ناظرين ٻنهي لاءِ برداشت جي هن جنگ ۾ ارجنٽينا کي شڪست ڏئي مردن جي ورلڊ ڪپ جو پنهنجو ٻيون عالمي ٽائيٽل کٽي ورتو. فٽبال جي هر انگ اکر موجب، ۽ ڪجهه ماڻهن جي نظر ۾ اخلاقي لحاظ کان به، اهو ئي صحيح نتيجو هو.
اڳوڻي انگلينڊ جي ڪپتان ايلن شيئرر بي بي سي ون تي چيو: “ان ۾ ڪو شڪ ناهي ته صحيح ٽيم ئي ڪپ کٽيو. شروعات کان آخر تائين اسپين بال تي ڪنٽرول رکيو. اهي ئي هئا جيڪي فٽبال کيڏي رهيا هئا، موقعا پيدا ڪري رهيا هئا ۽ دفاع جي پٺيان جاءِ ڳولي رهيا هئا.
هي نتيجو فٽبال لاءِ فتح آهي، ڇو ته اسپين جنهن انداز ۾ کيڏيو، اهو تعريف جوڳو هو. اسپين هن ڪاميابي جو مڪمل حقدار هو.” اسپين وٽ 65 سيڪڙو بال تي قبضي جو تناسب رهيو، متوقع گولن (xG) جو انگ 1.94 رهيو، جڏهن ته ٽيم مجموعي طور 20 شاٽ هنيا، جن مان 11 سڌو گول ڏانهن هئا.
ٻئي پاسي اسپين جي گول ڪيپر اُنائي سائمن اٺن مان ستين ميچ ۾ ڪلين شيٽ برقرار رکي ۽ ٽورنامينٽ جي بهترين گول ڪيپر لاءِ گولڊن گلوو ايوارڊ حاصل ڪيو. اسپين 2026ع جي ورلڊ ڪپ ۾ صرف هڪ گول قبول ڪيو، جيڪو ڪنهن به عالمي چيمپيئن ٽيم طرفان سڀ کان گهٽ گول کائڻ جو رڪارڊ آهي.
هر انگ اکر ۾ اسپين جي برتري
اسپين، عالمي فٽبال جي ماپڻ ۾ ڏکئي دنيا ۾ به، واضح طور دنيا جي سڀ کان بهترين ٽيم بڻجي چڪي آهي. هو عالمي چيمپيئن، اولمپڪ چيمپيئن ۽ يورپي چيمپيئن آهن، جڏهن ته اسپين جي عورتن جي ٽيم پڻ عالمي چيمپيئن آهي. مردن جي ٽيم هاڻي سڀني مقابلن ۾ لڳاتار 38 ميچن کان ناقابلِ شڪست رهي آهي، جيڪو ڪنهن به يورپي ٽيم لاءِ تاريخ جو ڊگهو ترين سلسلو آهي.
اسپين هن ورلڊ ڪپ جي شروعات ڪيپ وردي خلاف 0-0 جي برابري سان ڪئي هئي. اهڙي طرح ٻنهي ڀيرن جڏهن اسپين عالمي ٽائيٽل کٽيو آهي، تڏهن هن افتتاحي ميچ نه کٽي آهي؛ 2010ع ۾ به هو سوئٽزرلينڊ کان 1-0 تان هارايو هو.
ورلڊ ڪپ فائنل جي تاريخ ۾ صرف ٽي ڀيرا ڪنهن رانديگر 100 يا وڌيڪ پاس مڪمل ڪيا آهن. انهن مان ٻه ڪارناما آچر تي اسپيني رانديگرن انجام ڏنا: رودري: 101 پاس ۽پائو ڪوبارسي 121 پاس. اسپين جي ڪيترن ئي نوجوان رانديگرن لاءِ شايد هي رڳو شروعات هجي.
19 ورهين جي پائو ڪوبارسي کي ٽورنامينٽ جو بهترين نوجوان رانديگر قرار ڏنو ويو، جڏهن ته سندس بارسلونا جي ساٿي لامين يامال جا بهترين سال اڃا اڳتي اچڻا آهن.
19 سال ۽ ڇهن ڏينهن جي عمر ۾ لامين يامال ورلڊ ڪپ فائنل کيڏندڙ تاريخ جو ٽيون سڀ کان نوجوان رانديگر بڻجي ويو، جنهن کان اڳ صرف برازيل جو پيلي (1958ع) ۽ اٽلي جو جيوزپي بيرگومي (1982ع) آهن. هاڻي يامال ٽيون وجوان رانديگر آهي جيڪو عالمي چيمپيئن پڻ بڻجي ويو آهي.
ارجنٽينا اسپين جي جشن کي خراب نه ڪري سگهيو
ارجنٽينا کي بين الاقوامي فٽبال ۾ اڪثر “ولن” طور پيش ڪيو ويندو آهي، خاص طور انگلينڊ جي مداحن طرفان. جيئن هنن سيمي فائنل ۾ انگلينڊ خلاف ڪيو، تيئن فائنل جي پهرين هاف ۾ به ائين لڳو ته هو پاڻ فٽبال کيڏڻ بدران مخالف جي راند روڪڻ ۾ وڌيڪ دلچسپي رکن ٿا.
لياندرو پاريڊيس ان سلسلي ۾ سڀ کان اڳيان رهيو، جڏهن ته اينزو فرنانڊيز سندس ساٿي طور ڪم ڪيو. جيتوڻيڪ ارجنٽينا جا چار رانديگر پيلو ڪارڊ ڏسي چڪا هئا، پر ڪيترن جو خيال آهي ته ٽورنامينٽ دوران ريفرين طرفان هن ٽيم سان نرم رويو اختيار ڪيو ويو.
ارجنٽينا مجموعي طور صرف 464 پاس ڪيا، جڏهن ته اسپين 852 پاس مڪمل ڪيا. پر انگلينڊ جي برعڪس، اسپين ٻئي هاف ۾ دٻاءَ هيٺ نه آيو. جيڪڏهن فيران ٽورس جي 106هين منٽ واري گول کان گهڻو اڳ ئي اسپين کٽي وڃي ها، ته به شايد ڪنهن کي شڪايت نه ٿئي ها.
ارجنٽينا جي گول ڪيپر اِميليانو مارٽينز 11 يقيني گولن جو بچاءَ ڪيو، جيڪو ورلڊ ڪپ فائنل جي تاريخ ۾ ڪنهن به گول ڪيپر جو سڀ کان وڏو انگ آهي. ٻئي پاسي دفاع ڪندڙ عالمي چيمپيئن ارجنٽينا ورلڊ ڪپ جي تاريخ جي پهرين ٽيم بڻجي وئي، جنهن فائنل جي پهرين 90 منٽن دوران هڪ به شاٽ نه هنيو. سندن پهرين ڪوشش 117هين منٽ ۾ ليونل ميسي ڪئي.
ارجنٽينا نه رڳو پنهنجو تاج وڃائي ويٺو، پر فائنل کانپوءِ پيش آيل منظرن سبب ڪيترن ماڻهن جو خيال هو ته هن ٽيم پنهنجي وقار کي به نقصان پهچايو.
“نفرت انگيز رويو”
اينزو فرنانڊيز کي پهرين احتجاج ڪرڻ تي پيلو ڪارڊ مليو ۽ پوءِ هڪ انتهائي خطرناڪ ٽيڪل سبب ٻيو پيلو ڪارڊ مليو، جنهن ۾ پائو ڪوبارسي هوا ۾ ڦري ويو.
ميچ ختم ٿيڻ کانپوءِ لياندرو پاريڊيس جو رودري، گاوي ۽ بورجا اِگليسياس ۽ سان تڪرار ٿيو، جڏهن ته سندس ساٿي ناهيل مولينا کي به هڪ اسپيني رانديگر کي مُڪو هڻندي ڏٺو ويو.
بي بي سي جي ماهر وين روني چيو: “ميچ ختم ٿيڻ کانپوءِ اهڙو رويو ڏسڻ شرمناڪ آهي. ڪنهن ٽيم کي عالمي چيمپيئن قرار ڏنو ويو آهي، ۽ اهڙي قسم جو عمل ڪنهن به صورت ۾ مناسب ناهي.”
ارجنٽينا جي ڪوچ ليونل اسڪالوني پريس ڪانفرنس دوران ڳوڙها ڳاڙيندي پنهنجي ٽيم جو دفاع ڪرڻ جي ڪوشش ڪئي، پر آخرڪار هن به تسليم ڪيو ته بهتر ٽيم کٽي وئي.
هن چيو: “جيتوڻيڪ هو 85هين منٽ تائين اسان کان بهتر کيڏي رهيا هئا، پر مان ڄاڻڻ چاهيان ها ته جيڪڏهن اسان جا 11 رانديگر ميدان ۾ هجن ها ته ڇا ٿئي ها.” هن وڌيڪ چيو: “اسان آخر تائين مقابلو ڪيو، پر حقيقت اها آهي ته اسپين فتح جو مڪمل حقدار هو.”
ارجنٽينا ميچ کي اضافي وقت تائين ته وٺي ويو، جيڪو گذريل ڇهن مان پنجين ورلڊ ڪپ فائنل ۾ ٿيو، پر اهو سندس ڪمزوري کي لڪائي نه سگهيو.
اڳوڻي انگلينڊ گول ڪيپر جو هارٽ چيو: “ارجنٽينا کي جيڪو ڪجهه ٿيو، ان بابت ڪا به شڪايت نه هئڻ گهرجي. انهن جو رويو نفرت انگيز هو.” هن وڌيڪ چيو: “شايد رودري کي سندن منهن تي وڃڻ جي ضرورت نه هئي، پر 120 منٽن تائين اشتعال انگيزي ۽ دٻاءَ کانپوءِ انسان جي ردعمل کي سمجهي سگهجي ٿو.”
