اسلام آباد (بيورو رپورٽ) وزيراعظم شهباز شريف واضح ڪيو ته پاڪستان آمريڪا ۽ ايران جي وچ ۾ ڳالهين کي اڳتي وڌائڻ ۽ خطي ۾ پائيدار امن ۽ استحڪام لاءِ پنهنجون ڪوششون جاري رکندو.جده ۾ سعودي ولي عهد سان ڊگهي ملاقات کان پوءِ وزيراعظم سماجي رابطن واري ويب سائيٽ ايڪس تي هڪ پيغام ۾ چيو ته هن سعودي ولي عهد سان ملاقات ڪئي جنهن ۾ هن باهمي دلچسپي جي معاملن ۽ خطي جي صورتحال تي تفصيلي ڳالهه ٻولهه ڪئي.وزيراعظم چيو ته هن سعودي عرب سان پاڪستان جي غير متزلزل يڪجهتي کي ورجايو ۽ مشڪل حالتن ۾ سعودي قيادت جي دانشمندانه حڪمت عملي، صبر ۽ برداشت جي تعريف ڪئي.وزيراعظم چيو ته ملاقات دوران سعودي ولي عهد کي آمريڪا ۽ ايران جي وچ ۾ جنگ بندي ۾ پاڪستان جي ڪردار ۽ اسلام آباد ۾ ٿيندڙ تاريخي امن ڳالهين جي حوالي سان تازي پيش رفت بابت پڻ آگاهه ڪيو ويو.شهباز شريف پنهنجي عزم کي به ورجايو ته پاڪستان خطي ۾ پائيدار امن کي يقيني بڻائڻ لاءِ آمريڪا ۽ ايران جي وچ ۾ پائيدار امن معاهدي لاءِ پنهنجون ڪوششون جاري رکندو.وزيراعظم پاڪستان جي امن ڪوششن لاءِ سعودي ولي عهد جي حمايت لاءِ شڪرگذاري جو اظهار ڪيو. وزيراعظم ۽ سعودي ولي عهد جي وچ ۾ ملاقات جو بيان جاري ڪيو ويو آهي.وزيراعظم آفيس پاران جاري ڪيل بيان موجب، جده ۾ وزيراعظم ۽ سعودي ولي عهد جي وچ ۾ ملاقات تقريبن ٻن ڪلاڪن تائين جاري رهي، جنهن دوران ٻنهي اڳواڻن علائقائي صورتحال تي تفصيلي بحث ڪيو.بيان ۾ چيو ويو آهي ته وزيراعظم علائقائي تڪرار جي تناظر ۾ سعودي عرب لاءِ يڪجهتي ۽ حمايت جو ورجاءُ ڪيو. وزيراعظم تازي صورتحال ۾ سعودي عرب پاران ڏيکاريل مثالي صبر ۽ تحمل جي تعريف ڪئي.وزيراعظم چيو ته پاڪستان جا ماڻهو پنهنجي سعودي ڀائرن سان گڏ بيٺا آهن، ۽ سعودي قيادت سعودي عرب سميت سڀني امن پسند ماڻهن لاءِ هڪ مثال آهي.بيان موجب، سعودي ولي عهد امن عمل ۾ وزيراعظم ۽ فيلڊ مارشل جي تعميري ڪردار جي تعريف ڪئي. وزيراعظم پاڪستان جي معاشي استحڪام لاءِ سعودي عرب جي مسلسل حمايت جي تعريف ڪئي.ملاقات ۾، ٻنهي اڳواڻن دفاع ۽ سيڪيورٽي جي شعبن ۾ ويجهي تعاون کي وڌيڪ مضبوط ڪرڻ ۽ ڊگهي عرصي تائين هلندڙ ڀائيواري کي فروغ ڏيڻ جي عزم کي به ورجايو.
