اسلام آباد(بيورو رپورٽ) سپريم ڪورٽ جي آئيني بينچ جسٽس منصور علي شاهه جي 13 ۽ 16 جنوري جي فيصلن کي واپس وٺي ڇڏيو آهي.جسٽس امين الدين جي سربراهي ۾ سپريم ڪورٽ جي آئيني بينچ ڪسٽم ريگيوليٽر ڊيوٽي ڪيس جي ٻڌڻي ڪئي، جنهن دوران لاڳاپيل آفيسر ۽ وڪيل عدالت ۾ پيش ٿيا.ٻڌڻي دوران جسٽس امين الدين چيو ته 13 جنوري تي حڪم ڏنو ويو هو ته ٻڌڻي 27 جنوري تي ٿيندي، پوءِ اوچتو ٻڌڻي ٻئي ڏينهن ڪيئن مقرر ڪئي وئي؟جسٽس جمال مندوخيل چيو ته جيڪڏهن 3 رڪني بينچ جو ڪو جج انحراف ڪري ته ڇا اهو جج حڪم ڏئي سگهي ٿو ته ڪيس کي مخصوص بينچ آڏو رکيو وڃي؟ جسٽس حسن اظهر چيو ته ڇا ساڳئي جج کي بينچ ٻيهر جوڙڻ جو اختيار هو؟ جسٽس نعيم افغان وڪيل بئريسٽر صلاح الدين کي چيو ته اسان سمجهون ٿا ته توهان سڄي تڪرار جا ذميوار آهيو. جسٽس مظهر چيو ته عدالتي حڪم موجب، توهان اصرار ڪيو ته باقاعده بينچ ڪيس جي ٻڌڻي ڪري سگهي ٿي،جسٽس مندوخيل بئريسٽر صلاح الدين کان پڇيو، “ڇا توهان کي اسان ججن تي اعتبار ناهي؟” جيڪڏهن مان نااهل آهيان يا قانون کي نٿو سمجهان ته مون کي ٻڌايو. جيڪڏهن ڪنهن کي نئون نظام پسند نه آهي ته اها الڳ ڳالهه آهي. جسٽس مظهر چيو ته 16 جنوري جي حڪم ۾ چيو ويو هو ته ڪيس کي ٻڌو سمجهيو وڃي، ڪيس ٻڌو هجي ها يا نه، ان کي ٻڌو سمجهيو وڃي ها، هي اصطلاح ڪٿان آيو؟ مون کي سمجهه ۾ نٿو اچي ته اٽارني جنرل کي قاعدي 27A تحت نوٽيس ڏيڻ کان سواءِ ڪيس کي ڪيئن ٻڌو وڃي ٿو. ان تي اٽارني جنرل چيو ته هن وٽ 13 جنوري تي ٻه حڪم آهن. پهرين حڪم ۾ چيو ويو آهي ته ڪيس جي ايندڙ ٻڌڻي 27 جنوري تي آهي. ٻئي حڪم ۾ چيو ويو آهي ته ڪيس جي ايندڙ تاريخ 16 جنوري آهي.جسٽس مندوخيل چيو ته غير قانوني ڪم نه ڪريو، صحيح طريقي سان ڪم ڪريو. ڇا اسان باقاعده بينچ کي توهين عدالت جو نوٽيس جاري ڪيو؟ اسان صرف ڪيس ٻڌو آهي.جسٽس نعيم افغان چيو ته ڪيس کي ڪالهه جي فيصلي ۾ بيان ڪيل ساڳئي بينچ ۾ ٻڌڻي لاءِ مقرر ڪيو وڃي. فيصلي ۾ ججن جا نالا به لکيل آهن. اهو صحيح آهي يا غلط، اهو عدالتي حڪم آهي. ڇا اسان هتي ڪيس ٻڌي سگهون ٿا؟ ٻڌڻي کان پوءِ، آئيني بينچ جسٽس منصور علي شاهه جي 13 ۽ 16 جنوري جي فيصلن کي واپس وٺي ڇڏيو، جڏهن ته آئيني بينچ نذر عباس توهين عدالت ڪيس جي رڪارڊ کي ڪسٽم ڊيوٽي ڪيس سان ڳنڍڻ جو به حڪم ڏنو.بعد ۾، سپريم ڪورٽ جي آئيني بينچ ڪسٽم ريگيوليٽري ڊيوٽي ڪيس جي ٻڌڻي غير معینہ مدت تائين ملتوي ڪري ڇڏي.
