ڪولهين جي جلوس تي پوليس تشدد، بلاول پاران جاچ جو حڪم

ڪراچي (اسٽاف رپورٽر) پيپلز پارٽي جي چيئرمين بلاول ڀٽو زرداري عمرڪوٽ ۾ احتجاج دوران ڪولهي برادري جي مردن، عورتن ۽ ٻارن تي پوليس تشدد جو نوٽيس ورتو آهي. بلاول ڀٽو سنڌ سرڪار کي معاملي جي فوري جاچ ڪرائي ذميوارن خلاف ڪارروائي جي هدايت ڪئي آهي. جاري ڪيل بيان ۾ بلاول ڀٽو چيو آهي ته پُرامن احتجاج سڀني جو هق آهي ۽ ان تي پوليس جي تشدد کي برداشت نه ڪيو ويندو. هوڏانهن عمرڪوٽ مان نمائندي موجب پوليس جي زيادتين خلاف ڪولهي برادري جي ماڻهن پرامن اهتجاج ڪيو ته پوليس مٿن ڪڙڪي پئي، چڪرين ۽ شيلنگ ۾ عورت سوڌو 2 ڄڻا زخمي ٿي پيا، جڏهن ته پوليس اهلڪار 5 مظاهرين کي کنڀي کڻي ويا. ڳوٺ فضل چوهاڻ واسي ڪولهي برادري جي ماڻهن چوهاڻ برادري جي بااثرن جي زيادتين خلاف عمرڪوٽ ۾ مظاهرو ڪيو. الله والا چوڪ تي ڌرڻي دوران ڊي ايس پي سٽي ۽ ايس ايڇ او جي اڳواڻيءَ ۾ پوليس نفري پهتي، پوليس پُرامن مظاهرين جو مسئلو ٻڌڻ بدران مٿن لٺيون وسائڻ شروع ڪيون. جنهن کانپوءِ مظاهرين ۽ پوليس ۾ چڪريون ٿيون. مظاهرين پوليس جي گاڏيءَ تي پٿراءُ به ڪيو. پوليس مظاهرين تي شيلنگ ڪئي، جنهن جي نتيجي ۾ پيرسن عورت سوڌو 2 ڄڻا زخمي ٿي پيا، ان کانسواءِ پوليس اهلڪار 5 ڄڻن کي کنڀي ويا. جنهن تي ڪولهي برادري جي سوين ماڻهن  پوليس خلاف ڌرڻو هنيو.

پهنجو تبصرو موڪليو