تهران (ويب ڊيسڪ) ايران جي پاسداران انقلاب حڪومت مخالف مظاهرين کي خبردار ڪيو آهي ته جيڪڏهن پيٽرول جي قيمتن ۾ اضافي تي بدامني ختم نه ٿي ته مظاهرين خلاف سخت ڪارروائي ڪئي ويندي. رپورٽ مطابق پيٽرول جي قيمتن ۾ اضافي بعد احتجاج سڄي ملڪ ۾ ڦهلجي ويو آهي ۽ مظاهرين مطالبو ڪيو آهي ته علمائن تي مشتمل اڳواڻ اقتدار ڇڏي ڏين. ايران جي سرڪاري ٽي وي مطابق مڇريل مظاهرين گهٽ ۾ گهٽ 100 بينڪن ۽ ڪيترن ئي درجن عمارتن ۽ گاڏين کي باهيون ڏئي ساڙي ڇڏيو آهي. پاسداران انقلاب جي اهم عهديدار چيو آهي ته جيڪڏهن ضروري سمجهيو ويو ته انهن ماڻهن خلاف فيصلا ڪن ۽ انقلابي ڪارروائي ڪنداسين جيڪي شهرين جي امن ۽ سلامتي لاءِ خطرو بڻجي ويا آهن. ٻئي طرف ايران جي صدر حسن روحاني چيو آهي ته پيٽرول جي قيمتن ۾ اضافي جو مقصد سال ۾ تقريبن 2 ارب 55 ڪروڙ ڊالر اضافي سبسڊي حاصل ڪرڻ هيو. واضح رهي ته گذريل ڏينهن ايران اندر پيٽرول جي قيمتن ۾ اضافي خلاف هلندڙ احتجاج ۽ ڌرڻن دوران سيڪيورٽي فورسز ۽ پوليس اهلڪارن سميت ڪيترائي ماڻهو مارجي ويا هئا جڏهن ته هزارن کان وڌيڪ فسادين کي گرفتار ڪيو ويو هو.
