اسلام آباد (بيورو پورٽ) قومي احتساب بيورو يعني نيب مسلم ليگي اڳواڻ احسن اقبال کي اڱاري تي جسٽس محمد بشير جي عدالت ۾ پيش ڪري 14 ڏينهن جو جسماني رمانڊ گهريو. احسن اقبال جي وڪيل مخالفت ڪئي. نيب جي وڪيل چيو ته اهم دستاويز هن کان حاصل ڪرڻا آهن ان ڪري رمانڊ ضروري آهي. عدالت 13 ڏينهن جي جسماني رمانڊ جي منظوري ڏيندي 6 جنوري تي کيس پيش ڪرڻ جو حڪم ڏنو. عدالت ۾ راجه ظفرالحق، مريم اورنگزيب ۽ ٻيا عدالت ۾ موجود هئا. احسن اقبال صحافين سان مختصر ڳالهه ٻولهه ۾ چيو ته حيرت آهي ته اڍائي ارب جي پروجيڪٽ ۾ 6 ارب جي ڪرپشن ڪيئن ٿي؟. هن چيو ته کيس عمران خان جي نا اهلي تي تنقيد سبب گرفتار ڪيو ويو آهي. ياد رهي ته نيب نارووال اسپورٽس ڪمپليڪس ڪيس ۾ کيس ڪالهه گرفتار ڪري ورتو هو. نيب جو چوڻ آهي ته هن پروجيڪٽ ۾ ناقص مٽيريل استعمال ٿيو آهي ۽ ٺيڪن ۾ بي ضابطگين ۽ مبينه ڪرپشن سبب کيس گرفتار ڪيو ويو آهي. اڄ سومر تي نيب کيس پڇا ڳاڇا لاءِ طلب ڪيو هو جنهن بعد کيس گهرائي گرفتار ڪيو ويو. مسلم ليگ (ن) جي ترجمان مريم اورنگزيب گرفتاري جي مذمت ڪندي چيو آهي ته ڪرپشن جو الزام ڪوڙو آهي اصل ۾ هن کي عمران خان کي بار بار نا اهل ڪوٺڻ تان گرفتار ڪيو ويو آهي. احسن اقبال کي ڪيترائي ڀيرا روڪيو ويو ته هٿ هلڪو رک پر هو پنهنجي اصولن تي قائم رهيو جنهن سبب گرفتار ڪيو ويو.
