اسلام آباد(رپورٽ اياز مهر) ذريعن موجب آچر ڏينهن ڊاڪٽرن جي هڪ ٽيم عمران خان کي اڊيالا جيل ۾ معائنو ڪيو۽ لڳ ڀڳ هڪ ڪلاڪ بعد جيل مان رواني ٿي وئي، جڏهن ته پي ٽي آءِ خاندان ۽ ذاتي ڊاڪٽرن جي موجودگي کانسواءِ ڪيل هن معائني کي “بدنيتي تي ٻڌل” قرار ڏئي رد ڪري ڇڏيو۔
12 فيبروري تي، راولپنڊي جي اڊيالا جيل ۾ قيد عمران خان دعويٰ ڪئي هئي ته سندس ساڄي اک ۾ رڳو 15 سيڪڙو نظر باقي رهي آهي، جنهن بعد سپريم ڪورٽ طبي ٽيم جوڙي کيس جاچڻ جو حڪم ڏنو هو۔ سپريم ڪورٽ پڻ هدايت ڪئي هئي ته عمران کي پنهنجن ٻارن سان ڳالهائڻ جي اجازت ڏني وڃي۔ حڪم ڏنو ويو هو ته اکين جي جاچ ۽ فون ڪالون 16 فيبروري (سومر) کان اڳ مڪمل ڪيون وڃن۔
ڇنڇر ڏينهن سرڪاري ذريعن اشارو ڏنو هو ته عمران کي جلد اسپتال منتقل ڪيو ويندو، پر آچر منجهند تائين اهڙي ڪا پيش رفت نه ٿي هئي۔
بهرحال، شام 3:45 وڳي عمران جي ڀيڻ نورين خانم ايڪس تي لکيو ته “خان صاحب کي اسپتال منتقل ڪرڻ لاءِ ايمبولينس اڊيالا جيل پهچي وئي آهي”۔
هن وڌيڪ چيو، “پر اسان ۽ خان صاحب جي ذاتي ڊاڪٽرن کي اعتماد ۾ وٺڻ کانسواءِ اهو قدم اسان لاءِ ناقابل قبول آهي”۔
ذريعن موجب، اڊيالا جيل جي سپرنٽنڊنٽ ان خبر کي “افواهه” قرار ڏيندي چيو ته عمران جو معائنو ڪيو پيو وڃي، کيس هن وقت ڪٿي به منتقل نه پيو ڪيو وڃي۔
سندس چوڻ موجب، “طبي ٽيم عمران جي اکين جو معائنو ڪندي، مختلف ٽيسٽون ڪندي، ۽ پوءِ فيصلو ڪندي ته کيس اسپتال منتقل ڪرڻ ضروري آهي يا هو جيل ۾ رهي هتي ئي علاج جاري رکي سگهجي ٿو”۔
شام لڳ ڀڳ 5:30 وڳي ذريعن ٻڌايو ته پنج ڊاڪٽرن تي مشتمل ٽيم اکين جي جاچ مڪمل ڪري ورتي آهي۔ “تفصيلي اکين جو معائنو ۽ رت جا نمونا ورتا ويا، جڏهن ته بلڊ پريشر پڻ چيڪ ڪيو ويو”۔
ذريعن وڌيڪ چيو ته “سينيئر ڊاڪٽرن لڳ ڀڳ هڪ ڪلاڪ تائين طبي معائنو جاري رکيو”، جڏهن ته ٽيم کي جاچ شروع ڪرڻ کان اڳ اڍائي ڪلاڪ انتظار ڪرڻو پيو۔
هنن ٻڌايو ته ٽيم پاڻ سان اکين جي جاچ وارو سامان آندو هو ۽ سندن رپورٽ “جلد تيار ٿيڻ جو امڪان آهي”۔
24 جنوري جي رات عمران اسلام آباد جي پمز اسپتال ۾ هڪ طبي عمل مان گذريو هو—جنهن جي تصديق ڪجهه ڏينهن پوءِ ٿي هئي، جڏهن ته خاندان کي شروعاتي طور ڄاڻ نه هئي۔
ٻئي پاسي، اکين جي جاچ مڪمل ٿيڻ کان ٿوري دير پوءِ پي ٽي آءِ هن معائني کي رد ڪندي چيو ته پي ٽي آءِ خاندان ۽ عمران جي ذاتي ڊاڪٽرن جي موجودگي کانسواءِ حڪومت جو موقف “بدنيتي تي ٻڌل” سمجهيو ويندو۔
پي ٽي آءِ ايڪس تي پنهنجي بيان ۾ چيو ته، “پاڪستان تحريڪ انصاف اڊيالا جيل ۾ اڳوڻي وزيراعظم عمران خان جي اک جي طبي جاچ بابت حڪومت ۽ جيل انتظاميا جي تازي روئي کي واضح طور رد ڪري ٿي۔ حڪومت جو اهو دعويٰ ته جاچ وقت پارٽي قيادت کي جيل پهچڻ جو پيغام موڪليو ويو هو، اصل مسئلي تان ڌيان هٽائڻ جي هڪ ڀڏي ڪوشش آهي”۔
بيان ۾ وڌيڪ چيو ويو، “هي معاملو پارٽي قيادت جي موجودگي يا غيرموجودگي جو ڪڏهن به نه هو۔ اهڙن حساس طبي معاملن ۾ آئيني، اخلاقي ۽ قانوني حق عمران خان جي خاندان کي حاصل آهي۔
۽ خاندان تڏهن تائين باخبر فيصلو نٿو ڪري سگهي، جيستائين عمران خان جا ذاتي ڊاڪٽر معائني دوران موجود نه هجن۔ تنهنڪري رڳو علامتي طور پارٽي قيادت کي سڏڻ نه اخلاقي طور درست آهي ۽ نه ئي قانوني جواز رکي ٿو”۔
عليمه خان جو مطالبو
ان کان اڳ، عمران جي ڀيڻ عليمه خانم چيو ته پارٽي اهڙو ڪو به ميڊيڪل بورڊ قبول نه ڪندي، جيڪو پي ٽي آءِ باني جي ذاتي ڊاڪٽرن جي منظوري کانسواءِ ٺاهيو وڃي۔
عليمه ڇنڇر ڏينهن پارلياماني معاملن واري وزير طارق فضل چوڌري جي بيان جو حوالو ڏيندي چيو ته ميڊيڪل بورڊ قائم ڪرڻ جو اعلان ڪيو ويو هو۔ هن وڌيڪ چيو، “ٻيو ته اسان خبرن ۾ ٻڌي رهيا آهيون ته عمران خان کي راولپنڊي جي الشفا آئي هاسپيٽل منتقل ڪيو ويندو”۔
