ننگرپارڪر: (رپورٽر) ننگرپارڪر ۾ ايس ٽي پي جو ڪارونجهر بچايو جلسو، ڊاڪٽر قادر مگسي جي شرڪت، گلن جي ورکا، ڪارونجهر جي نيلامي خلاف نعرا.ايس ٽي پي جي چيئرمين ڊاڪٽر قادر مگسي چيو آهي ته ڪارونجهر کي ڪوري ٽڪرا ٽڪرا ڪرڻ ۾ هنن پيپلن جو هٿ آهي، هي چاهين ٿا ته وسيلا تين وال ڪري ڇڏجن، دنيا ۾ جيڪي به جنگين دوران ڪي عمارتون بچيل آهن ته اتي جا حڪمران اُنهن کي بچائي نمائيش طور رکيو ويٺا آهن ۽ ماڻهن کي تاريخ ٻڌائيندا آهن پر هتان جا حڪمران اُنهن شين کي محفوظ بڻائڻ بدران ويتر وڪڻي پنهنجا ڀڀ ڀرڻ ۾ پورا آهن. هن چيو ته ڪينجهر ۽ ڪارونجهر تي قبضي جي ڪوشش ڪري سنڌ جي وسيلن کي کائي کپائي رهيو آهي، اسان سنڌ جا وسيلا بچائڻ لاءِ نڪتا آهيون، عوام ساٿ ڏي ته هنن ڪرپٽ حڪمرانن جون نااهليون ظاهر ڪجن، ايندڙ اليڪشن ۾ عوام هنن کان ڪارونجهر کپائڻ جو پڇاڻو ڪري، چورن کي ڪنهن به ريت بخش نه ڪرڻ گهرجي. ميڊيا سان ڳالهائيندي ڊاڪٽر قادر مگسي چيو ته ٿرڪول منصوبن مان بجلي پيداور باوجود هتان جي ماڻهن کي ٽڪي جو به رليف ناهي ملي سگهيو، ٿرواسي روزگار لاءِ دربدر آهن ۽ خودڪشيون ڪرڻ تي مجبور آهن. هن وڌيڪ چيو ته ڪارونجهر ڪروڙين سنڌين جو آهي، نيلامي جا خواب ڏسندڙ پنهنجي حدن ۾ رهن، اکيون ڪڍي ڇڏينداسين، سنڌ وڪڻي ڇڏي آهي هاڻي هو ڪارونجهر وڪڻڻ چاهين ٿا، اسان ٻُڌائڻ ٿا چاهيون ته ڪارونجهر اسان جي سڃاڻپ ۽ ثقافت آهي، جنهن ڏانهن ميري اک کڻي ڏسندڙن جون اکيون ڪڍي ڇڏبيون، کيرٿر ۽ ڪاڇو ڪوهستان بحريا ٽائون حوالي ڪيا ويا آهن. جلسي کي ايس ٽي پي جي اڳواڻ شاهنواز سيال، گهنشام مالهي، ڏيوجي ڀيل ۽ ڪارونجهر سجاڳ فورم جي اڳواڻ چاچا الهرکيو کوسو به خطاب ڪيو.
