اسلام آباد(رپورٽ اياز مهر)وفاقي گهرو وزير محسن نقوي چيو آهي ته غير قانوني ٽي ٽي پي افغان سرزمين حملن لاءِ استعمال ڪري رهي آهي، ان کي هر قيمت تي روڪڻ گهرجي. هن گڏيل قومن تي زور ڀريو ته عالمي ادارو افغانستان مان پاڪستان ٿيندڙ حملا بند ڪرائڻ ۾ پنهنجو ڪردار ادا ڪري. اهڙو اظهار هن افغانستان لاءِ گڏيل قومن جي خاص نمائندي اندريڪا رتوواٽ جي اڳواڻي ۾ وفد سان ٿيل ملاقات ۾ ڪيو. وفد ۾ گڏيل قومن جو ريزيڊنٽ ڪوآرڊينيٽر محمد يحيٰ ۽ افغانستان ۾ گڏيل قومن جي مشن جو سربراهه مالڪ سيسي به شامل هئا. گڏيل قومن جي خاص نمائندي بلوچستان ۾ دهشتگردي جي تازي واقعن جي سخت مذمت ڪئي. گهرو وزير محسن نقوي چيو آهي ته دهشتگردي عالمي مسئلو آهي، پاڪستان دهشتگردي کان سڀ کان وڌيڪ متاثر ملڪ آهي، دهشتگردي خلاف جنگ ۾ سڪيورٽي فورسز، پوليس ۽ شهرين جون قربانيون بي مثال آهن. هن چيو ته پاڪستان ڏهاڪن کان افغان پناهگيرن جي ميزباني ڪري رهيو آهي، غيرقانوني طور تي رهندڙ پرڏيهين جي واپسي مرحليوار شروع ڪئي وئي آهي، قانوني دستاويزن، ويزا ۽ غير ملڪي پرڏيهين جي خلاف ڪا به ڪارروائي نه ڪئي پئي وڃي، ڪنهن کي به پاڪستان ۾ رهڻ جي اجازت نه ٿي ڏئي سگهجي. قانوني دستاويزن موجب جلد افغان پناهگيرن جي واپسي جو ٻيو مرحلو شروع ڪيو ويندو. ٻئي طرف افغان گهرو ۽ بچاءَ واري وزارت هڪ بيان ۾ چيو آهي ته سرحد پار ڌمڪين بابت پاڪستان جي الزامن ۾ ڪا به صداقت ناهي.
