لاهور: (ويب ڊيسڪ) سموري ملڪ ۾ ايل پي جي سرڪاري قيمتن تي نه ملي سگهي، دڪاندارن جي خلاف ڪارروائين جي باوجود قيمتن ۾ گهٽتائي نه اچي سگهي، جڏهن ته ايل پي جي پمپس ضبط ڪرڻ جا خرچ به صارفين کان وصول ٿيڻ لڳا.ٻئي طرف ايل پي جي ڊسٽري بيوٽرز ايسوسيئيشن ايندڙ مهيني کان سرڪاري قمت تي وڪرو جي اميد ظاهر ڪندي دعويٰ ڪئي آهي ته حڪومت سان قيمتون طئي ڪرڻ جو فارمولا طئي ٿي ويو آهي.تفصيل موجب موسم جي تبديلي ۽ توانائي بحران سبب ايل پي جي جي استعمال ۾ اضافو ٿي رهيو آهي، جنهن سان گڏ ئي قيمتن ۾ به اضافو نظر اچي رهيو آهي. لاهور سميت ملڪ جي مختلف شهرن ۾ ايل پي جي سرڪاري قيمتن کان ڪافي وڌيڪ قيمت تي وڪرو ڪئي پئي وڃي، دڪاندارن جي خلاف ڪارروائين جي باوجود صارفين کي سرڪاري قيمت تي گيس جي فراهمي ممڪن نه ٿي سگهي.اوگرا جي انگن اکرن موجب ملڪ ۾ ايل پي جي جي 411 ڪمپنين مان صرف 45 ڪمپنين وٽ مقامي پيداوار جو ڪوٽه آهي جڏهن ته 300 کان وڌيڪ ڪمپنيون انهن ئي ڪمپنين کان ايل پي جي خريد ڪري اڳيان وڪرو ڪنديون آهن. اهڙي صورتحال سبب اوگرا ڪوٽه سسٽم ختم ڪري ٻولي جو نظام متعارف ڪرائڻ جي ڪوشش ڪري رهيو آهي.ايل پي جي ڊسٽري بيوٽرز ايسوسيئيشن جي مرڪزي اڳواڻ راڻا عبدالجبار نجي چينل سان ڳالهيون ڪندي چيو ته ايل پي جي مهانگي وڪرو ڪرڻ جا ذميوار ڊسٽري بيوٽرز نه پر پلانٽس آهن انهي جي بقول پلانٽس مان ايل پي جي تقريبن ساڍا پنج سئو روپيه في ڪلو جي حساب سان ملي رهي آهي ته انهي کي اوگرا جي مقرر ڪيل قيمتن تي ڪيئن وڪرو ڪري سگهجي ٿو.راڻا عبدالجبار جو چوڻ هو ته اوگرا جو قيمتن بابت نوٽيفڪيشن به صحيح نه آهي، انهي ۾ چرپر سميت ٻين خرچن 2016 جون مقرر ڪيل قيمتون شامل ناهن ڪيون ويون جڏهن ته گذريل 10 سالن ۾ خرچ ۾ نمايان اضافو ٿي چڪو آهي، اهوئي سبب آهي ته ايل پي جي سرڪاري قيمت تي دستياب نه آهي ۽ موجوده فارمولي جي تحت انهي جو وڪرو به ممڪن نه آهي.هن ٻڌايو ته ايسوسيئيشن حڪومت کي قيمتون طئي ڪرڻ جي لاءِ مڪمل شيڊول پيش ڪري ڇڏيو آهي جنهن تي مشاورت کان پوءِ قانوني گهرجون پوريون ڪري عملدرآمد ڪرايو ويندو. هن ٻڌايو ته ايندڙ مهيني ايل پي جي قيمت 400 کان 450 روپيه في ڪلو جي وچ ۾ مقرر ٿيڻ جي اميد آهي. ايسوسيئيشن به چاهي ٿي ته ڪمپنين جي هڪ هٽائي ختم ٿئي ۽ عوام کي سستي ايل پي جي ملي سگهي.ٻئي طرف دڪاندارن جو چوڻ آهي ته پيرا فورس سميت ٻيا ادارا اسان جا ايل پي جي پمپس کڻي ويندا آهن هڪ پمپ جي قيمت 70 کان 75 هزار روپين تائين آهي جنهن جو نقصان به مجبور ٿي ايل پي جي قيمت وڌائي صارفين کان وصول ڪيو ويندو آهي. دڪاندارن سوال اٿاريو ته ايل پي جي مافيا ۽ ڪمپنين جي خلاف ڪارروائي جي بجاءِ صرف دڪاندارن خلاف آپريشن ڇو پيو ڪيو وڃي.
