اسلام آباد(بيورو رپورٽ)دفاع واري وزير خواجه محمد آصف جو چوڻ آهي ته اسان وٽ طالبان کي واپس غارن ۾ ڌڪڻ جي صلاحيت آهي،هڪ بيان ۾ هن چيو ته پاڪستان برادر ملڪن جي درخواست تي امن ڳالهيون شروع ڪيون، افغان عملدارن جا زهر آلود بيان طالبان جي بدنيتي واري سوچ کي ظاهر ڪن ٿا،خواجه آصف جو چوڻ آهي ته پاڪستان کي پنهنجي پوري طاقت استعمال ڪرڻ جي ضرورت ناهي، جيڪڏهن هو چاهي ٿو ته تورا بورا جي شڪست جي منظرن کي ورجائي ڇڏيندو، بدقسمتي سان طالبان حڪومت افغانستان کي ٻيهر تباهي ڏانهن ڌڪي رهي آهي،وفاقي وزير چيو ته افغان طالبان صرف پنهنجي ناجائز طاقت کي برقرار رکڻ جي ڪوشش ڪري رهيا آهن، افغان طالبان جي جنگي معيشت صرف تباهي ۽ خونريزي تي ٻڌل آهي، هن چيو ته افغان طالبان پنهنجي ڪمزوري کي ڄاڻن ٿا پر جنگي نعرا لڳائي رهيا آهن، جيڪڏهن طالبان حڪومت افغانستان کي تباهه ڪرڻ چاهي ٿي ته پوءِ ان کي ٿيڻ ڏيو. ‘سلطنتن جو قبرستان’ صرف افغان عوام جي تباهي جي نشاني آهي، افغانستان هميشه سلطنتن لاءِ راند جو ميدان رهيو آهي،هن چيو ته افغان طالبان جي جنگ پسند عنصرن اسان جي همت کي غلط سمجهيو آهي. جيڪڏهن اهي وڙهڻ چاهين ٿا ته دنيا سڀ ڪجهه ڏسندي. انهن جون ڌمڪيون صرف هڪ تماشو آهن، حقيقت نه. اسان توهان جي فريب کي گهڻي وقت کان برداشت ڪيو آهي. اسان ان کي وڌيڪ برداشت نه ڪنداسين. وقت بدلجي ويو آهي.
