بيجنگ(ويب ڊيسڪ)چيني مصنوعي ذهانت (AI) ماڊلز ڊيپ سيڪ (DeepSeek) ۽ قوئن (Qwen) مغربي مقابلي وارن، چيٽ بوٽس، جن ۾ چيٽ GPT به شامل آهي، تي نمايان برتري حاصل ڪري ورتي آهي، جتي انهن صرف نَوَ ڏينهن ۾ حقيقي مارڪيٽ ۾ هلندڙ ڪرپٽو ڪرنسي ٽريڊنگ مقابلي دوران 100 سيڪڙو کان وڌيڪ منافعو حاصل ڪيو آهي. ڊيپ سيڪ جي Chat V3.1 ماڊل پنهنجي شروعاتي 10,000 آمريڪي ڊالرز جي سرمائي کي وڌائي 22,500 ڊالرز تائين پهچايو، جيڪو 125 سيڪڙو منافعو آهي، جيئن ته آمريڪي تحقيقاتي ڪمپني Nof1 جي ڪرپٽو انويسٽمينٽ پروجيڪٽ الفا ارينا (Alpha Arena) جي تازي اپڊيٽ ۾ چيو ويو آهي. هي مقابلو 18 آڪٽوبر کان شروع ٿيو هو. علي بابا گروپ جي تيار ڪيل قوئن 3 ميڪس (Qwen 3 Max) پڻ شاندار ڪارڪردگي ڏيکاري، جنهن پنهنجي اڪائونٽ جي قيمت 19,600 ڊالرز تائين ٻيڻي ڪري وڌائي، يعني 95 سيڪڙو منافعو حاصل ڪيو. سومر جي صبح تائين قوئن جا منافعا ڪجهه وقت لاءِ 100 سيڪڙو کان به مٿي هليا ويا ۽ 24 کان 26 آڪٽوبر جي وچ ۾ ڊيپ سيڪ کي به پٺتي ڇڏيو هو، پر پوءِ ٻيهر ان کان هيٺ اچي ويو. ان جي ابتڙ، اوپن اي آءِ (OpenAI) جو GPT-5 سڀ کان ڪمزور ڪارڪردگي ڏيکاري، جنهن تقريباً 60 سيڪڙو نقصان ڪيو ۽ رڳو 4,000 ڊالرز بچايا. گوگل ڊيپ مائينڊ (Google DeepMind) جو جيميني 2.5 پرو (Gemini 2.5 Pro) به ساڳي طرح 57 سيڪڙو نقصان ۾ رهيو، جڏهن ته ايلون مسڪ جي xAI جو Grok 4 ۽ Anthropic جو Claude 4.5 Sonnet ترتيبوار 13 سيڪڙو ۽ 24 سيڪڙو منافعي ۾ رهيا. هي مقابلو، جيڪو 3 نومبر تائين جاري رهندو، ڇهن مختلف AI ماڊلز جي سيڙپڪاري صلاحيتن کي آزمائي ٿو. هر ماڊل کي 10,000 ڊالرز جي شروعاتي سرمائي، ساڳيا ڊيٽا ۽ ساڳيا حڪم ناما ڏنا ويا آهن. Nof1 موجب، انهن جو مقصد اهو آهي ته “الفا ارينا کي حقيقي دنيا جهڙو بَنائجي ۽ مارڪيٽون ان لاءِ بهترين جڳهه آهن.” پهرين 9 ڏينهن دوران، چيني ماڊلز پنهنجي حڪمت عملين کي بدلائي، غير يقيني مارڪيٽ حالتن ۾ به برتري برقرار رکي. سومر جي صبح تائين، ڊيپ سيڪ V3.1 ۽ GPT-5 ٻنهي ڇهن مختلف ڪرپٽو اثاثن ۾ ڊگهيون (long) پوزيشن رکيون، جڏهن ته قوئن 3 ميڪس مڪمل طور اِيٿر (ether) ۾ سيڙپڪاري ڪئي.ڊيپ سيڪ ۽ قوئن جي پورٽ فوليو جي واڌاري جو وقت بِٽ ڪوئن (bitcoin) جي قيمت ۾ 114,000 ڊالرز تائين واپسي سان گڏ آيو، جڏهن ته اِيٿر جي قيمت پڻ لڳاتار وڌندي رهي.
