ڪراچي: (اسٽاف رپورٽر) سنڌ جي گهرو وزير ضياءُ الحسن لنجار چيو آهي ته ڪراچي ۾ هن وقت ڏوهن جي شرح ۾ نمايان گهٽتائي آئي آهي ۽ حڪومت امن امان جي قيام تي ڪنهن به قسم جو ٺاهه نه ڪندي.سنڌ اسيمبلي ۾ خيالن جو اظهار ڪندي ضياءُ الحسن لنجار چيو ته ماضي ۾ ڪراچي جي حالتن کي ڄاڻي واڻي غير يقيني بڻايو ويو.ضياءُ الحسن لنجار 1992ع ۽ 1998ع جي دورن جو حوالو ڏيندي چيو ته انهن دورن ۾ به شهر کي بدامني جو سامھون رهيو، جڏهن ته حڪيم سعيد جي قتل جهڙا افسوسناڪ واقعا به پيش آيا.هن چيو ته اسيمبلي عوام جي چونڊيل نمائنده آهي ۽ اهو سوال به اٿاريو ته ڇا ڪجهه عناصر ڪراچي کي ٻيهر 1992ع جهڙن حالتن ۾ کڻي وڃڻ چاهين ٿا؟ سندس چوڻ هو ته اڄ ڪراچي جي سياسي نمائندگي مڪمل طور تي تبديل ٿي چڪي آهي.سنڌ جي گهرو وزير واضح ڪيو ته قانون کي هٿ ۾ کڻندڙ هر شخص خلاف بنا ڪنهن ڀيدڀاءُ جي سخت ڪارروائي ڪئي ويندي، هن بجيٽ تقرير دوران نفرت انگيز تقريرن تي پڻ تنقيد ڪئي ۽ چيو ته اهڙي قسم جي سياست کان پاسو ڪيو وڃي.گهرو وزير سنڌ پوليس، قانون لاڳو ڪندڙ ادارن ۽ آئي جي سنڌ پوليس جي ڪارڪردگي کي ساراهيندي چيو ته ڏوهن جي روڪٿام لاءِ جديد ٽيڪنالاجي مان فائدو ورتو پيو وڃي.هن چيو ته ڪراچي ۾ موٽرسائيڪل چوري جا واقعا وڌيڪ آهن، ان ڪري نئين موٽرسائيڪلن ۾ ڪمپني مان نڪرڻ کان اڳ ٽريڪر لڳائڻ لازمي بڻايو ويندو ته جيئن چوري جي وارداتن تي ضابطو آڻي سگهجي.سنڌ جي گهرو وزير موجب، اي چالان نظام جي لاڳو ٿيڻ سان ٽريفڪ حادثن ۾ تقريبن 50 سيڪڙو گهٽتائي آئي آهي، هينئر تائين 17 لک کان وڌيڪ اي چالان ٽڪيٽون جاري ڪيون ويون آهن، ڪراچي ۾ لڳ ڀڳ 3 ارب رپين جا اي چالان ڏنڊ لڳايا ويا ۽ هڪ ارب رپين کان وڌيڪ ڏنڊ وصول ڪيا ويا آهن.هن وڌيڪ ٻڌايو ته حڪومت پبلڪ پرائيويٽ پارٽنرشپ تحت ٽريفڪ مينيجمينٽ ڪمپني قائم ڪري رهي آهي، جنهن جو مقصد شهر ۾ ٽريفڪ نظام کي وڌيڪ اڻڌريو ۽ جديد بڻائڻ آهي.
