تهران (ويب ڊيسڪ)صدر ڊونلڊ ٽرمپ اعلان ڪيو آهي ته ايران خلاف منصوبابندي ڪيل حملي کي روڪيو ويو آهي. سوشل ميڊيا پليٽ فارم ٽرٿ سوشل تي جاري ڪيل پنهنجي بيان ۾ صدر ٽرمپ چيو ته اسلامي جمهوريه ايران سان ڳالهيون اعليٰ ترين سطح تي پهچي ويون آهن ۽ انهن کي منظور ڪيو ويو آهي، جنهن کان پوءِ هن صدر جي حيثيت سان حملا روڪڻ جو فيصلو ڪيو. هن چيو ته آمريڪا، اسرائيل، سعودي عرب، گڏيل عرب امارات، قطر، ترڪي، پاڪستان، بحرين، ڪويت، اردن ۽ مصر سميت سڀئي ڌريون اصولي ۽ تفصيلي طور تي معاهدي جي نقطن ۽ تفصيلن تي متفق آهن.
آمريڪي صدر موجب، بحري ناڪي بندي مڪمل طور تي آخري معاهدي تي صحيح ٿيڻ تائين جاري رهندي، جڏهن ته معاهدي تي صحيح جي وقت ۽ جڳهه جو اعلان جلد ڪيو ويندو. ان کان اڳ آمريڪي حملن جي جواب ۾ ايران خطي اندر 18 اهم آمريڪي فوجي اڏن کي نشانو بڻائڻ جي دعويٰ ڪئي آهي.پاسدارانِ انقلاب جو چوڻ آهي ته ڪويت جي “علي السالم” ۽ “احمد الجابر” بيسز (فوجي اڏن) تي حملا ڪيا ويا، جڏهن ته بحرين جي “شيخ عيسيٰ ائير بيس” کي پڻ ٽارگيٽ ڪيو ويو. ايراني ميڊيا موجب اردن تي 12 ميزائيل فائر ڪيا ويا جنهن ۾ سلطي ايئر بيس تي موجود آمريڪي جنگي جهاز تباهه ٿيا آهن پر ان جو تفصيل ناهي ڏنو ويو. ايراني پاسدارانِ انقلاب جو چوڻ آهي ته آمريڪي حملن جي جواب ۾ اهي ڪارروايون ڪيون ويون آهن. ايراني پاسدارانِ انقلاب چيو ته ميزائل ۽ ڊرون آپريشن جو پهريون مرحلو مڪمل ٿي چڪو آهي. جيڪڏهن آمريڪا هرمز جي پيچري (آبنائي هرمز) کي غير محفوظ بڻائڻ چاهي ٿو، ته ايران هن خطي کي گستاخ (مغرور) لاءِ جهنم بڻائي ڇڏيندو.
اڄ رات ايران تي تمام سخت حملا ڪنداسين، ٽرمپ، جنگ نٿا چاهيون پر ان لاءِ تيار آهيون، ايران
آمريڪي صدر ڊونلڊ ٽرمپ اها ڳالهه پنهنجي سوشل ميڊيا پليٽفارم ٽرٿ سوشل تي ڪيل هڪ پوسٽ ۾ ڪئي. هن چيو، “ويجهي مستقبل ۾ ڪنهن وقت اسان خارگ ٻيٽ ۽ تيل جي ٻين بنيادي ڍانچن تي ڪنٽرول حاصل ڪنداسين ۽ انهن جي تيل ۽ گئس مارڪيٽن جو مڪمل انتظام سنڀالينداسين، بلڪل اهڙي طرح جيئن اسان وينزويلا سان ڪيو آهي.” ٽرمپ هڪ ڀيرو ٻيهر اها دعويٰ پڻ ورجائي ته ايران جي هٿياربند فوجن جون صلاحيتون مڪمل طور تباهه ڪيون ويون آهن. ٻئي پاسي ايران جي پرڏيهي وزير چيو آهي ته ايران جنگ نٿو چاهي پر ملڪي مفادن تي سمجهوتو نه ڪنداسين ۽ جنگ مڙهي وئي ته ان لاءِ تيار آهيون.
پاڪستان ۽ ترڪيه جو آمريڪا ۽ ايران تي تحمل لاءِ زور
پاڪستان جي نائب وزيراعظم ۽ پرڏيهي وزير اسحاق ڊار گذريل رات ترڪيه جي پرڏيهي وزير هاقان فدان سان ٽيليفون تي ڳالهه ٻولهه ڪئي، جنهن دوران ٻنهي اڳواڻن علائقي جي تازي صورتحال تي خيالن جي ڏي وٺ ڪئي. پاڪستان جي پرڏيهي وزارت طرفان ايڪس (X) تي جاري ڪيل بيان موجب، ٻنهي اڳواڻن ڳالهه ٻولهه ۽ تحمل جي اهميت تي زور ڏنو. بيان ۾ چيو ويو ته، “ٻنهي اميد ظاهر ڪئي ته سڀني ڌرين وچ ۾ جلد ڪا مفاهمت پيدا ٿيندي، جيڪا علائقي ۾ پائيدار امن ۽ استحڪام آڻڻ ۾ مددگار ثابت ٿيندي. ٻنهي اڳواڻن باهمي دلچسپي وارن علائقائي ۽ عالمي معاملن تي ويجهي رابطي ۾ رهڻ ۽ پاڪستان-ترڪيه شراڪتداري کي وڌيڪ مضبوط بڻائڻ لاءِ اعليٰ سطحي رابطا جاري رکڻ تي اتفاق ڪيو.”
سڀ ايراني ميزائيل تباهه ڪيا آهن، ڪو نقصان ناهي ٿيو، اردن
هڪ فوجي ذريعي اردن جي سرڪاري خابرو اداري پيٽرا نيوز ايجنسي کي ٻڌايو ته ايران پاران فائر ڪيل سڀ ميزائيل تباهه ڪيا ويا آهن ۽ روڪٿام واري ڪارروائي دوران ڪيترائي ٽڪرا زمين تي ڪريا، پر ڪنهن به قسم جو جاني نقصان يا مالي نقصان نه ٿيو. ذريعي موجب انجنيئرنگ يونٽن انهن ميزائلن جي باقيات کي محفوظ بڻايو آهي ته جيئن انهن ۾ ڪو به ڌماڪيدار مواد باقي نه رهي. ان کان اڳ ايران جي اسلامڪ ريووليوشنري گارڊ ڪور (IRGC) چيو هو ته هن مسلسل ٻي رات اردن ۾ واقع الازرق ايئر بيس کي نشانو بڻايو ۽ آمريڪي فوجي اڏي تي 12 بيلسٽڪ ميزائل فائر ڪيا.
ايران جنگبندي لاءِ تيار نه ٿيو ته يورپي يونين مٿس وڌيڪ پابنديون لڳائيندي، ميلوني
اٽلي جي وزيراعظم جارجيا ميلوني چيو آهي ته جيڪڏهن وچ اوڀر جو بحران ختم نه ٿيو ته يورپي يونين کي ايران تي نيون پابنديون لاڳو ڪرڻ لاءِ تيار رهڻ گهرجي. هن پارليامينٽ ۾ خطاب ڪندي چيو، “جيڪڏهن تهران غلط رستي تي هلندو رهيو ته يورپي يونين کي نون هدف بڻايل قدمن ذريعي دٻاءُ وڌائڻ لاءِ تيار رهڻ گهرجي.” ميلوني اسرائيل جي انتهاپسند سيڪيورٽي وزير ايتامار بين گوير جي اٽلي بابت بيانن تي پڻ تنقيد ڪئي ۽ چيو ته اهي “اٽلي لاءِ ناقابل قبول ۽ اسرائيل لاءِ به غير مهذب” آهن.
آمريڪي حملن جنگبندي کي عملي بي معنيٰ بڻايو آهي، ايران
ايران جي پرڏيهي وزارت آمريڪي حملن جي مذمت ڪندي چيو آهي ته انهن حملن جنگبندي کي “عملي طور بي معنيٰ” بڻائي ڇڏيو آهي. پرڏيهي وزارت پنهنجي بيان ۾ چيو ته آمريڪا جا “غيرقانوني ۽ مجرمانه” حملا نه رڳو گڏيل قومون جي منشور جي کليل ڀڃڪڙي آهن، پر انهن 8 اپريل واري جنگبندي کي به عملي طور بي اثر ڪري ڇڏيو آهي. بيان ۾ وڌيڪ چيو ويو ته “هن مجرمانه عمل جي انتهائي سنگين نتيجن جي ذميواري آمريڪا جي قيادت تي عائد ٿئي ٿي.”
عماني جهاز تي آمريڪي حملي ۾ 3 ڀارتي شهري مارجي ويا
عمان مان ايران لاءِ امدادي ضروري سامان کڻي ويندڙ جهاز تي آمريڪي حملي ۾ 3 ڀارتي شهري مارجي ويا آهن. اهو حملو هرمز ويجهو اربع تي ڪيو ويو هو. ڀارت جي جهاز راني واري وزير سربندانا سونووال ايڪس تي ڪيل پوسٽ ۾ اهو ته ناهي چيو ته حملو آمريڪا ڪيو هو پر مري ويل شهرين جي تصديق ڪندي واقعي تي افسوس ظاهر ڪيو آهي. سي اين اين موجب جهاز تي 24 عملي جا ماڻهو سوار هئا ۽ حملي بعد 21 کي ريسڪيو ڪيو ويو هو. جهاز سمنڊ ۾ اڌ ٻڏل نظر اچي رهيو آهي. رپورٽ موجب آمريڪا جهاز جي انجڻ روم تي مخصوص بارود سان حملو ڪيو هو.
ٽرمپ ڊيل ۾ دير تي مايوس ٿي ايران تي ٻيهر حملي جو حڪم ڏئي ڇڏيو: ويب سائيٽ
آمريڪي ويب سائيٽ دعويٰ ڪئي آهي ته صدر ڊونلڊ ٽرمپ سخت ڪاوڙ ۾ اچي ويو هو ته ايران کيس تجويزن جو جواب نه پيو ڏئي، ۽ مايوس ٿي هن ايران تي نئين حملي جو حڪم ڏئي ڇڏيو.آمريڪي نيوز ويب سائيٽ 2 سينئر آمريڪي اهلڪارن سان ڳالهه ٻولهه جي بنياد تي ايران خلاف نئين ڪارروائيءَ جو پسمنظر ٻڌائي ڇڏيو آهي. صحافيءَ جو چوڻ آهي ته ايران تي حملي جو سبب (ٽريگر) اپاچي هيلڪاپٽر ڪيرايو وڃڻ بڻيو، پر ان جي پسمنظر ۾ صدر ٽرمپ جي مايوسي وڌي رهي هئي ته ايران 2 هفتا گذرڻ جي باوجود آمريڪي تجويزن تي ڪو جواب ئي نه ڏنو هو. آمريڪي نيوز ويب سائيٽ موجب، حملا آمريڪا جو اثر وڌائڻ لاءِ ڪيا ويا، تنهن هوندي به ان ڳالهه جو خيال رکيو ويو ته جاني نقصان نه ٿئي ته جيئن ڊيل (معاهدي) جو امڪان ختم نه ٿئي. آمريڪي اهلڪار چيو ته جڏهن فائٽر جيٽ (جنگي جهاز) پنهنجي هدف ڏانهن روانا ٿيا ته ايران کي آگاهه ڪيو ويو هو ته رڳو فوجي ٺڪاڻن کي نشانو بڻايو ويندو، ۽ اهو به چيو ويو ته جيڪڏهن اپاچي جا پائلٽ مارجي وڃن ها ته اڄ بالکل مختلف صورتحال هجي ها. آمريڪي اهلڪار موجب، ان ئي دوران قطري ثالث پڻ تهران سان ڳالهيون ڪري رهيا هئا ته جيئن ڳالهين جو عمل بحال ڪيو وڃي ۽ خال پُر ڪيو وڃي. حملي کان ڪئي ڪلاڪ اڳ وائٽ هائوس هڪ ٻي ڪوشش ڪئي هئي ته ايران پاران ٽرمپ جي تجويزن تي جواب ملي وڃي، ۽ خبردار ڪيو هو ته وقت نڪرندو پيو وڃي. جنهن تي ايران چيو هو ته اڃا جواب تيار ناهي ۽ جيڪڏهن حملو ڪيو ويو ته ان جو جواب ڏنو ويندو. آمريڪي نيوز ويب سائيٽ موجب، اربع تي به جڏهن قطري ۽ ايراني اهلڪارن جي ملاقات ٿي، ان وقت به صدر ٽرمپ نئين ڌمڪي ڏني ته “اسان ڏسنداسين ته ڊيل جو ڇا ٿو ٿئي”.آمريڪي نيوز ويب سائيٽ موجب، ايران سان ڊيل گذريل مهيني ئي طئي ٿي وڃي ها، پر پنهنجي نمائندن پاران شرط منظور ڪيا وڃڻ جي باوجود 29 مئي تي سچويشن روم ميٽنگ (گڏجاڻيءَ) کانپوءِ صدر ٽرمپ ايران کان درخواست ڪئي ته جنگبندي ۽ هرمز جي پيچري (آبنائي هرمز) کي کولڻ بابت مفاهمت واري ياداشت جي مسودي ۾ ٻه ترميمون ڪيون وڃن.
آمريڪي فوج پاران ايران ۾ دفاعي حملا مڪمل ڪرڻ جو اعلان
آمريڪي سينٽرل ڪمانڊ (سينٽڪام) جو چوڻ آهي ته آمريڪي فوج ايران ۾ سيلف ڊيفينس اسٽرائيڪس (دفاعي حملا) مڪمل ڪري ورتيون آهن. سينٽڪام موجب، آمريڪي فورسز ايران جي ڪميونيڪيشن سسٽمز (مواصلاتي نظام) ۽ ائير ڊيفينس سائٽس (فضائي دفاعي ٺڪاڻن) کي نشانو بڻايو. اهي حملا آمريڪي فوج ۽ تجارتي جهازن لاءِ پيدا ٿيندڙ خطري جي جواب ۾ ڪيا ويا.سينٽڪام جو چوڻ آهي ته ايراني فوج جي سرويلينس (نگرانيءَ واري) صلاحيتن، ڪميونيڪيشن ۽ فضائي دفاعي نظام تي حملا ڪيا ويا؛ ميرين ڪور، فضائيہ ۽ نيويءَ گڏجي ايراني هڏفن کي نشانو بڻايو. سينٽڪام اهو دعويٰ پڻ ڪيو آهي ته هرمز جي پيچري (آبنائي هرمز) ۾ ڪنهن به آمريڪي جنگي جهاز تي حملو ناهي ٿيو ۽ تجارتي جهاز هرمز مان پنهنجي اچ وڃ جاري رکيو پيا اچن.
آمريڪي حملن جي جواب ۾ ايراني فوج پاران بحرين ۾ آمريڪي ففتھ فليٽ (پنجين بحري ٻيڙي) تي ڊرون حملو: ايراني ميڊيا
آمريڪي حملن جي جواب ۾ ايراني فوج بحرين ۾ آمريڪي ففتھ فليٽ تي ڊرون حملو ڪيو آهي.ايراني سرڪاري ميڊيا موجب، ايراني فوج بحرين ۾ آمريڪي ففتھ فليٽ کي ڊرونز سان نشانو بڻايو؛ ڏکڻ ايران ۾ آمريڪي حملن جي جواب ۾ ايراني فوج اها ڪارروائي ڪئي. پاسدارانِ انقلاب چيو آهي ته خليج فارس جي فضائي حدن ۾ داخل ٿيندڙ ايف-16 (F-16) طياري تي ميزائل سان حملو ڪيو ويو.روسي خبرون ڏيندڙ اداري (نيوز ائجنسي) موجب، پاسدارانِ انقلاب جو چوڻ آهي ته ميزائل فائر ٿيڻ تي ايف-16 طيارو ڀڄڻ تي مجبور ٿي ويو. ايراني پاسدارانِ انقلاب چيو ته ميزائل ۽ ڊرون آپريشن جو پهريون مرحلو مڪمل ٿي چڪو آهي. جيڪڏهن آمريڪا هرمز جي پيچري (آبنائي هرمز) کي غير محفوظ بڻائڻ چاهي ٿو، ته ايران هن خطي کي گستاخ (مغرور) لاءِ جهنم بڻائي ڇڏيندو.
ايران تي حملا جلد ئي روڪيا ويندا، ايراني اڳواڻن بمباري بند ڪرڻ لاءِ چيو آهي: ٽرمپ جي دعويٰ
آمريڪي صدر ڊونلڊ ٽرمپ چيو آهي ته ايران تي بمباري جلد ئي روڪي ويندي، ايراني اڳواڻن کيس بمباري بند ڪرڻ جو چيو آهي. ٽرمپ آمريڪي ٽي وي کي انٽرويو ڏيندي چيو ته ايراني اختيارين سان سڌوسنئون ڳالهه ٻولهه ڪئي اٿس، ۽ آمريڪي فوج ايران تي 49 ٽوماهاڪ (Tomahawk) ميزائل فائر ڪيا آهن. آمريڪي صدر چيو ته ايران تي ٿيندڙ حملن ۾ اسرائيل شامل ناهي. جيڪڏهن ايران ڊيل (معاهدو) نه ڪيو ته بمباري سان سندن خراب حال ڪري ڇڏينداسين. ٻئي طرف، هڪ سينئر ايراني عهديدار چيو آهي ته ايران ۽ ٽرمپ جي وچ ۾ ڪو به رابطو ناهي ٿيو. ٽرمپ جي ايراني اختيارين سان رابطي واري دعويٰ ڪوڙي آهي؛ آمريڪي صدر جو هي بيان جنگ کان بچڻ جي هڪ ڪوشش آهي.
آمريڪي حملن ۽ فوجي ڇڪتاڻ کانپوءِ ايران پاران هرمز جي پيچري (آبنائي هرمز) مان سمورن جهازن جي اچ وڃ بند
آمريڪي حملن ۽ فوجي چڪرين (ڇڪتاڻ) کانپوءِ ايران هرمز جي پيچري (آبنائي هرمز) مان سمورن جهازن جي آمد و رفت بند ڪري ڇڏي آهي. ايراني اعليٰ گڏيل فوجي ڪمان چيو آهي ته هرمز جي پيچري تان گذرڻ جي ڪوشش ڪندڙ ڪنهن به جهاز کي نشانو بڻايو ويندو. بيان ۾ چيو ويو آهي ته هرمز جي پيچري جي بندش واري حڪم ۾ تيل کڻندڙ (آئل ٽئنڪرز) ۽ تجارتي جهاز پڻ شامل آهن. ايراني ميڊيا موجب، ايراني پابنديءَ جي خلاف ورزي ڪرڻ تي هرمز ۾ 2 جهازن کي نشانو بڻايو ويو آهي.
