اسلام آباد(رپورٽ اياز مهر)وزيراعظم شهباز شريف خميس ڏينهن چيو ته پاڪستان علائقائي رابطن بابت ازبڪستان سان “تمام ويجهو” ڪم ڪندو، ۽ هن ڳالهه تي زور ڏنو ته ازبڪستان-افغانستان-پاڪستان ريلوي منصوبو هڪ “گيم چينجر” ثابت ٿيندو۔
وزيراعظم چيو: “مان توهان کي يقين ڏيارڻ ٿو چاهيان ته علائقائي رابطن لاءِ مان توهان سان تمام ويجهو ڪم ڪندس، ڇاڪاڻ تہ اسان ٻئي مڪمل طور متفق آهيون ته ازبڪستان-افغانستان-پاڪستان ريلوي منصوبو نه رڳو اسان جي ملڪن لاءِ، پر سڄي خطي لاءِ گيم چينجر هوندو۔
“۽ ان حوالي سان، اسان تيار آهيون ته گڏجي هٿ ۾ هٿ ڏئي، پنهنجي فيزيبلٽي ۽ بزنس پلان جي بنياد تي هن منصوبي لاءِ فنڊ گڏ ڪريون.”
وزيراعظم شهباز شريف هي خاطري ازبڪستان جي صدر شوڪت مرزايوف کي ڏني، جيڪو پاڪستان جي ٻن ڏينهن واري دوري تي آهي. اسلام آباد ۾ منعقد ٿيل هڪ تقريب دوران ٻنهي ملڪن وچ ۾ ٿيل معاهدن ۽ مفاهمتي يادداشتن (MoUs) بابت دستاويزن جي ڏي وٺ ڪئي وئي۔
وزيراعظم چيو ته کيس انتهائي خوشي آهي جو ازبڪ صدر ۽ سندس وفد اسلام آباد، جنهن کي هن پنهنجو “ٻيو گهر” قرار ڏنو، گذريل چار سالن ۾ ٻيهر دوري تي آيا آهن۔
هن چيو: “مان هن موقعي تي، منهنجا پيارا ڀاءُ، جناب صدر، توهان کي دل جي گهراين سان مبارڪون ڏيان ٿو ته نَسٽ (NUST) يونيورسٽي اسلام آباد پاران توهان کي پروفيسر ۽ ڊاڪٽر جي ڊگري سان نوازيو ويو آهي. هي ايوارڊ توهان جي شاندار خدمتن، بي مثال وابستگي ۽ نه رڳو ازبڪستان جي ڀائرن ۽ ڀينرن، پر پاڙيسري ملڪن ۾ امن، ترقي ۽ خوشحالي جي فروغ لاءِ توهان جي اهم ڪردار جي سڃاڻپ آهي.”
وزيراعظم مرزايوف کي نشانِ پاڪستان ملڻ تي به مبارڪون ڏنيون، جيڪو ملڪ جو سڀ کان وڏو شهري اعزاز آهي، ۽ چيو ته هن کي دوستاڻن لاڳاپن کي معاشي تعاون، واپار ۽ مختلف شعبن ۾ سيڙپڪاري ۾ تبديل ڪرڻ لاءِ خدمتن جي اعتراف طور ڏنو ويو آهي۔
مفاهمتي يادداشتون ۽ معاهدا
تقريب دوران، جيڪا ٽيليويزن تي سڌي نشريات ذريعي ڏيکاري وئي، اعلان ڪيو ويو ته ٻنهي ملڪن وچ ۾ 28 معاهدا ۽ مفاهمتي يادداشتون (MoUs) طئي ٿيون آهن. انهن مان 20 دستاويز وزيراعظم شهباز شريف ۽ ازبڪ صدر مرزايوف جي موجودگي ۾ ڏي وٺ ڪيا ويا۔ ٻنهي ڌرين وچ ۾ ٿيل معاهدن ۽ مفاهمتي يادداشتن ۾ ڪيترائي شعبا شامل آهن، جن ۾ دفاعي تعاون لاءِ ايڪشن پلان، ماحوليات، موسمي تبديلي ۽ آفتن جي خطري ۾ گهٽتائي، آفتن جو انتظام، زراعت ۾ تعاون، ميون جي برآمد لاءِ صحت ۽ صفائي بابت پروٽوڪول، کاڻن جي کوٽائي ۽ جيو سائنسز ۾ تعاون، سزا يافته ماڻهن جي منتقلي ۽ منشيات جي اسمگلنگ خلاف گڏيل ڪوششون شامل آهن۔
تقريب دوران ازبڪ صدر کي اعزازي ڊاڪٽريٽ آف فلاسافي ۽ پروفيسر جو اعزازي لقب پڻ ڏنو ويو، جيڪو پاڪستان ۽ ازبڪستان وچ ۾ مضبوط ٻطرفي لاڳاپن جي فروغ ۽ خطي ۾ امن ۽ ترقي لاءِ سندس “غير معمولي خدمتن” جي اعتراف طور ڏنو ويو۔
ازبڪ صدر جي آمد
ازبڪ صدر جي نور خان ايئربيس تي آمد وقت، وزيراعظم شهباز شريف ۽ صدر آصف علي زرداري سندس ڀرپور استقبال ڪيو۔ کيس 21 توپن جي سلامي ڏني وئي.
صدر سيڪريٽريٽ جي ايڪس (X) اڪائونٽ تان جاري ڪيل پوسٽ ۾ چيو ويو: “ازبڪستان جي صدر شوڪت مرزايوف کي دل جي گهراين سان ڀليڪار! صدر آصف علي زرداري ۽ وزيراعظم شهباز شريف اڄ نور خان ايئربيس تي ازبڪ صدر جو استقبال ڪيو. هي دورو ٻطرفي لاڳاپن ۽ علائقائي رابطن کي مضبوط ڪرڻ ڏانهن هڪ اهم قدم آهي.”
سرڪاري خابرو اداري اي پي پي موجب، اطلاعات واري وفاقي وزير عطاالله تارڙ ۽ وزيراعظم جا خاص معاون هارون اختر پڻ نور خان ايئربيس تي موجود هئا۔
اي پي پي رپورٽ موجب، ازبڪ صدر کي 21 توپن جي سلامي ڏني وئي، جڏهنتہ پاڪستان جي هٿياربند فوجن جي سٺي طرح تيار ڪيل دستي مهمان معزز کي سلامي پيش ڪئي، ۽ ٽنهي سروسز جي بينڊ پاران پڻ موسيقي پيش ڪئي وئي۔
پرڏيهي وزارت (FO) اڳ ئي چيو هو ته ازبڪ صدر وزيراعظم شهباز شريف جي دعوت تي پاڪستان جو سرڪاري دورو ڪري رهيو آهي۔
پرڏيهي وزارت جي بيان موجب، صدر مرزايوف اعليٰ سطحي وفد جي اڳواڻي ڪندو، جنهن ۾ وفاقي وزير ۽ ڪاروباري اڳواڻ شامل آهن۔
بيان ۾ چيو ويو ته مهمان صدر، صدر آصف علي زرداري سان ملاقات ڪندو، وزيراعظم شهباز شريف سان وفدي سطح تي ڳالهيون ڪندو، ۽ پاڪستان-ازبڪستان بزنس فورم کي خطاب ڪندو۔
پرڏيهي وزارت وڌيڪ چيو ته هي ازبڪ صدر جو پاڪستان جو ٻيو دورو آهي، ڇوته هو آخري ڀيرو 2022ع ۾ پاڪستان آيو هو۔
بيان موجب، هي دورو پاڪستان ۽ ازبڪستان وچ ۾ وڌندڙ ٻطرفي لاڳاپن ۽ ٻنهي ڀائر ملڪن جي وچ ۾ ڀائراڻن لاڳاپن جي عڪاسي ڪري ٿو، جيڪي گڏيل تاريخ، ايمان ۽ وچ ايشيا ۽ ڏکڻ ايشيا ۾ امن ۽ خوشحالي جي گڏيل خواهشن تي ٻڌل آهن۔
پاڪستان ۽ ازبڪستان واپار ۽ معاشي تعاون ذريعي پنهنجا لاڳاپا مضبوط ڪيا آهن. 2023ع ۾ هڪ ارب ڊالر جو واپاري معاهدو طئي ٿيو، جڏهنته صنعتي تعاون لاءِ روڊ ميپ سميت وڌيڪ سهڪار جا منصوبا پڻ ٻنهي ڌرين جي علائقائي رابطن کي وڌائڻ جي عزم کي ظاهر ڪن ٿا۔
گذريل مهيني، جڏهن وزيراعظم شهباز شريف تاشقند ۾ صدر مرزايوف سان ملاقات ڪئي، تڏهن ٻنهي ملڪن ٻطرفي واپار کي ٻن ارب ڊالرن تائين وڌائڻ تي اتفاق ڪيو۔
ازبڪستان جي سفارتخاني گذريل هفتي چيو هو ته صدر مرزايوف جو پاڪستان جو دورو ٻطرفي لاڳاپن ۾ نئين مرحلي جي شروعات ثابت ٿيڻ جي اميد آهي۔
