ڪراچي (اسٽاف رپورٽر) سنڌ جي وڏي وزير سيد مراد علي شاهه ايراني سپريم ليڊر آيت الله خامنه اي جي شهادت تي گهري ڏک جو اظهار ڪيو آهي.مراد علي شاهه چيو ته سنڌ جا ماڻهو ڏک جي هن گهڙي ۾ ايران ۽ سڀني سوگواران جي ڏک ۾ برابر جا شريڪ آهن. آمريڪي قونصل خاني ۾ هڪ تمام بدقسمتي وارو واقعو پيش آيو، جنهن جي نتيجي ۾ انساني جانيون ضايع ٿيون.هن چيو ته حڪومت ڪنهن کي به قانون کي پنهنجي هٿن ۾ وٺڻ جي اجازت نٿي ڏئي سگهي، ۽ ماڻهن جي جان ۽ مال جو تحفظ حڪومت جي اولين ترجيح آهي.سنڌ جي وڏي وزير آمريڪي قونصل خاني واقعي جي غير جانبدار جاچ لاءِ هدايتون جاري ڪندي چيو ته ملڪ جنگ جي صورتحال کي منهن ڏئي رهيو آهي، ۽ اهڙي صورتحال ۾ امن امان کي خراب ڪرڻ مناسب ناهي.هن مذهبي اڳواڻن، علامه شهنشاهه نقوي، علامه شبير ميسامي ۽ ٻين سان رابطو ڪيو ۽ انهن کي درخواست ڪئي ته هر قيمت تي ماڻهن جي جذبات کي قابو ۾ رکيو وڃي.سنڌ جي وڏي وزير جي ترجمان موجب، علامه شهنشاهه نقوي ۽ ٻين نمائش ۾ هڪ اجتماع منعقد ڪرڻ بابت ڳالهايو، جنهن تي مراد علي شاهه انتظاميا ۽ پوليس کي هدايت ڪئي آهي ته اجتماع کي مڪمل سيڪيورٽي فراهم ڪئي وڃي.سنڌ جي وڏي وزير عالمن ۽ مختلف مڪتب فڪر جي ماڻهن کي امن لاءِ رهنمائي فراهم ڪرڻ جي درخواست پڻ ڪئي.هن انتظاميا ۽ پوليس کي هر قيمت تي امن امان برقرار رکڻ جي هدايت ڪئي ۽ عوام کان امن امان لاءِ سندس ساٿ ڏيڻ جي درخواست ڪئي.
