پشاور(ويب ڊيسڪ) پشاور جي هڪ خاص دهشتگردي ٽوڙ عدالت (اي ٽي سي) ڇنڇر ڏينهن تحريڪ انصاف جي باني جي گرفتاري کانپوءِ 9 ۽ 10 مئي تي احتجاجن دوران ريڊيو پاڪستان پشاور جي عمارت تي حملي ۽ باهه ڏيڻ واري ڪيس ۾ جاچ آفيسر کان نئين رپورٽ طلب ڪري ورتي.
اي ٽي سي جي جج ولي محمد خان ڪيس جي ٻڌڻي ڪئي، جنهن ۾ جوابدارن، ريڊيو پاڪستان ۽ پراسيڪيوشن جي نمائندگي ڪندڙ وڪيلن شرڪت ڪئي.
جوابدارن جي وڪيل علي زمان ايڊووڪيٽ عدالت کي ٻڌايو ته پنجاب فارينزڪ سائنس ليبارٽري ۽ نيشنل ڊيٽابيس اينڊ رجسٽريشن اٿارٽي (نادرا) جي نتيجن جي روشني ۾ جيڪا رپورٽ طلب ڪئي وئي هئي، اها اڃا تائين عدالت ۾ پيش نه ڪئي وئي آهي.
جاچ آفيسر عدالت کان رپورٽ مڪمل ڪري پيش ڪرڻ لاءِ وڌيڪ وقت گهريو.
پراسيڪيوشن عدالت کي ٻڌايو ته ڪيس ۾ نامزد 9 جوابدار اڃا تائين مفرور آهن.
پراسيڪيوشن موجب، 9 مئي 2023ع تي احتجاج ڪندڙن جي هڪ گروهه ريڊيو پاڪستان پشاور جي عمارت تي حملو ڪيو، عمارت جي ڪجهه حصن کي باهه ڏئي ڇڏي ۽ سرڪاري ۽ نجي ملڪيت کي نقصان پهچايو.
پوليس ڪيس ۾ پي ٽي آءِ جي ڪيترن ئي اڳواڻن ۽ ڪارڪنن کي نامزد ڪيو هو، جن ۾ صوبائي وزير مينا خان ۽ خيبر پختونخوا اسيمبلي جا ميمبر آصف خان ۽ فضل الهي پڻ شامل آهن.
