طالبان ڪابينا پاران 11 سيپٽمبر تي حلف کڻڻ جو فيصلو

ڪابل (ويب ڊيسڪ) نئين افغانستان ۾ اعلانيل عبوري  حڪومت جا عهديدار 11 سيپٽمبر تي نائن اليون کي 20 سال مڪمل ٿيڻ واري ڏهاڙي تي حلف کڻڻ جو فيصلو ڪيو آهي. طالبان طرفان ٻه ڏينهن اڳ عبوري حڪومت جو اعلان ڪيو ويو هو جنهن ۾ ملا محمد حسن اخوند کي افغانستان جو وزيراعظم جڏهن ته ملا عبدالغني برادر ۽ مولوي عبدالسلام حنفي کي نائب وزيراعظم مقرر ڪيو ويو هو. هاڻي ٻڌايو پيو وڃي ته نئين افغان ڪابينا آمريڪا ۾ ورلڊ ٽريڊ ٽاور تي ٿيل حملي کي 20 سال مڪمل ٿيڻ واري ڏهاڙي يعني 11 سيپٽمبر تي حلف کڻندي، نئين افغان ڪابينا جي حلف برداري تقريب ۾ روس ۽ چين جا عهديدار به شريڪ ٿيندا. آمريڪا ۽ يورپي يونين جي طرفان طالبان جي عبوري حڪومت تي خدشن جو اظهار ڪيو ويو آهي، جڏهن ته پاڪستان جي طرفان نئين افغان حڪومت جي لاءِ نيڪ خواهشن جو اظهار ڪيو ويو آهي. آمريڪي پرڏيهي وزير انٿوني بلنڪن جو چوڻ هو ته طالبان حڪومت ۾ اهڙا ماڻهو به شامل آهن جيڪي آمريڪي ادارن کي گهربل آهن، طالبان کي نئين حڪومت جي ڪجهه نالن لاءِ دنيا کان قانوني حيثيت حاصل ڪرڻ پوندي. ٻئي پاسي پاڪستاني پرڏيهي کاتي جي ترجمان اميد ظاهر ڪئي آهي ته افغانستان ۾ نئين سياسي انتظام هيٺ امن ۽ استحڪام ۽ سلامتي کي يقيي بڻايو ويندو. ياد رهي ته سعودي پرڏيهي وزير شهزاده فصل چيو ته سعودي عرب افغان عوام جي مدد لاءِ پر عزم آهي، افغان عوام بغير ٻاهرين مداخلت جي جيڪو به رستو چونڊ ڪندو سعودي عرب حمايت ڪندو.

پهنجو تبصرو موڪليو