اسلام آباد (بيورو رپورٽ)وزيراعظم شهباز شريف پاڪستان جي سرحدي علائقن ۾ افغانستان جي اشتعال انگيز ڪارروائين جي سخت مذمت ڪئي آهي ۽ پاڪستاني فوج کي ان جي جوابي ڪارروائي تي خراج تحسين پيش ڪيو آهي، وزيراعظم شهباز شريف پنهنجي بيان ۾ چيو ته کيس پاڪستاني فوج جي پيشه ورانه صلاحيت تي فخر آهي. فيلڊ مارشل جي بي خوف قيادت ۾ پاڪستاني فوج افغانستان کي مناسب جواب ڏنو. پاڪستاني فوج ڪيتريون ئي افغان پوسٽون تباهه ڪيون ۽ انهن کي پوئتي هٽڻ تي مجبور ڪيو، شهباز شريف چيو ته پاڪستان جي دفاع تي ڪو به سمجهوتو نه ڪيو ويندو، هر اشتعال انگيز ڪارروائي جو مڪمل ۽ اثرائتو جواب ڏنو ويندو، هن چيو ته اسان جو دفاع مضبوط هٿن ۾ آهي، اسان ڄاڻون ٿا ته ملڪ جي هر ڪنڊ جو دفاع ڪيئن ڪجي، پاڪستاني فوج هميشه هر قسم جي ٻاهرين جارحيت جو مناسب جواب ڏنو آهي، پوري قوم پاڪستان جي سيڪيورٽي فورسز سان گڏ بيٺي آهي، وزيراعظم چيو ته دهشتگرد تنظيمن کي افغانستان ۾ موجود عنصرن جي حمايت حاصل آهي. پاڪستان بار بار افغانستان کي اتي فتنه الخارج ۽ فتنه الهندستان بابت معلومات فراهم ڪئي آهي. انهن ماڻهن بابت معلومات فراهم ڪئي وئي جن افغان سرزمين تان پاڪستان خلاف ڪارروائي ڪئي. اميد آهي ته افغان حڪومت يقيني بڻائيندي ته سندس سرزمين پاڪستان خلاف استعمال نه ٿئي.
اسان امن چاهيون ٿا پر پاڪستان جي سالميت يا ان جي شهرين جي سلامتي تي ڪو به سمجهوتو نه ٿيندو: مريم نواز
پنجاب جي وڏي وزير مريم نواز به پاڪستاني علائقن تي افغانستان جي بي سبب جارحيت جي سخت مذمت ڪئي ۽ افغان جارحيت جي جرئتمندانه جواب ڏيڻ تي پاڪستاني فوج کي خراج تحسين پيش ڪيو، مريم نواز چيو ته پاڪستاني فوج پوري قوم جي عزت، فخر، عزم ۽ وقار جي علمبردار آهي. پاڪستاني فوجن هميشه وانگر همت، دانشمندي ۽ قومي اتحاد سان افغان جارحيت جو جواب ڏنو، هن چيو ته پاڪستان جون سرحدون هڪ مقدس امانت آهن ۽ انهن جي حفاظت ڪرڻ هر پاڪستاني جو فرض آهي. افغان جارحيت جو جواب هڪ پيغام آهي ته پاڪستاني زمين امن جي ضامن آهي، ڪمزوري جي نشاني ناهي. اسان امن چاهيون ٿا پر پاڪستان جي سالميت يا ان جي شهرين جي سلامتي تي ڪو به سمجهوتو نه ڪيو ويندو.
