اسلام آباد (بيورو رپورٽ)پاڪستان هندستاني دفاع واري وزير راج ناٿ سنگهه جي سنڌ صوبي بابت ڏنل بيان جي سخت مذمت ڪئي آهي.پرڏيهي آفيس جي بيان ۾ چيو ويو آهي ته هندستاني دفاع واري وزير راج ناٿ سنگهه جو سنڌ صوبي کي ٻيهر هندستان جو حصو بڻائڻ بابت اشتعال انگيز بيان امن لاءِ خطرو آهي.بيان ۾ چيو ويو آهي ته هندستاني دفاع واري وزير جا تاريخ بابت وهم پرست ۽ خطرناڪ طور تي ٽوڙي مروڙي بيان هڪ توسيع پسند هندوتوا ذهنيت کي ظاهر ڪن ٿا جيڪو قائم ٿيل حقيقتن کي چئلينج ڪرڻ جي ڪوشش آهي ۽ بين الاقوامي قانون، تسليم ٿيل سرحدن جي تقدس ۽ رياستن جي خودمختياري جي واضح خلاف ورزي آهي.پرڏيهي آفيس چيو ته اسان راج ناٿ سنگهه ۽ ٻين هندستاني اڳواڻن تي زور ڏيون ٿا ته اهي اهڙن اشتعال انگيز بيانن کان پاسو ڪن جيڪي خطي ۾ امن ۽ استحڪام لاءِ خطرو آهن.پرڏيهي آفيس چيو ته هندستاني حڪومت لاءِ هڪ وڌيڪ تعميري رستو اهو هوندو ته هو پنهنجي شهرين، خاص طور تي ڪمزور اقليتي برادرين جي حفاظت کي يقيني بڻائڻ تي ڌيان ڏئي.”ان کي انهن عنصرن جو احتساب ڪرڻ گهرجي جيڪي انهن جي خلاف تشدد کي ڀڙڪائيندا آهن يا ان ۾ ملوث آهن ۽ مذهبي تعصب ۽ تاريخي مسخ جي بيانن کان پاسو ڪن. پرڏيهي آفيس چيو ته هندستان جي اتر اوڀر علائقي جي ماڻهن جا پراڻا مسئلا پڻ ڌيان جي لائق آهن، جيڪي منظم محرومي، سڃاڻپ جي بنياد تي ظلم ۽ رياست جي سرپرستي ۾ جاري تشدد کي منهن ڏئي رهيا آهن.بيان ۾ چيو ويو آهي ته پاڪستان هندستان تي زور ڏئي ٿو ته هو گڏيل قومن جي سلامتي ڪائونسل جي قراردادن ۽ والاريل ڪشمير جي ماڻهن جي خواهشن جي مطابق ڄمون ۽ ڪشمير جي تڪرار جي حقيقي ۽ پرامن حل لاءِ قابل اعتماد قدم کڻي.پاڪستان انصاف، برابري ۽ بين الاقوامي قانوني اصولن جي بنياد تي هندستان سان سڀني تڪرارن جي پرامن حل لاءِ پرعزم آهي. بهرحال، ماضي وانگر، پاڪستان پنهنجي سلامتي، قومي خودمختياري ۽ آزادي جي حفاظت لاءِ مضبوطي ۽ غير متزلزل طور تي پرعزم آهي.
