ڪراچي (اسٽاف رپورٽر) سنڌ جي چيف سيڪريٽري سيد آصف حيدر شاهه ڪراچي ۾ خاتون پاڪستان گرلز اسڪول جو دورو ڪيو. ان دوران چيف سيڪريٽري سنڌ ڪلاسز جو معائنو ڪيو ۽ ٻارن سان ملاقات ڪئي.اسڪول جي دوري دوران زندگي ٽرسٽ جي شهزاد راءِ چيف سيڪريٽري سنڌ کي بريفنگ ڏيندي ٻڌايو ته زندگي ٽرسٽ سنڌ حڪومت جي سهڪار سان عورت پاڪستان اسڪول هلائي رهيو آهي. شهزاد راءِ چيف سيڪريٽري سنڌ کي ٽيچنگ لائسنس بابت پڻ آگاهه ڪيو ۽ چيو ته سنڌ پاڪستان جو پهريون صوبو آهي جتي ٽيچنگ لائسنس جاري ڪيو ويو آهي.چيف سيڪريٽري سنڌ سيد آصف حيدر شاهه سرڪاري اسڪولن ۾ تعليم جي حوالي سان نئين جدت متعارف ڪرائڻ تي زندگي ٽرسٽ کي ساراهيو. ان موقعي تي چيف سيڪريٽري سنڌ چيو ته درس ۽ تدريسي هڪ معتبر پيشو آهي ۽ حيدرآباد جي ڪمشنر جي حيثيت سان هو سائنس ۽ رياضي جا ڪلاس وٺندو هو. هن چيو ته صوبي جي 30 ٽيچنگ ٽريننگ ادارن کي اپ گريڊ ڪيو ويندو. آڪسفورڊ يونيورسٽي ذريعي استادن لاءِ ٽيچر ٽرينر پروگرام شروع ڪيا ويندا. چيف سيڪريٽري سنڌ اسڪول ۾ تعميراتي ڪم جو پڻ معائنو ڪيو ۽ سائنس ليب جو دورو پڻ ڪيو ۽ سنڌ حڪومت جي سهڪار جو يقين ڏياريو.
