ڪراچي (اسٽاف رپورٽر) منشيات جي روڪٿام واري فورس (اي اين ايف) 4 مختلف ڪاررواين دوران مجموعي طور تي 513.7 ڪلوگرام منشيات هٿ ڪري هڪ جوابدار کي گرفتار ڪري ورتو. اي اين ايف جي ترجمان موجب، اهي ڪارروايون پشاور، ڪراچي ۽ نوڪنڊي ۾ ڪيون ويون.ترجمان جو چوڻ آهي ته ڪاررواين دوران 475 ڪلوگرام افيون، 36 ڪلوگرام چرس ۽ 2.7 ڪلوگرام هيروئن برآمد ڪئي وئي، ان کان علاوه 400 ڪلوگرام ممنوعہ مواد (ملاوٽ يا پابندي مڙهيل سامان) پڻ قبضي ۾ ورتو ويو. ترجمان ٻڌايو ته ڪاررواين دوران هڪ ايل ايم جي (LMG) سميت 110 رائونڊ ۽ 22 ايس ايم جيز (SMGs) سميت 60 رائونڊ به هٿ ڪيا ويا آهن. اي اين ايف موجب، سمورين ڪاررواين جي سلسلي ۾ منشيات جي روڪٿام واري ايڪٽ 1997 تحت ڪيس داخل ڪيا ويا آهن، جڏهن ته وڌيڪ تفتيش جاري آهي.
