اسلام آباد(بيورو رپورٽ)پاڪستان جي معاشي بحاليءَ لاءِ هڪ قومي منصوبو تيار ڪيو ويو ۽ پرڏيهي سيڙپڪاري جي راهه ۾ رڪاوٽن کي دور ڪرڻ لاءِ هڪ خاص سيڙپڪاري سهولتن واري ڪائونسل قائم ڪئي وئي. وزيراعظم شهباز شريف جي صدارت هيٺ اسپيشل انويسٽمينٽ فيسليٽيشن ڪائونسل جي پهرين اجلاس جو اعلان ڪيو ويو آهي.ملاقات دوران وزيراعظم شهباز شريف چيو ته معيشت کي تعمير ۽ ترقي ڏانهن واپس آندو پيو وڃي.هن وڌيڪ چيو ته موجوده حڪومت کي ورثي ۾ مليل معيشت تباهي جي ڪناري تي آهي. معيشت کي مشڪل ۽ دليراڻي فيصلي ذريعي بحرانن مان ڪڍي رهيا آهيون اجلاس دوران آرمي چيف جنرل عاصم منير چيو ته پاڪ فوج حڪومت جي معاشي بحالي واري منصوبي تي عملدرآمد جي ڪوششن جي مڪمل حمايت ڪري ٿي.هن وڌيڪ چيو ته پاڪ فوج ان کي پاڪستان جي سماجي ۽ معاشي بهتري ۽ دنيا ۾ پنهنجو جائز مقام حاصل ڪرڻ جو بنياد سمجهي ٿي.اجلاس جي جاري ڪيل پڌرائي موجب ان موقعي تي وڏا وزير، وفاقي ۽ صوبائي وزير ۽ اعليٰ عملدار پڻ موجود هئا. بيان ۾ چيو ويو آهي ته ”اقتصادي بحالي واري منصوبي“ جو مقصد ملڪ کي موجوده معاشي مسئلن ۽ بحرانن مان ڪڍڻ آهي، جنهن جو مقصد پرڏيهي سيڙپڪاري لاءِ راهه هموار ڪرڻ آهي.اجلاس جي جاري ڪيل بيان موجب منصوبي تحت زراعت، لائيو اسٽاڪ، معدنيات، مائننگ، انفارميشن ٽيڪنالاجي (آءِ ٽي)، توانائي ۽ زرعي پيداوار جهڙن شعبن جي صلاحيت کي استعمال ۾ آندو ويندو ،پڌرنامي موجب پاڪستان جي مقامي پيداواري صلاحيت ۽ دوست ملڪن کان سيڙپڪاري کي وڌايو ويندو.منصوبي تحت سيڙپڪاري ۽ ڪاروباري سرگرمين ۾ رڪاوٽون ختم ڪيون وينديون.اجلاس جي پڌرائي موجب منصوبي تحت وفاقي ۽ صوبائي حڪومتن وچ ۾ تعاون پيدا ڪيو ويندو. ’هڪ حڪومت‘ ۽ اجتماعي حڪومت‘ جي تصور کي فروغ ڏنو ويندو.
