اسلام آباد (بيورو رپورٽ) اليڪشن ڪميشن سمورن پارليامينٽ ميمبرن ۽ صوبائي اسيمبلي ميمبرن کي 31 ڊسمبر تائين گوشوارا جمع ڪرائڻ جي هدايت ڪري ڇڏي آهي.اليڪشن ڪميشن جي اختيارين موجب اليڪشن ايڪٽ 2017 جي قلمن 137 جي تحت سمورا پارليامينٽ ۽ صوبائي اسيمبلي ميمبر پنهنجا گوشوارا جمع ڪرائڻ جا پابند آهن.ميمبر خاص طور تي پنهنجي گهر وارين ۽ ڪفالت هيٺ ٻارن جي اثاثن ۽ واجبات جا گوشوارا جمع ڪرائيندا، اليڪشن ڪميشن پهرين جنوري تي مقرر ڪيل تاريخ تائين گهربل گوشوارا جمع نه ڪرائيندڙن جا نالا شايع ڪندو. ۽ 15 جنوري تائين گوشوارا جمع نه ڪرائيندڙ ميمبرن جي رڪنيت معطل ڪئي ويندي.گوشوارا جمع نه ڪرائڻ تي اهي پارليامينٽ ۽ اسيمبلي ميمبر ڪنهن به ڪارروائي ۾ حصو نه وٺي سگهندا، اختيارين چيو ته ڪنهن به قسم جي غلط ڄاڻ ڏيندڙ ميمبر جي خلاف بدعنواني جي ڏوهه هيٺ ڪارروائي ڪئي ويندي.
