لاهور(ويب ڊيسڪ) لاهور هاءِ ڪورٽ اڱاري ڏينهن اڳوڻي يونيورسٽي ليڪچرار جنيد حفيظ جي توهين مذهب جي ڪيس ۾ موت جي سزا خلاف اپيل تي ٻڌڻي ڪئي ۽ اليڪٽرانڪ ثبوتن جي قابلِ قبول هجڻ بابت استغاثه کان دليل طلب ڪري ورتا.
جنيد حفيظ کي 2019ع ۾ موت جي سزا ٻڌائي وئي هئي، جڏهن ته سندس سزا خلاف اپيل 2020ع کان عدالت ۾ التوا هيٺ آهي.
جسٽس صادق محمود خرم ۽ جسٽس محمد جواد ظفر تي ٻڌل ٻه رڪني بئنچ اڱاري ڏينهن اپيل تي ٻڌڻي ڪئي. ان موقعي تي استغاثه جو وڪيل ايڊووڪيٽ غلام مصطفيٰ چوڌري ۽ جنيد حفيظ جو وڪيل ايڊووڪيٽ اسد جمال عدالت ۾ پيش ٿيا.
ٻڌڻي جي شروعات ۾ بئنچ چيو ته جنيد حفيظ جي اپيل ملتان بئنچ مان پرنسپل سيٽ ڏانهن منتقل ٿيڻ کان پوءِ ڌرين کي باضابطه نوٽيس جاري نه ڪيا ويا هئا.
ڊان نيوز جي رپورٽ موجب هي ڪيس ڊسمبر 2021ع ۾ جنيد حفيظ جي وڪيل جي درخواست تي منتقل ڪيو ويو هو.
اڱاري ڏينهن ٻڌڻي دوران لاهور هاءِ ڪورٽ اپيل بابت نوٽيس جاري ڪيا، جيڪي عدالت ۾ جنيد حفيظ ۽ استغاثه طرفان ترتيبوار وڪيلن اسد جمال ۽ غلام مصطفيٰ چوڌري وصول ڪيا.
عدالت وڌيڪ چيو ته هوءَ ڪيس ۾ پيش ڪيل اليڪٽرانڪ ثبوتن ۽ جنيد حفيظ سان منسوب فيس بڪ صفحي جي قابلِ قبول هجڻ بابت استغاثه جو موقف ٻڌڻ چاهي ٿي.
ان کان پوءِ عدالت ٻڌڻي 7 آڪٽوبر تائين ملتوي ڪرڻ جو فيصلو ڪيو، پر جنيد حفيظ جي وڪيل دليلن جي تياري لاءِ وڌيڪ ڊگهي مدي جي درخواست ڪئي.
بئنچ چيو ته ايندڙ ٻڌڻي جي تاريخ بعد ۾ مقرر ڪري ٻڌائي ويندي.
جنيد حفيظ بهاالدين زڪريا يونيورسٽي (بي زيڊ يو) جي انگريزي ادب واري شعبي ۾ اڳوڻو وزٽنگ ليڪچرار هو. کيس 13 مارچ 2013ع تي پوليس گرفتار ڪيو هو، جڏهن ته فيس بڪ تي اپلوڊ ڪيل مواد سان لاڳاپيل توهين مذهب واري ڪيس ۾ سندس ٽرائل 2014ع ۾ شروع ٿيو هو.
21 ڊسمبر 2019ع تي ملتان جي ضلعي ۽ سيشن عدالت کيس توهين مذهب جي الزام ۾ موت جي سزا ٻڌائي هئي، جنهن خلاف هن 2020ع ۾ اپيل داخل ڪئي.
جنيد حفيظ جي ڪيس جي ڪارروائي دوران گهٽ ۾ گهٽ ست ججن جون بدليون ٿيون. استغاثه جي 15 شاهدن جنيد حفيظ خلاف پنهنجا بيان رڪارڊ ڪرايا، جڏهن ته وڌيڪ 11 شاهدن کي غير لاڳاپيل قرار ڏئي عدالت ۾ پيش نه ڪيو ويو.
سيڪيورٽي خدشن سبب پنجاب جي گهرو کاتي اپريل 2014ع ۾ ڪيس جو ٽرائل ملتان سينٽرل جيل منتقل ڪري ڇڏيو هو.
جنيد حفيظ جي اڳوڻن وڪيلن مان هڪ، راشد رحمان کي، مئي 2014ع ۾ پنهنجي آفيس اندر فائرنگ ڪري قتل ڪيو ويو هو. ان کان هڪ مهينو اڳ انساني حقن واري ڪميشن آف پاڪستان راشد رحمان کي مليل موت جون ڌمڪين بابت سخت ڳڻتي جو اظهار ڪيو هو. راشد رحمان ڪميشن جي اسپيشل ٽاسڪ فورس جو ڪوآرڊينيٽر پڻ هو.
ڊسمبر 2014ع ۾ جنيد حفيظ جي هڪ ٻئي وڪيل کي به شدت پسند تنظيم داعش طرفان ڌمڪي وارو خط مليو هو، جنهن ۾ کيس ڪيس تان هٿ کڻڻ لاءِ چيو ويو هو.
جنيد حفيظ جي اپيل تي ٻڌڻي اڳ به ڪيترائي ڀيرا ملتوي ٿي چڪي آهي.
