ڪراچي (اسٽاف رپورٽر)صدر آصف زرداري ۽ بلاول ڀٽو زرداري جي صدارت هيٺ پيپلز پارٽي جي سينٽرل ايگزيڪيوٽو ڪميٽي جي اجلاس ۾ تجويز ڪيل 27 هين آئيني ترميم تي بحث ڪيو ويو، پاڪستان پيپلز پارٽي جي سينٽرل ايگزيڪيوٽو ڪميٽي جي اجلاس ۾ فيصلو ڪيو ويو آهي ته اسان آئين ۾ اين ايف سي ايوارڊ ۾ صوبائي حصي جي تحفظ خلاف تجويز کي رد ڪريون ٿا، پاڪستان پيپلز پارٽي به اختيارن جي منتقلي واپس وٺڻ جي تجويز جي حمايت ڪرڻ لاءِ تيار ناهي. اسان صرف آرٽيڪل 243 ۾ تجويز ڪيل تبديلين جي حمايت ڪريون ٿا. باقي سڀني نقطن تي سڀاڻي جي اجلاس ۾ وڌيڪ بحث ڪيو ويندو. ڪراچي ۾ اجلاس کان پوءِ پريس بريفنگ ۾، چيئرمين پي پي پي بلاول ڀٽو زرداري چيو ته پي پي پي اين ايف سي فارمولا ۾ تبديلي جي تجويز کي رد ڪري ڇڏيو آهي.هن چيو ته پي پي پي آئيني ترميم ۾ ٻيون تجويزون منظور نه ڪيون آهن، ۽ آئيني عدالت تي ان جي راءِ آهي ته چئني صوبن کي برابر نمائندگي ملڻ گهرجي.بلاول ڀٽو وڌيڪ چيو ته سي اي سي جو اجلاس جمعي جي نماز کان پوءِ ٿيندو جنهن ۾ آئيني عدالت تي آخري فيصلو ڪيو ويندو. اجلاس کان اڳ، پيپلز پارٽي جي ترجمان شازيه مري چيو ته 18 هين ترميم ۽ اين ايف سي تي پيپلز پارٽي جو موقف واضح آهي، اسان ان کان پوئتي نه هٽنداسين.شازيه مري چيو ته اسان ڪنهن به اهڙي تجويز جي حمايت نٿا ڪري سگهون جيڪا صوبن جا اختيار ختم ڪري ڇڏيندي. جيڪڏهن آئيني ترميم ۾ ڪجهه به آهي جيڪو نظام کي بهتر بڻائي سگهي ٿو، ته اسان ان جي حمايت ڪنداسين.
