اسلام آباد(بيورو رپورٽ)بجيٽ ۾ ٽيٽرا پيڪ کير، پيڪٽ يوگرٽ، کنڊ مکڻ ۽ پنير وڌيڪ مهانگو ڪيو ويو آهي. ان کان علاوه مڇيءَ جي ٽين پيڪن، ڪڪڙ جو گوشت ۽ انڊن جا پيڪيٽ به وڌي ويندا، ڇو ته انهن شين تي 18 سيڪڙو جنرل سيلز ٽيڪس (GSTT) لڳايو ويو آهي.ان کان علاوه برانڊڊ ڪپڙا به مهانگا هوندا، جن تي جي ايس ٽي 12 سيڪڙو کان وڌائي 15 سيڪڙو ڪئي وئي. ڪافي هائوس، دڪان ۽ کاڌي پيتي جي دڪانن تي ڊيبٽ ۽ ڪريڊٽ ڪارڊ جي ادائيگي تي 5 سيڪڙو ٽيڪس لاڳو ڪيو ويندو.پوائنٽ آف سيل (POS) تي چمڙي ۽ ٽيڪسٽائيل شين جي وڪرو تي سيلز ٽيڪس جي شرح 12 سيڪڙو مان وڌائي 15 سيڪڙو ڪرڻ جي تجويز ڏني وئي آهي.بجيٽ دستاويز ۾ چيو ويو آهي ته 50 هزار رپين کان وڌيڪ رقم ڪڍڻ تي 0.6 سيڪڙو ٽيڪس لڳايو پيو وڃي ته جيئن نان فائلرز طرفان بئنڪن مان نڪرندڙ رقم کي دستاويز ڪرڻ ۽ ٽرانزيڪشن جي قيمتن ۾ اضافو ڪيو وڃي. ان سلسلي ۾ ڪوئلي تي هلندڙ پاور پلانٽس کي مقامي ڪوئلي جي استعمال لاءِ همٿايو پيو وڃي. سولر پينلز، انورٽرز ۽ بيٽري جي خام مال تي ڇوٽ ڏني پئي وڃي. وفاقي حڪومت ايندڙ مالي سال 24-2023 جي بجيٽ ۾ ايشيا ۾ ٺهيل 1300 سي سي کان وڏي پراڻي ۽ استعمال ٿيل گاڏين جي درآمد تي ڊيوٽي ۽ ٽيڪس جي حد ختم ڪري ڇڏي.ناڻي واري وزير چيو ته ايشيا ۾ ٺهيل 1800 سي سي تائين پراڻين ۽ استعمال ٿيل گاڏين جي درآمد تي ڊيوٽي ۽ ٽيڪس 2005ع ۾ ختم ڪيا ويا هئا. هاڻي 1300 سي سي کان مٿي گاڏين تي ڊيوٽي ۽ ٽيڪس جي حد ختم ڪئي پئي وڃي.ڊيوٽيون ۽ ٽيڪسن جي حد بندي کانپوءِ گاڏيون مهانگيون ٿيڻ جو امڪان آهي. ٽيلي ڪام سروسز تي فيڊرل ايڪسائيز ڊيوٽي 19.05 سيڪڙو جي شرح سان لاڳو آهي جنهن کي گهٽائي 16 سيڪڙو ڪرڻ جي تجويز آهي.بجيٽ ۾ فيڊرل ايڪسائيز ڊيوٽي جي شرح ۾ 3.5 سيڪڙو گهٽتائي جي تجويز ڏني وئي آهي.
