اسلام آباد: (بيورو رپورٽ) پرڏيهي آفيس چيو آهي ته پاڪستان يمن ۾ امن ۽ استحڪام لاءِ ڪوششن جي حمايت ڪري ٿو ۽ صورتحال تي ويجهي نظر رکي رهيو آهي.پرڏيهي آفيس جي ترجمان چيو ته اهي يمن جي موجوده صورتحال تي ويجهي نظر رکي رهيا آهن، يمن ۾ امن لاءِ سعودي سفارتي ڪوششن جي حمايت ڪن ٿا، ۽ اميد ڪن ٿا ته سفارتي ڪوششون ملڪ ۾ پائيدار امن قائم ڪرڻ جو سبب بڻجنديون.هن چيو ته اهي يمن جي استحڪام بابت گڏيل عرب امارات جي ڪوششن جي به تعريف ڪن ٿا، ۽ پاڪستان يمن جي علائقائي سالميت جو احترام ڪرڻ جي ضرورت تي زور ڏئي ٿو.پرڏيهي وزارت پاران جاري ڪيل بيان ۾ چيو ويو آهي ته اميد آهي ته ڌريون ڪنهن به هڪ طرفي ڪارروائي کان پاسو ڪنديون جيڪي صورتحال ۾ وڌيڪ ڇڪتاڻ جو سبب بڻجي سگهن ٿيون، ۽ ڌريون ڳالهين ذريعي سياسي حل تي پهچنديون.اهو ياد رکڻ گهرجي ته يمن جي مستعفي صدر منصور هادي ۽ ڏکڻ يمن ۾ عبوري ڪائونسل جي هٿياربند گروهن جي وچ ۾ ڇڪتاڻ جاري آهي، ۽ ٻنهي گروهن جي وچ ۾ جهيڙا جاري آهن.اهي جهيڙا ڪجهه سال اڳ عدن ۾ شروع ٿيا ۽ بعد ۾ صوقطرا ٻيٽ ۽ ٻين علائقن تائين پکڙجي ويا، جنهن دوران سوين ماڻهو مارجي ويا يا زخمي ٿيا.
