لاهور (ڊيسڪ نيوز) لاهور جي ماڊل ٽائون ڪورٽ گلوڪاره رابي پيرزاده جا وارنٽ جاري ڪري ڇڏيا آهن. عدالت ۾ رابي پيرزاده خلاف جهنگلي جيوت کاتي پاران جمع ڪرايل ڪيس جي ٻڌڻي ٿي جنهن بعد گلوڪاره کي بغير اجازت جي جهنگلي حيات بنگلي اندر رکڻ واري ڏوهه تحت عدالت ۾ گرفتار ڪري پيش ڪرڻ جا وارنٽ جاري ڪيا ويا. ڪيس جي ٻڌڻيءَ وقت گلوڪاره عدالت ۾ موجود نه هئي. واضح رهي ته گلوڪاره طرفان سوشل ميڊيا وسيلي اهڙيون وڊيوز رکيون ويون جن ۾ هوءَ نانگن، اذدها، واڳن ۽ ٻين جانورن سان گڏ نظر اچي ٿي. اهڙين وڊيوز آڌار جهنگلي جيوت جي تحفظ واري کاتي ڪارروائي ڪندي معاملي جي ابتدائي جاچ ڪئي ۽ جاچ بعد رابي پيرزاده خلاف چالان تيار ڪري عدالت ۾ ڪيس داخل ڪيو.
