ممبئي (ويب ڊيسڪ) بالي ووڊ اداڪاره ڪريتي سينن انڪشاف ڪيو آهي ته فلم انڊسٽري ۾ اڄ به عورتن کي مرد اداڪارن جي ڀيٽ ۾ مختلف ۽ اڪثر غير برابري واري ورتاؤ (رويي) جو سامنا ڪرڻو پوي ٿو.هڪ يوٽيوب چينل تي ڳالهائيندي ڪريتي سينن فلمي دنيا ۾ هينئر تائين پيش آيل ڏکيائن جو ذڪر ڪيو. هن چيو ته جيڪڏهن ڪا عورت پنهنجي ڪردار يا منظر جي باري ۾ سوال ڪري ته کيس مشڪل يا حد کان وڌيڪ سوال ڪندڙ سمجهيو ويندو آهي، جڏهن ته مرد اداڪار جي ان ئي دلچسپيءَ کي پيشيورانه سنجيدگي تصور ڪيو ويندو آهي. اداڪاره وڌيڪ چيو ته فلمي سيٽس تي مرد اداڪارن کي ڪجهه موقعن تي بهتر سهولتون ڏنيون وينديون آهن ۽ اسسٽنٽ ڊائريڪٽرز انهن کان وڌيڪ متاثر (مرعوب) هوندا آهن، جڏهن ته عورتن کي اڪثر معمولي سمجهيو ويندو آهي. سندس چوڻ هو ته عورتن کي مردن جي مقابلي ۾ مختلف معيار تي پرکيو ويندو آهي، ڪجهه موقعن تي مرد اداڪارن کي بهتر ڪمرا ۽ ٻيون سهولتون فراهم ڪيون وينديون آهن. ڪريتي سينن اهو به چيو ته اصل مسئلو سهولتون ناهي پر عورتن کي گهٽتر (ڪمتر) محسوس ڪرائڻ آهي. پهرين عورتن لاءِ مضبوط ڪردار گهٽ لکيا ويندا هئا، پر هاڻي ان حوالي سان بهتري آئي آهي. ڪريتي سينن جي تازي فلم “ڪاڪ ٽيل 2” هئي، جنهن سڄي دنيا ۾ 137 ڪروڙن جو بزنس ڪيو.
