ڪراچي / اسلام آباد / لاهور (ويب ڊيسڪ) پاڪستان پيپلز پارٽي جي چيئرمين بلاول ڀٽو زرداري سنڌ جي ماڻهن سميت سڄي پاڪستاني قوم کي سنڌ جي ثقافتي ڏينهن جي موقعي تي دل جي گهراين سان مبارڪباد ڏني آهي. ميڊيا سيل بلاول هائوس پاران جاري ڪيل پريس رليز موجب، پي پي پي چيئرمين چيو ته سنڌي ثقافت پاڪستان جي متنوع ثقافتي گلدستي ۾ هڪ روشن ۽ رنگين گل آهي. هن چيو ته سنڌ جي ثقافت دنيا جي قديم ترين ۽ مضبوط ترين تهذيبن مان هڪ جي وارث آهي، جنهن جي دانائي، سخاوت ۽ انسان دوستي نسلن جي دلين کي روشن ڪري رهي آهي. هن چيو ته سنڌ جي اجرڪ، ٽوپي، شاعري ۽ موسيقي صرف علامتون نه پر سنڌو تهذيب جي زنده دل جي ڌڙڪن آهن، جيڪا هزارين سالن کان انسانيت کي پيار، هم آهنگي ۽ پرامن بقاءِ باهمي جا اصول سيکاري رهي آهي. هر وفاقي يونٽ جي ثقافتي سڃاڻپ جي حفاظت، احترام ۽ جشن لاءِ پاڪستان پيپلز پارٽي جي پختي عزم کي ورجائيندي، چيئرمين بلاول ڀٽو زرداري ورجايو ته سندس پارٽي ثقافتي ترقي کي فروغ ڏيندي، شاندار روايتون جاري رکندي ۽ يقيني بڻائيندي ته ثقافتي وقار ۽ قومي ترقي گڏجي هلي.
