مورو(ن س) سنڌ گريجوئيٽس ايسوسيئيشن پاران سنڌ جي نامياري سماج سڌارڪ ۽ صحافتي شعبي جي استاد ڊاڪٽر خان محمد پنھور جي 20 هين ورسي جي تقريب راشد مورائي گورنمينٽ ھاءِ اسڪول مورو ٽائون ڪئمپس ۾ نالي واري سماجي ۽ قومپرست شخصيت سڪندر زمان ميمڻ جي صدارت ۾ ٿي گذري. جنھن ۾ اديبن، شاعرن، ليکڪن صحافين، سياسي، سماجي ۽ علمي ادبي تنظيمن جي اڳواڻن، ڪارڪنن، شھرين، سگا جي عھديدارن ۽ ميمبرن وڏي تعداد ۾ شرڪت ڪئي. ان موقعي تي سڪندر زمان ميمڻ، امداد علي بلوچ، علي گل ڪلهوڙو، رسول بخش ٻگھيو گچيرائي، ادريس جتوئي، صوفي غلام مصطفيٰ ڪانڌڙو، عظيم سنڌي، ڪامريڊ هاشم کوسو، اسلم عباسي ، وزير فرھاد سولنگي ، محمد رفيق سرھيو، پروفيسر بخش علي چانڊيو، پروفيسر شمشاد احمد سومرو، يونس راھو ، حاڪم علي اوٺو، ڊاڪٽر ممتاز علي ميمڻ ۽ ٻين خطاب ڪندي چيو ته ڊاڪٽر خان محمد پنھور ھڪ شخص نه پر ادارو ھو جنھن سنڌ ۽ سنڌ جي ماڻھن جي جھر جنگ وڃي خدمت جو تاريخي مثال قائم ڪيو. ھو سماجي خدمت ۾ مشھور آھي هن ماڻھن جي زندگين کي سنوارڻ لاءِ پنھنجي زندگي وقف ڪري ڇڏي ھئي. سنڌ مھان شخصيتن سان ڀري پئي آھي جن پنھنجي زندگي ۾ انسانيت جي ڀلائي بھتري لاءِ پاڻ پتوڙيو، انھن ۾ خان محمد پنھور پڻ شامل آھي.
ھنن چيو ته خان محمد پنھور سنڌ جي ترقي تعمير سونھن سڌاري بھتري ۽ تعليم لاءِ وڏيون خدمتون سر انجام ڏنيون، جيڪي تاريخ جو ھڪ حصو بڻيل آھن. هن علم ذريعي اونداھي سماج کي روشن ڪيو، اڄ اھي غريبن مسڪينن جا ٻار اعليٰ مقام ۽ اعليٰ عھدن تي آھن. ھن علم ادب ۽ سماج جي سڌاري لاءِ پڻ لازوال جدوجھد ڪئي، ادبي دنيا ۾ ڪيتريون ئي ادبي تنظيمون جيڪي ٻارڙن جي ادب کان وٺي وڏن شاعرن ۽ ادبين لاءِ تنظيمون ٺاھي انھن کي ھڪ پليٽ فارم تي گڏ ڪيو ۽ ڪراچي ۾ سنڌي ماڻھن کي متحد ڪرڻ، مدد ڪرڻ انھن کي آباد ڪرڻ ۾ پڻ ھن جون خدمتون سر فھرست آھن. سنڌ ۽ موري لاءِ ھن جون وڏيون خدمتون ۽ قربانيون آھن. زندگي جو ڳچ حصو ھن مورو ۾ گذاريو ۽ مورو جي ادب علم ۾ نواڻ آندي اڄ به خان محمد پنھور ماڻھن جي دلين ۾ زنده آھي ھن جھڙيون شخصيتون ڪڏھن به ناھن مرڻيون ھميشه زنده آھن ۽ رھنديون. مقررن چيو ته ھو صحافت جي دنيا جو چمڪندڙ ستارو ھو جنھن صحافت جي دنيا ۾ حق سچ لکي پنھنجو نالو روشن ڪيو. ھن تقريب ۾ مورو پريس ڪلب جي جنرل سيڪريٽري اختر لغاري، مشتاق باگاڻي، راڻو اياز علي ميمڻ ، مخدوم اظھار، حاجي نثار احمد ميمڻ ، خالد ساحل ڪيريو، قربان علي کوسو، پروفيسر حق نواز ميمڻ ، محمد عرس خاصخيلي ، ڊاڪٽر وجھ الدين ميمڻ ، حسين بخش ميمڻ ، فھد رضا ميمڻ ، غلام حيدر مھجور سولنگي دين محمد ڪلهوڙو ، ، ظفر الحق پنھور، اياز علي سولنگي ، شاھنواز ڀٽي ، غلام نبي بھراڻي ، زاھد ڏيپر ۽ ٻين شرڪت ڪئي اسٽيج سيڪريٽري جا فرائض وزير فرهاد سولنگي سر انجام ڏنا۔
