پشاور (ويب ڊيسڪ) پي ڊي ايم جي سربراهه مولانا فضل الرحمان چيو آهي ته جِتي آئين خاموش هُجي، اُتي عدالت جو ڪردار ختم ٿي ويندو آهي، آئين ۾ سينيٽ چونڊون شو آف هينڊز ذريعي ڪرائڻ لاءِ ڪابه شق ناهي، عدالت کي گذارش آهي ته اُن ۾ پاڻ کي ڌُر نه بڻائي ۽ صورتحال جيئن جو تيئن رهڻ ڏئي. ميڊيا سان ڳالهائيندي هن چيو ته ڊسڪه ۽ ڪرم ۾ ٻيهر ننڍي چونڊ ڪرائڻ جو مطالبو ڪيو. هن چيو ته پيپلز پارٽي کي سينيٽ چونڊن ۾ ادارن جَي ڪردار بابت ثبوت نه مليا هوندا، اسان بنا جواز ڪنهن کي جانبدار نه سڏيندا آهيون، 2018ع جي چونڊن ۾ ٿيل ڌانڌلي تي وڏي واڪي ڳالهايو ۽ اڄ به اُن تي قائم آهيون، ڪرم ۽ ڊسڪه ۾ ننڍي چونڊ دوران ڌانڌلي ذريعي آيل نتيجن کي قبول نٿا ڪريون، ڌانڌلي جا ذميوار پنهنجي ذميواري قبول ڪن ۽ اليڪشن ڪميشن ٻيهر چونڊون ڪرائي، سينيٽ چونڊن ۾ سرپرائيز اهو آهي ته انشاءَ الله اسان ڪامياب ٿينداسين.
