ڪراچي (اسٽاف رپورٽر): سنڌ جي وڏي وزير سيد مراد علي شاهه جي صدارت هيٺ امن امان واري صورتحال جو جائزو وٺڻ لاءِ هڪ اهم اجلاس ٿيو، جنهن ۾ وڏي وزير پوليس کي هدايت ڪئي ته موبائل فون جي ڪاروبار، نون ۽ استعمال ٿيل ٻنهي، کي ريگوليٽ ڪيو وڃي ۽ چوري ٿيل گاڏين جي اسڪريپ ۾ واپار ڪندڙن خلاف سخت ڪارروائي ڪئي وڃي. هن خاص طور تي سکر ۽ لاڙڪاڻو ڊويزن ۾ ڀُنگ لاءِ اغوا جي مسئلي کي بهتر طريقي سان منهن ڏيڻ لاءِ پوليسنگ کي مضبوط ڪرڻ تي زور ڏنو. سي ايم هائوس ۾ ٿيل اجلاس ۾ ٿيو، جنهن ۾ صوبائي وزيرن شرجيل ميمڻ، ضياءُ الحسن لانجراڻي، آءِ جي پوليس غلام نبي ميمڻ، هوم سيڪريٽري اقبال ميمڻ، پي ايس سي ايم آغا واصف، ايڊيشنل آءِ جي ڪراچي جاويد اوڍو، ڊي آءِ جي فدا ميتلو، ڊي آءِ جي آصف اعجاز شيخ ۽ ٻين شرڪت ڪئي. وڏي وزير پوليس کي هدايت ڪئي ته سڄي سنڌ ۾ امن امان جي صورتحال کي بهتر بڻايو وڃي، خاص طور تي لاڙڪاڻو ۽ سکر ڊويزن ۾ پوليسنگ کي مضبوط ڪيو وڃي ته جيئن اغوا براءِ تاوان جا واقعا روڪي سگهجن. وڏي وزير آءِ جي کي هدايت ڪئي ته صوبي اندر صرف اهي موبائيل فون وڪرو ڪيا وڃن جن وٽ مڪمل قانوني دستاويز موجود هجن. وڏي وزير ڪراچي کي موبائل فون مارڪيٽ جو وڏو مرڪز قرار ڏيندي چيو ته سڀني لاڳاپيل ڌرين تائين واضح پيغام پهچائڻ جي ضرورت آهي. “هر موبائل فون جو واپار ، نئون هجي يا پراڻو، درست طريقي سان دستاويز ٿيل هجڻ گهرجي،” هن چيو. آءِ جي پوليس ٻڌايو ته موبائل مارڪيٽ ايسوسيئيشن سان SOPs اڳ ۾ ئي طئي ٿي چڪا آهن. وڏي وزير چوري ٿيل گاڏين ۽ موٽر سائيڪل جي اسپيئر پارٽس جي وڪري خلاف ٿيندڙ قدمن جو به جائزو ورتو. آءِ جي ٻڌايو ته 234 اسڪريپ وڪڻندڙ غيرقانوني سرگرمين ۾ ملوث هجڻ تي گرفتار ڪيا ويا آهن. جڏهن ته FIA ۽ پوليس جي گڏيل آپريشن دوران چوري ٿيل فونن جي غير قانوني IMEI ان لاڪنگ خلاف ڪارروائي ڪندي 27 ڄڻا گرفتار ڪيا ويا آهن. وڏي وزير مراد علي شاهه پوليس اسٽيشنن جي بهتري لاءِ رکيل 28 ڪروڙ رپين جي فنڊ بابت پڇاڻو ڪيو ته گهرو وزير ٻڌايو ته 31 مان 10 پوليس اسٽيشنن جي مرمت مڪمل ٿي چڪي آهي ۽ باقي هڪ مهيني ۾ مڪمل ٿيڻ جي اميد آهي. مراد شاهه سختي سان حڪم ڏنو ته سول ڪپڙن ۾ هٿياربند ماڻهن کي گاڏين ۾ گهمڻ جي اجازت نه ڏني وڃي. آءِ جي ٻڌايو ته 14,296 اهڙيون گاڏيون جن تي غير قانوني نيريون بتيون لڳل هيون، 81,243 جن تي رنگين شيشا لڳل هئا، ۽ 253,339 جن تي فينسي نمبر پليٽون لڳل هيون، انهن کي تحويل ۾ ورتو ويو آهي. ان کان علاوه، 528 گاڏيون هٿيار ڏيکارڻ تي ضبط ڪيون ويون آهن. هن وقت تائين 1,474 FIR داخل ٿي چڪيون آهن، جن مان 3.46 ڪروڙ رپين جا ڏنڊ وصول ڪيا ويا آهن. وڏي وزير کي آءِ جي ٻڌايو ويو ته هلندڙ سال جي ٽن مهينن ۾ شهر ۾ ڏوهارين خلاف سخت ڪارروائي ڪئي وئي آهي. 245 مقابلا ڪيا ويا، جن ۾ 38 ڏوهاري مارجي ويا، 262 زخمي ٿيا ۽ 1983 کي گرفتار ڪيو ويو آهي.
اسٽريٽ ڪرائم: وڏي وزير جي هدايت تي پوليس شعبي طرفان “شاهين فورس” کي ٻيهر فعال ڪيو ويو آهي، جنهن ۾ 386 موٽرسائيڪلن تي ٻڌل هڪ خاص اسڪواڊ شامل آهي. هي اسڪواڊ اهم هنڌن تي مصروفيت وارن ڪلاڪن دوران گشت ڪري ٿو. هر ايس ايس پي کي گشتي پلان ڏنو ويو آهي، جيڪو هن وقت لاڳو ڪيو ويو آهي. ان کان علاوه، مددگار-15 سروس کي پڻ بهتر بڻايو ويو آهي، جنهن ۾ اضافي 120 موٽرسائيڪلون شامل ڪيون ويون آهن ۽ 8 وڏا اسڪرين به ڪال سينٽرن تي لڳايا ويا آهن ته جيئن پوليس جي سرگرمين جي نگراني بهتر ٿي سگهي. آءِ جي پوليس وڏي وزير کي ٻڌايو ته CPO ۾ ڪمانڊ اينڊ ڪنٽرول سينٽر کي اپ گريڊ ڪيو ويو آهي. في الحال 2000 ڪئميرائون لڳايون ويون آهن، جڏهن ته وڌيڪ 325 ڪئميرائون لڳائي رهيا آهيون ۽ 500 پراڻيون ڪيمرائون اپ گريڊ ٿي رهيون آهن. هن اهو به ٻڌايو ته ڪميونٽي سان گڏجي ڪراچي جي رستن تي 40,000 CCTV لڳايا ويا آهن.
سنڌ اسمارٽ سرويئلنس سسٽم (S4)، جيڪو ڪراچي سيف سٽي پراجيڪٽ جو حصو آهي، ان تحت خودڪار نمبر پليٽ سڃاڻپ (ANPR) ۽ چهرو سڃاڻپ ڪندڙ ڪيمرائون لڳائڻ جو ڪم جاري آهي. گهرو معاملن جي وزير ضياءَ لانجرا وڏي وزير کي ٻڌايو ته وري وري ڏوهه ڪندڙن لاءِ اي-ٽيگنگ جلد شروع ڪئي پئي وڃي. هن ٻڌايو ته 4000 ڊوائيسز خريد ڪيون پيون وڃن پائلٽ پراجيڪٽ لاءِ، ۽ قاعدا ۽ SOPs اڳ ۾ ئي تيار ٿي چڪا آهن. مراد شاهه قيدين جي بحالي لاءِ هڪ منظم منصوبابندي جي ضرورت تي زور ڏنو. هن قتل ۽ منشيات وارن ڪيسن لاءِ خاص عدالتون قائم ڪرڻ جي تجويز ڏني. ان تي، گهرو ۽ قانون واري وزير ٻڌايو ته 400 پروسيڪيوٽرز کي عارضي بنيادن تي ڀرتي ڪرڻ جو عمل هلي رهيو آهي ته جيئن جاچ وارن آفيسرن جي مدد ڪري سگهن.
ڪچي جي علائقن بابت اهم فيصلو: وڏي وزير کي ٻڌايو ويو ته پهرين جنوري کان 31 مارچ 2025 تائين 22 اغوا جا واقعا رپورٽ ٿيا، جن مان 17 متاثرن کي واپس آندو ويو آهي، جڏهن ته 5 ڪيس اڃا حل طلب آهن. وڏي وزير پوليس کي هدايت ڪئي ته ڏوهارين خلاف ڪارروائي تيز ڪئي وڃي ۽ باقي رهيل ڪيسن کي به حل ڪيو وڃي. وڏي وزير کي ٻڌايو ويو ته ڪچي ۾ آپريشن اپريل 2024 ۾ سنڌ رينجرز سان گڏجي شروع ٿيو هو. جديد ٽيڪنالاجي جي مدد سان ٽارگيٽ انٽيلجنس بيسڊ آپريشن (IBO) ڪيا ويا آهن. ان تحت ملٽي پرپز ڊرون ڪيمرائون، نائيٽ ويزن بينوڪولر، مونوڪيولر ۽ نائٽ ويزن ٿرمل اسڪوپز خريد ڪيون ويون آهن. وڏي وزير گهرو وزير کي هدايت ڪئي ته شڪارپور، ڪشمور، گھوٽڪي ۽ سکر ۾هڪ ئي وقت آپريشن تيز ڪيا وڃن. هن عرصي دوران 85 ڏوهاري مارجي ويا، 166 زخمي ٿيا. افسوسناڪ طور تي، 20 پوليس اهلڪار شهيد ۽ 33 زخمي ٿيا. اجلاس کان پوءِ وڏي وزير اعلان ڪيو ته هو ايندڙ ڏينهن (اڱارو) تي شهر جي ٽرئفڪ مسئلن تي اجلاس ڪندو. هن چيو ته وڌندڙ روڊ حادثا هاڻي سنجيده مسئلو بڻجي چڪا آهن، جن کي حل ڪرڻ جي ضرورت آهي.
