راولپنڊي: (ويب ڊيسڪ) پي ٽي آءِ اڳواڻ عليمه خان چيو آهي ته عمران خان ۽ بشريٰ بي بي کي توشه خانه ڪيس تي 17 سال قيد جي سزا ٻڌائي وئي، مريم نواز جيڪا گاڏي توشه خانه مان ورتي هئي انهي جو هو جواب نه ڏئي سگهي هئي انهي جو ڇا ٿيو؟ قانون جو مذاق بنايو ويو آهي.دهشتگردي جي انت واري عدالت راولپنڊي جي ٻاهران پنهنجي وڪيل فيصل ملڪ سان صحافين سان ڳالهيون ڪندي عليمه خان چيو ته عمران خان گذريل سال 22 نومبر تي پرامن احتجاج جو سڏ ڏنو هو. منهنجي مٿان الزام آهي ته مون باني جو پيغام عوام تائين پهچايو. اسان جي خلاف پوليس وارن کي آڻي گواهي لاءِ بيهاريو ويندو آهي، اسان جي خلاف ڪوڙي گواهي ڏيندڙن کي به سزا ٿيڻ گهرجي، پاڪستان مان انصاف هاڻ ختم ٿي چڪو آهي. عدليه ۾ سٺا ججز به آهن پر انهن جي ڪير به ٻڌڻ لاءِ تيار نه آهي.هن چيو ته باني هميشه رول آف لا جي ڳالهه ڪئي آهي، جيڪو جج رول آف لا جي ڳالهه ڪري ٿو انهي کي دٻايو ويندو آهي، حقيقت سڀني کي خبر آهي ته ڇا ٿي رهيو آهي، باني ۽ بشريٰ بي بي جي خلاف توشه خانه ڪيس بوگس ڪيس آهي، توشه خانه ڪيس ۾ الزام اهو آهي ته هار جي قيمت گهٽ لڳرائي وئي ۽ قيمت گهٽ لڳائڻ تي 17 سال قيد جي سزا ٻڌائي وئي. مريم نواز جيڪا گاڏي توشه خانه مان ورتي هئي انهي جو هو جواب نه ڏئي سگهي هئي، پاڪستان ۾ قانون جو مذاق بنايو ويو آهي.عليمه خان چيو ته باني ٻه ڏينهن اڳ به پيغام اماڻيو هو ته قوم لاءِ شهادت قبول ڪنداسين، پي ٽي آءِ باني اڍائي سالن کان جيل ۾ ويٺل آهي، باني هميشه چيو ته هو ڪيسز کي منهن ڏيندو. باني کي ملڪ کان وڃڻ جون آڇو به اينديون رهيون. هن چيو ته جيڪي ججز غلط سزائون ڏئي رهيا آهن اهي جهاز ۾ چڙهي ملڪ کان ٻاهر هليا ويندا آهن اسان انهن ججز جا نالا ياد رکنداسين.عليمه خان چيو ته اي ٽي سي جا ججز به لڳي ٿو ته ڪنهن پلان جي تحت هلي رهيا آهن، مون باني جو پيغام ميڊيا کي ڏنو هو. اسان ميڊيا جي ماڻهن کي پنهنجي گواهه جي طور تي پيش ڪنداسين، باني کي اسان 11 ڪتابون اماڻيون هيون. جج صاحب چيو ته 9 ڪتاب اسان کي ملي چڪا آهن.عليمه خان چيو ته باني اسٽريٽ موومينٽ لاءِ ڪي پي ليڊر شپ کي پيغام اماڻيو آهي. تحريڪ تحفظ آئين جي ڪانفرنس جي پڌرائي جي باري ۾ مون کي خبر نه آهي. پي ٽي آءِ باني 90 سيڪڙو ماڻهن جي نمائندگي ڪري رهيو آهي جيڪي ماڻهو چئي رهيا آهن ته ڳالهيون ڪيون وڃن اهو باني جي موقف سان گڏ نه آهن. جيڪي پارٽي اڳواڻ ڳالهين جون ڳالهيون ڪندا آهن اهي پي ٽي آءِ باني سان گڏ نه آهن.ايڊووڪيٽ فيصل ملڪ چيو ته عليمه خان جي خلاف 26 نومبر جي ڪيس ۾ ڪوبه مواد نه آهي اسان اڄ عليمه خان جي بريت جي درخواست داخل ڪئي آهي، اسان جي درخواست جي باوجود اڄ گواهن جا بيان رڪارڊ ڪيا ويا، اهي سمورا ڪيسز سياسي انتقامي ڪارروائي تي ٻڌل آهن، اسان جي عدالتن کان درخواست آهي ته اهي انصاف فراهم ڪن، استغاثه کي عليمه خان جو ڪيس تيز رفتاري سان هلائڻ جي جلدي آهي.
